އިންޑިއާގައި ނިޕާ ވައިރަސް ޖެހިފައިވާކަން މިހާތަނަށް ކަށަވަރުވީ ވެސްޓް ބެންގަލް އިން ދެ މީހަކަށް ކަމަށާއި އަވަހަށް އެޅި ފިޔަވަޅުތަކާ އެކު ބަލި ކޮންޓްރޯލް ކުރެވިފައިވާ ކަމަށް އިންޑިއާގެ ހެލްތު މިނިސްޓްރީން އިއްޔެ ބުނެފި އެވެ.
ޖަނަވާރުންގެ ގައިން އިންސާނުންނަށް އަރާ މި ވައިރަހަށް މިހާތަނަށް ވެކްސިނެއް ނެތެވެ. ދުނިޔޭގެ ސިއްހަތު ޖަމިއްޔާއިން ބުނާ ގޮތުގައި މި ވައިރަސް ޖެހޭ މީހުންގެ ތެރެއިން 40-75 މީހުން މަރުވެ އެވެ.
"ސަވައިލެންސާއި ލެބޯޓަރީ ޓެސްޓުތަކާއި ފީލްޑް އިންވެސްޓިގޭޝަން އިތުރުކޮށް އެޅި ވަރުގަދަ ފިޔަވަޅުތަކާ އެކު މި ކޭސްތައް ވަނީ ކޮންޓްރޯލް ކުރެވިފައި،" ރޭ ނެރުނު ބަޔާނުގައި ބުންޏެވެ.
ބަލި ޖެހުނު ދެ މީހުންނާ ގުޅޭ ގޮތުން މިނިސްޓްރީގެ ބަޔާނުގައި ތަފްސީލެއް ދީފައެއް ނުވެ އެވެ.
"ހާލަތު މި އަންނަނީ ހުއްޓުމެއް ނެތި ގާތުން މޮނިޓަކުރަމުން. އަދި އާންމު ސިއްހަތުގެ ރައްކާތެރިކަމަށް އަޅަންޖެހޭ ފިޔަވަޅުތައް ވަނީ އަޅާފައި،" ބަޔާނުގައިވެ އެވެ.
މިނިސްޓްރީން ބުނީ ބަލި ޖެހުނު މީހުންނާ ގުޅުން އޮތް ނުވަތަ ކޮންޓެކްޓުވި ކަމަށް އެނގިފައިވާ 196 މީހުން ކަރަންޓީންކޮށް ހެދި ޓެސްޓުތަކުން އެ އެންމެން ނެގެޓިވްކަން ކަށަވަރުކުރެވިފައިވާ ކަމަށެވެ.
ނިޕާ އަކީ އެންމެ ފުރަތަމަ، 1998 ވަނަ އަހަރު މެލޭޝިއާގައި އޫރު ގެންގުޅޭ ބައެއްގެ ގައިން ފެނުނު ވައިރަހެކެވެ.
އިންޑިއާގައި އެންމެ ފުރަތަމަ ނިޕާ ވައިރަސް ފެނުނީ 2001 ވަނަ އަހަރު ވެސްޓް ބެންގަލްއިންނެވެ.
އިންޑިއާގެ ކެރެލާގައި 2018 ވަނަ އަހަރު ވަނީ ނިޕާ ވައިރަސް ޖެހިގެން 17 މީހުން މަރުވެފަ އެވެ. އަދި 2023 ވަނަ އަހަރު އެ ސްޓޭޓުގައި ދެ މީހަކު މި ވައިރަސް ޖެހިގެން މަރުވި އެވެ.
ނިޕާގެ އަލާމާތްތަކުގެ ތެރޭގައި ހުން އައުމާއި، ނޭވާލާން އުނދަގޫވުން އަދި ނޭވާލާ ނިޒާމުގެ އެކި އިންފެކްޝަންތައް ޖެހުން ހިމެނެ އެވެ. ބޮޑުވަރުވާ މީހުންނަށް ފިޓް ޖެހުމާއި ސިކުނޑި ދުޅަވުމާއި ކޯމާއަށް ދިއުމުގެ ނުރައްކާ ވެސް އޮވެ އެވެ.
ނިޕާ ވައިރަސް އުފުލާ އާންމު ޖަނަވާރަކީ އެންމެ އާންމުކޮށް އުޅޭ ވައު [ފުރުޓް ބެޓް] އެވެ. އެކި ހިސާބުތަކުން މި ވައިރަސް ދޭތެރެދޭތެރެއިން ފެންނަނީ ވާލުގެ ސަބަބުން ކަމަށް ބެލެވެ އެވެ. -- އޭއެފްޕީ