ސްކޫލު މާހައުލުގައި ހަރަކާތްތެރިވުމަށް ދަރިވަރުންނަށް ބާރު އެޅުމަށް "ސްކޫލް ކޮރިޑޯ އެކްޓިވިޓީ، ހާޓީ ބްރޭކްސް" ޕްރޮގްރާމް، ފަސްޓް ލޭޑީ ފަޒްނާ އަހުމަދު މިއަދު ފައްޓަވައިދެއްވައިފި އެވެ.
އެޑިއުކޭޝަން މިނިސްޓްރީ އަދި ޓައިނީ ހާޓްސް މޯލްޑިވްސް ގުޅިގެން ކުރިއަށްގެންދާ ހަރަކާތް އެންމެ ފުރަތަމަ ފެށީ ހުޅުމާލޭ ޣާޒީ ސްކޫލުގަ އެވެ.
އެ ރަސްމިއްޔާތުގައި ފަސްޓްލޭޑީ ވިދާޅުވީ ކްލާހުން ދަރިވަރުން ނިކުންނަ ވަގުތު ސިކުނޑި ހަމަޖައްސާލަން ކުޑަ ކަސްރަތެއް ކޮށްލުމުގެ ފުރުސަތު ލިބުމަކީ އެ ކުދިންގެ ދުޅަހެޔޮކަމަށް ލިބޭނެ ބާރެއް ކަމަށެވެ. އެ ހަރަކާތުގެ ސަބަބުން، ކޮރިޑޯގައި ކުދިން ދުވެއުޅުމުގެ ބަދަލުގައި ހެޔޮގޮތުގައި ބޭނުންކުރަން ދަރިވަރުންނަށް ދަސްވާނެ ކަމަށް، ތައުލީމީ ދާއިރާގައި ގިނަ އަހަރުތަކެއް ވަންދެން މަސައްކަތް ކުރައްވާފައިވާ ފަސްޓްލޭޑީ ވިދާޅުވި އެވެ.
ޓައިނީ ހާޓްސް އިން ބުނި ގޮތުގައި ޣާޒީ ސްކޫލުގައި ޕައިލެޓް ޕްރޮޖެކްޓް ފެށީ ވޯލްޑް ހާޓް ފެޑެރޭޝަންގެ ހިލޭ އެހީގެ ދަށުންނެވެ. އަޖުމަ ބެލުމަށް މިވަގުތު ޣާޒީ ސްކޫލުގައި އެކަނި ކްރޮޑޯ އެކްޓިވިޓީ ހުއްޓަސް ކުރިއަށް އޮތް ތަނުގައި ރާއްޖޭގެ ހުރިހާ ސްކޫލެއްގައި އެފަދަ ތަންތަން ހަދާނެ ކަމަށް ވިދާޅުވި އެވެ.
ކޮރިޑޯ އެކްޓިވިޓީސްގެ ތެރޭގައި، އެއް ކުރެހުމުން އަނެއް ކުރެހުމަށް ފުންމަމުން ފުރިހަމަކުރެވޭ ހަރަކާތްތައް ހިމެނެ އެވެ.
އެ ޖަމިއްޔާ އިން ބުނި ގޮތުގައި، ރާއްޖޭގައި މަރުވާ މީހުންގެ 84 ޕަސެންޓަކީ ގައިންގަޔަށް ނާރާ ބަލިތަކުގައި މަރުވާ މީހުންނެވެ. އޭގެ ތެރެއިން އެންމެ ގިނައީ ހިތާއި ލޭނާރުތަކަށް ޖެހޭ ބަލިތަކުގައި މަރުވާ މީހުންނެވެ.
ޓައިނީ ހާޓްސް އިން ބަލަހައްޓާ، އުފެދުމުގައި ހިތުގެ އުނިކަން ހުންނަ ކުދިންގެ ދަފްތަރުގައި މިހާތަނަށް 585 ކުއްޖަކު ރަޖިސްޓްރީކޮށްފައިވާ ކަމަށް ބުންޏެވެ.
މިއަދު ފާހަގަކުރާ ބައިނަލްއަގުވާމީ ހިތުގެ ދުވަހުގެ މި އަހަރުގެ ޝިއާރަކީ "އަހަރެންގެ ހިތް، ތިބާގެ ހިތް- ދުޅަހެޔޮ ހިތަކަށް ވައުދުވަމާ" މި އެވެ. ބައިނަލްއަގުވާމީ ފެންވަރުގައި ހިތުގެ ދުވަސް ރާއްޖޭގައި ވެސް ފާހަގަކުރަނީ ހިތުގެ ބަލިތަކަށް އާންމުން ހޭލުންތެރިކުރުވުމަށެވެ.