އާއިލާއަށް ހަބަރެއް ނުވާތާ ދެ މަހެއްހާ ދުވަސް ފަހުން އިއްޔެ ހޯދަން އިއުލާނުކުރި މީހާ ތިލަފުށީގައި ގަދަވެ ސަލާމަތުން ހުރިކަން އަންގާފައިވާ ކަމަށް ފުލުހުން ބުނެފި އެވެ.
ފުވައްމުލަކު މީހެއް ކަމަށްވާ އަބްދުލްއަޒީޒް މުހައްމަދު، 64، ގެއްލިގެން ހޯދަމުން އަންނަކަން ފުލުހުން އިއުލާނުކުރީ އިއްޔެ އެވެ.
އާއިލާއާ ހަވާލާދީ ފުލުހުން ބުނި ގޮތުގައި އެ މީހާ އެންމެ ފަހުން ފެނިފައިވަނީ މިދިޔަ ނޮވެމްބަރު މަހު އައިޖީއެމްއެޗް ކައިރިންނެވެ. އަދި އެއީ މުދާ އުފުލާ ދޯނިފަހަރުގައި މަސައްކަތްކުރާ މީހެއް ކަމަށް ވެސް ބުންޏެވެ.
"އަބްދުލްއަޒީޒު މުހައްމަދު، އޭނާގެ އާއިލާއަށް އަދި ފުވައްމުލައް ޕޮލިސް ސްޓޭޝަނަށް ގުޅައި، އޭނާ ހުރީ ތިލަފުށީގައި ކަމާއި ހާލު ރަނގަޅުކަމަށް ވަނީ މައުލޫމާތު ދީފައި،" ފުލުހުން މީޑިއާތަކަށް ފޮނުވި މެސެޖެއްގައި ބުންޏެވެ.
އަބްދުއްއަޒީޒު ގެއްލިފައިވާ ކަމަށް ފުލުހުންނަށް ރިޕޯޓުކުރުމާ ގުޅިގެން، ކަމާބެހޭ ހުރިހާ ޑިޕާޓްމަންޓްތަކަށް އެ މައުލޫމާތު ހިއްސާކޮށް، އޭނާ ހޯދުމަށް ކުރި މަސައްކަތުން ފުލުހުންނަށް އޭނާއާ ބެހޭ އެއްވެސް މައުލޫމާތެއް ނުވަތަ އުޅޭތަނެއް ހޯދިފައި ނުވާ ކަމަށް އިއްޔެ ބުންޏެވެ.