މީގެ ދެމަހެއްހާ ދުވަސް ކުރިން ގެއްލިގެން ހޯދަމުން އަންނަ ފުވައްމުލަކު މީހެއްގެ މައުލޫމާތު ފުލުހުން މިއަދު އާންމުކޮށްފި އެވެ.
ގެއްލިގެން ހޯދަމުން އަންނަނީ ފުވައްމުލަކު ދޫޑިގަން، ދުންފުނިގެ، އަބްދުއްއަޒީޒު މުހައްމަދު، 64، އެވެ.
ފުލުހުން ބުނި ގޮތުގައި، އޭނާ މަސައްކަތްކުރަނީ މުދާ އުފުލާ ދޯނިފަހަރުގަ އެވެ. އޭނާގެ ހަބަރެއް އާއިލާއަށް އެންމެ ފަހުން ވެފައި ވަނީ މިދިޔަ އަހަރު ސެޕްޓެމްބަރު މަހުގެ ތިންވަނަ ދުވަހު ފޯނުންނެވެ.
އޭނާގެ އާއިލާގެ މީހަކަށް އޭނާ އެންމެ ފަހުން ފެނިފައި ވަނީ މިދިޔަ އަހަރުގެ ނޮވެމްބަރު މަހު، އައިޖީއެމްއެޗް ކައިރިން ކަމަށް ވެސް އޭނާގެ އާއިލާއިން މައުލޫމާތު ދީފައިވާ ކަމަށް ވެސް ފުލުހުން ބުންޏެވެ.
ފުލުހުން ބުނީ އަބްދުއްއަޒީޒު ގެއްލިފައިވާ ކަމަށް ފުލުހުންނަށް ރިޕޯޓުކުރުމާ ގުޅިގެން، ކަމާބެހޭ ހުރިހާ ޑިޕާޓްމަންޓްތަކަށް އެ މައުލޫމާތު ހިއްސާކޮށް، އޭނާ ހޯދުމުގެ މަސައްކަތް ފަށާފައިވާ ކަމަށެވެ. ނަމަވެސް، މިހާތަނަށް ކުރެވުނު މަސައްކަތުން އޭނާއާ ބެހޭ އެއްވެސް މައުލޫމާތެއް ނުވަތަ އުޅޭތަނެއް ދެނެގަނެވިފައި ނުވާ ކަމަށް ފުލުހުން ބުންޏެވެ.
އަބްދުއްއަޒީޒުއާ ބެހޭ އެއްވެސް މައުލޫމާތެއް ލިބިފައިވާ ނަމަ 3322111 އަށް ނުވަތަ ފުވައްމުލަކު ޕޮލިސް ސްޓޭޝަން ނަންބަރު 9792803 އަށް ހިއްސާކުރުމަށް އެދޭ ކަމަށް ފުލުހުން ބުންޏެވެ.