ޒަމްޒަމް ހައްޖު އެންޑް އުމްރާގެ ބެލުމުގެ ދަށުން އުމްރާއަށް ދިޔަ ދިވެއްސަކު ނިޔާވެއްޖެ އެވެ.
ކުއްލިއަކަށް ހާލު ދެރަވެގެން ފަރުވާދެމުންދަނިކޮށް ރޭ މެންދަމު ނިޔާވެފައި ވަނީ ރ. މީދޫ މީހެއް ކަމަށްވާ ސައީދު ޔޫސުފެވެ.
"މިހާރު" އަށް އެނގިފައިވާ ގޮތުގައި ސައީދުގެ ނިޔާވީ ވަރަށް ބޮޑަށް ގޭސްޓްރިކްވެގެން މެޔަށް ތަދުވާތީ، މައްކާގައި ހުންނަ ކިންގް ފައިސަލް ހޮސްޕިޓަލަށް މީގެ ތިން ދުވަސް ކުރިން ދައްކައި ފަރުވާ ހޯދަމުން އަންނަނިކޮށެވެ.
ރޯދަ މަހުގެ ފަހު ދިހައިގައި އުމްރާގެ އަޅުކަމަށް ސަައީދު ފުރީ އޭނާގެ އާއިލާގެ ގިނަ ބަޔަކާ އެކުގަ އެވެ. އޭގެ ތެރޭގައި ސައީދުގެ އަނބިމީހާ އާއި ތިން ދަރިން ހިމެނެ އެވެ.
ސައީދު ނިޔާވީ އުމްރާގެ އަޅުކަން ފުރިހަމަކުރުމަށް ފަހު، ރާއްޖެއަށް އަންނަން ތައްޔާރުވަމުންދަނިކޮށެވެ.
ޒަމްޒަމް ގްރޫޕްގެ ފަރާތުން މިހާރު އަންނަނީ ޖަނާޒާގެ ކަންކަން ފުރިހަމކޮށް މިއަދުގެ ވަގުތެއްގައި މަސްޖިދުލް ހަރާމް ގައި ސައީދުގެ މައްޗަށް ކަށުނަމާދު ކުރެވޭނެ އިންތިޒާމް ހަމަޖެއްސޭތޯ ބަަލަމުންނެވެ.
އުމްރާއަށް ގޮސް އުޅެނިކޮށް ރޯދަ މަހު އެހެން ދިވެއްސަކު ވެސް ނިޔާވެފައިވެ އެވެ.