ނިޕާ ވައިރަހުގެ ނުރައްކާ ރާއްޖެއަށް މިވަގުތު ކުޑަ ނަމަވެސް، ހާލަތު މޮނީޓާކުރަމުން އަންނަ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނެފި އެވެ.
އެޗްޕީއޭ އިން ނެރުނު ނޫސްބަޔާނެއްގައި ބުނީ މިވަގުތު ރާއްޖެއަށް ނިޕާ ވައިރަހުގެ ނުރައްކާ އޮތް މިންވަރު ކުޑަ ނަމަވެސް، ހާލަތު މޮނީޓާކުރަމުން އަންނަ ކަމަށާއި އެ ބައްޔާ ގުޅޭ އެއްވެސް ކޭސްއެއް އަދި ކޮންޓެކްޓުވި އެއްވެސް މީހެއް ހުރިކަމުގެ ރިޕޯޓެއް އެ އެޖެންސީއަށް ލިބިފައިނުވާ ކަމަށެވެ.
ނަމަވެސް، އެ ބަލި ފެނިފައިވާ އިންޑިއާގެ ވެސްޓް ބެންގޯލް ސަރަހައްދަށް ދަތުރުކުރާ މީހުން އެކަމަށް ހާއްސަ ސަމާލުކަމެއް ދިނުމަށް އެ އެޖެންސީން ވަނީ އިލްތިމާސްކޮށްފަ އެވެ. އަދި އާންމު ސިއްހަތު ރައްކާތެރިކުރުމަށް އަޅަން ޖެހޭ ފިޔަވަޅުތައް ކަމާ ގުޅޭ އިދާރާތަކާއި ސިއްހީ ހިދުމަތް ދޭ ތަންތަނާ ގުޅިގެން އަޅާނެ ކަމަށް ވެސް އެ އެޖެންސީން ބުންޏެވެ.
ނިޕާ ވައިރަހަށް ޕޮޒިޓިވްވެފައިވާ ތިން މީހަކު އިންޑިއާގެ ކެރެލާ ސްޓޭޓުން މިމަހު ފެނިފައިވާ ކަމަށާއި މީގެ ކުރީގެ އަހަރުތަކުގައި ވެސް އިންޑިއާ އަދި އެހެން ބައެއް ގައުމުތަކުގައި ވެސް އެ ބައްޔަށް ޕޮޒިޓިވް މީހުން ފެނިފައިވާ ކަމަށް އެ ބަޔާނުގައިވެ އެވެ.
އެޗްޕީއޭ އިން ބުނި ގޮތުގައި، ނިޕާ ވައިރަހަކީ ޓެރޯޕަސް އާއިލާގެ ވާލުން އަދި އޫރުން އިންސާނުންގެ ގަޔަށް އަރާ ބައްޔެކެވެ. އެ ބާވަތުގެ ވާ ކައިފައިވާ މޭވާ ނުވަތަ ވާލުގެ ކުޅު ނުވަތަ ކުޑަކަމުދާ ތަކެތި ޖެހިފައިވާ މޭވާ އާއި ތަރުކާރީ ކަހަލަ އެއްޗެހި ބޭނުންކުރުމުން އިންސާނުންނަށް ގަޔަށް އެ ބަލި އަރަ އެވެ. އަދި އެ ބަލި ޖެހިފައިވާ މީހުންނާ ގާތްކޮށް އުޅޭ މީހުން ގަޔަށް ފެތުރުމުގެ ފުރުސަތު އޮވެ އެވެ.
އާންމު އަލާމަތްތައް
- ހުން އައުން
- ބޮލުގައި ރިއްސުން
- ކެއްސުން
- ނޭވާލާން އުނދަގޫވުން އަދި މޭނުބައިކުރުން
- ބަލީގެ ނުރައްކާތެރި ހާލަތްތަކުގައި ސިކުނޑިއަށް އަސަރުކޮށް، ވާނުވާ ނޭނގުން ނުވަތަ ފިޓް ޖެހުން ކަހަލަ ކަންކަން މެދުވެރިވޭ
އެޗްޕީއޭ އިން ބުނީ އެ ބައްޔަށް ވަކި ހާއްސަ ފަރުވާއެއް ނެތް ނަމަވެސް، ބަލީގެ އަލާމާތްތަކަށް ފަރުވާ ކުރެވޭ ކަމަށެވެ.
އިންޑިއާގެ ވެސްޓް ބެންގޯލް އިން ނިޕާ ވައިރަހަށް ޕޮޒިޓިވްވި މީހުންނާ ކޮންޓެކްޓުވި 180 އަށް ވުރެ ގިނަ މީހުން ދެނެގަނެވި، އެ މީހުން އެ ގައުމުން މިހާރު ކަރަންޓީނުކޮށްފައިވާ ކަމަށް އެޗްޕީއޭ އިން ބުންޏެވެ.
އެޗްޕީއޭ އިން ބުނީ ކަރަންޓީނުކޮށްފައިވާ މީހުންގެ ހާލަތު އިންޑިއާގެ ކަމާބެހޭ ފަރާތްތަކުން ވަރަށް ގާތުން ބަލަމުންދާ ކަމަށާއި އަދި އެ ބަލި ޖެހިފައިވާ އިތުރު މީހެއް މިހާތަނަށް ފެނިފައިވާ ނުވާ ކަމަށެވެ. އަދި މި ކޭސްތަކާ ގުޅިގެން އިންޑިއާގެ އިތުރު އެހެން އެއްވެސް ސަރަހައްދަކުން އަދި އެހެން ގައުމަކުން ވެސް އެ ބަލި ފެނިފައިވާ ކަމުގެ ރިޕޯޓެއް މިހާތަނަށް ލިބިފައި ނުވާ ކަމަށް އެ އެޖެންސީން ބުންޏެވެ.
ނުރައްކާތެރި ނިޕާ ވައިރަސް އިންޑިއާގެ ކެރަލާ އާއި ވެސްޓް ބެންގަލްގައި އާންމުވެ - އެންޑެމިކް - ހާލަތުގައިވާ ކަމުގެ އިންޒާރު އިންޑިއާގެ ނޭޝަނަލް ޓެކްނިކަލް އެޑްވައިޒަރީ ގްރޫޕުން މިއަދު ވަނީ ދީފަ އެވެ.