ދިވެހި ޑިވެލޮޕަރުންތަކެއް އުފައްދާފައިވާ ލޮޓީފައިލްސް ޕްލެޓްފޯމްގެ ބޭނުންތެރިކަމާއި މަގްބޫލުކަން ބޮޑުވެ ލިބުނު ބާރު ކުރިއެރުމާ އެކު ލޮޓީފައިލްސް ކުންފުނީގައި މައިކްރޮސޮފްޓުން އިންވެސްޓްކޮށްފި އެވެ.
ބޮޑު ބައި މައިކްރޮސޮފްޓްގެ ވެންޗާ ފަންޑު އެމް12 އިން ދީގެން ލޮޓީފައިލްސް އިން ނުވަ މިލިއަން ޑޮލަރުގެ ފަންޑިން ކަށަވަރުކުރިކަން އިއުލާންކުރީ މިއަދެވެ. އޭގެ ތެރޭގައި "500 ސްޓާޓްއަޕްސް"ގެ ހިއްސާއެއް ވެސް ހިމެނެ އެވެ.
ލޮޓީފައިލްސް 2017ގައި ލޯންޗުކުރުމަކީ ދުނިޔޭގެ ޑިޒައިން އިންޑަސްޓްރީ އަށް އައި އިންގިލާބެކެވެ. އެނިމޭޝަން ހެދުމަކީ އެ ދާއިރާގެ ހުނަރުވެރިން ކުރާ އެންމެ އުނދަގޫ އަދި އެންމެ ގިނަ ވަގުތު ނަގާ އެއް މަސައްކަތެކެވެ. ލޮޓީފައިލްސްއާ އެކު ޑިޒައިނަރުންނަށާއި ޑިވެލޮޕަރުންނަށް ފަހިވީ, އެއާބީއެންބީގައި މަސައްކަތްކުރަމުން ދިޔަ ބަޔަކު މޮބައިލް އެޕްލިކޭޝަންތަކުގައި ބޭނުންކުރެވޭ ގޮތް ހަދައި އާއްމުކޮށް ދޫކޮށްލި "ލޮޓީ" ފޯމެޓް ބޭނުންކޮށްގެން ކުޑަކުޑަ ފައިލް ސައިޒަކަށް މަތީ ކޮލިޓީގެ އިންޓްރެކްޓިވް އެނިމޭޝަންތައް ނިކަން އަވަހަށް ތައްޔާރުކޮށްލެވޭނެ މަގެވެ.
އެއާ އެކު ލޮޓީފައިލްސްއަކީ ދުނިޔޭގެ އެތައް ހާސް ކުންފުންޏަކުން އެ މީހުންގެ ޕްރޮޑަކްޓްތަކަށް މޯޝަން ގްރެފިކްސް ހަދަން ބޭނުންކުރާ ޕްލެޓްފޯމަކަށް ވެ, އިންވެސްޓަރުންގެ ޝައުގުވެރިކަން ލިބެން ފެށި އެވެ.
އެޑޯބީއަކީ ވެސް ލޮޓީފައިލްސްގެ އިންވެސްޓަރެކެވެ. އާ ފަންޑިންއާ އެކު މިހާތަނަށް ޖުމްލަ 10 މިލިއަން ޑޮލަރު ލިބިފައިވާ ކަމަށް ލޮޓީފައިލްސް އިން ބުންޏެވެ.
ދިވެހި ޑިވެލޮޕަރުންތަކެއް ގުޅިގެން ލޮޓީފައިލްސް ޕްލެޓްފޯމް އުފަންކުރީ ލޮޓީ ފޯމެޓް ބޭނުންކޮށްގެން ތައްޔާރުކުރާ އެނިމޭޝަންތައް ޓެސްޓުކޮށް، ފުރިހަމަކޮށްލަން ބޭނުންކުރެވޭނެ މުޅިން އާ ހިދުމަތެއްގެ ގޮތުގަ އެވެ. މެލޭޝިއާ އާއި ރާއްޖޭގައި ތިބެގެން ލޮޓީފައިލްސް ކުންފުނީގައި ގިނަ އަދަދެއްގެ ދިވެހި މުވައްޒަފުން މަސައްކަތް ވެސް ކުރެ އެވެ.
ލޮޓީފައިލްސްގެ އެއް ކޯ-ފައުންޑަރު އަދި ޗީފް ޓެކްނޮލޮޖީ އޮފިސަރު (ސީޓީއޯ) ނަސްރުﷲ އަދުނާން (ނައްޓު) ވިދާޅުވިގޮތުގައި ލޮޓީފައިލްސް އިން މަސައްކަތްކުރަމުން އަންނަނީ ލޮޓީ އަކީ, ޖޭޕެގް އަދި އެމްޕީ3 ފަދަ ފޯމެޓްތަކެކޭ އެއްގޮތަށް, މުޅި ދުނިޔޭގައި އެންމެން ހުރިހާ އެއްޗެއްގައި ވެސް އާއްމުކޮށް ބޭނުންކުރާ ފޯމެޓަކަށް ހެދުމަށެވެ.
އަލަށް ލިބުނު ފަންޑިން ބޭނުންކުރާނީ ލޮޓީފައިލްސްގެ ހިދުމަތްތައް ފުޅާކޮށް މިހާރަށް ވުރެ ވެސް ގިނަ މީހުން ބޭނުންކުރާ ޕްލެޓްފޯމަކަށް ހަދަން ކަމަށް ލޮޓީފައިލްސް އިން ބުންޏެވެ.
"އަހަރެމެން ބިނާކުރަމުން މި ދަނީ އެންމެ ޕްރޮޑަކްޓެއްގެ ބަދަލުގައި ބޮޑު އީކޯސިސްޓަމެއް އަދި ބޮޑު ކޮމިއުނިޓީއެއް," ނައްޓު "މިހާރު" އަށް ވިދާޅުވި އެވެ.
އާ ފަންޑިންއާ އެކު ގިނަ ބަޔަކު އަންނަނީ ލޮޓީފައިލްސް އަށާއި އެ ޕްލެޓްފޯމްގެ ފަހަތުގައި ތިބި ހުނަރުވެރިންނަށް މަރުހަބާ ކިޔަމުންނެވެ. އޭގެ ތެރޭގައި ރައީސް އިބްރާހީމް މުހައްމަދު ސޯލިހު ވެސް ހިމެނިވަޑައިގަންނަވަ އެވެ. އެ މަނިކުފާނު ވިދާޅުވީ ލޮޓީފައިލްސްގެ ކާމިޔާބީގެ ފަހަތުގައި ވަނީ ދިވެހިންގެ އީޖާދެއް ކަމަށް ވާތީ ވަރަށް ބޮޑަށް ފަޚުރުވެރިވެވަޑައިގަންނަވާ ކަމަށެވެ.
އިކޮނޮމިކް މިނިސްޓަރު ފައްޔާޒު އިސްމާއީލް ވެސް ޓްވީޓެއް ކުރައްވައި އެއީ ފަޚުރުވެރިވާ ކާމިޔާބީއެއް ކަމަށް ވިދާޅުވި އެވެ.
އަލަށް ނުވަ މިލިއަން ޑޮލަރުގެ އިންވެސްޓްމެންޓް ލިބުނުކަން އިއުލާންކޮށް ލޮޓީފައިލްސް އިން ނެރުނު ބަޔާނެއްގައި އެ ކުންފުނީގެ ކޯ-ފައުންޑަރު އަދި ސީއީއޯ ޝިތިޖު މިންގްލާނީ ވިދާޅުވިގޮތުގައި ލޮޓީފައިލްސް އިން ޑިޒައިނަރުންނާއި ޑިވެލޮޕަރުންނަށް އެހީތެރިވެދެނީ, ދަސްކުރަން މާ ގިނަ ވަގުތުތަކެއް ހޭދަނުކޮށް, އެ މީހުންގެ ޕްރޮޑަކްޓްތަކަށް މީހުންގެ ހިތް ލަންބުވާނެ އިންޓްރެކްޓިވް އެނިމޭޝަންތައް ހަދާށެވެ.
ދުނިޔޭގެ 65,000 އަށް ވުރެ ގިނަ ކުންފުނިން މިހާރު ލޮޓީފައިލްސް ބޭނުންކުރެ އެވެ. އޭގެ ތެރޭގައި ގޫގްލް, ޓިކްޓޮކް, ޑިޒްނީ, އޫބާ, އެމެޒޮން, ބީބީސީ އަދި ނެޓްފްލިކްސް ހިމެނެ އެވެ. އެ ކުންފުނިތަކުގައި ލޮޓީފައިލްސް ޕްލެޓްފޯމް ބޭނުންކުރާ މީހުން މިލިއަނަކަށް ވުރެ ގިނަ އެވެ.
ކޮލިޓީ ދަށް ޖިފް އެނިމޭޝަންތަކަށް ވުރެ މާ ޗާލުވެފައި ޖިފް ފައިލަކަށް ވުރެ 600 ޕަސެންޓް ކުޑަވުމާއި އިންޓްރެކްޓިވް ފޯމެޓަކަށް ވުން އަދި އެކި ޕްލެޓްފޯމްތަކުގައި މަސައްކަތްކުރުމަކީ ލޮޓީ މަގްބޫލުވި ސަބަބުތަކެވެ. އެ ފޯމެޓް ބޭނުންކުރަން ލޮޓީފައިލްސް އިން ގެނެސްދިން ލުޔާ އެކު, މިހާރު މީހުން އެންމެ ގިނައިން ޑައުންލޯޑްކުރާ ގިނަ އެޕްތަކުގެ އެނިމޭޝަންތައް ހަދާފައި ހުންނަނީ ލޮޓީންނެވެ.
"އަހަރެމެންގެ ސައިޓަށް ޑްރެގް އެންޑް ޑްރޮޕްކޮށްގެން ބަލައިލީމަ އެބަ ފެނޭ އެނިމޭޝަން ހުންނަ ގޮތް. ޝެއާ ވެސް ކުރެވޭ. ކުލަ ބަދަލުކޮށް, އަޕްޑޭޓްކޮށް މި ހުރިހާ ކަމެއް ކުރެވޭނެ. އެހެންވެގެން, ގޫގްލް ކަހަލަ ބޮޑެތި ކުންފުނިތަކުން އަހަރެމެން މި ބޭނުންކުރަނީ ޚިދުމަތެއްގެ ގޮތުގައި," ނައްޓު ވިދާޅުވި އެވެ.
"މިހާތަނަށް ލޮޓީއަކީ ކޯއްޗެއްކަން ނޭނގުނަސް, ލޮޓީއެއް ފެނިފައި ހުރެދާނެ. މިސާލަކަށް ޓްވިޓާގެ ހާޓް މިހާރު އެ ހުންނަނީ ލޮޓީން. ޓެލެގްރާމްގެ ހުރިހާ އެނިމޭޓެޑް ސްޓިކާތަކަކީ ލޮޓީ. ގާޑިއަން އާއި ނިއު ޔޯކް ޓައިމްސްގެ އިންފޯގްރެފިކްތަކުގައި ވެސް ލޮޓީ ބޭނުންކުރަން ފަށައިފި."
ލޮޓީފައިލްސްގެ ބަޔާނުގައި މައިކްރޮސޮފްޓުގެ އެމް12ގެ ޕާޓްނަރެއް ކަމަށްވާ އަބީ ކުމާރު ވިދާޅުވި ގޮތުގައި ލޮޓީފައިލްސް އިން އެޕްތަކާއި ވެބްސައިޓްތަކަށް ގެނެސްދީފައިވާ ހިތްފަސޭހަކަމަކީ ވަރުގަދަ ކުރިއެރުމެކެވެ. އެ ޕްލެޓްފޯމުން ޑިޒައިން އިންޑަސްޓްރީ ބަދަލުކޮށްލީ އެކަނި ނޫން ކަމަށާއި މޯޝަން ބޭނުންކުރުމުގެ ފުރުސަތު އަލަށް އެތައް ބަޔަކަށް ހޯދައިދީފައިވާ ކަމަށް ވެސް ކުމާރު ވިދާޅުވި އެވެ.
ލޮޓީފައިލްސްގައި ކުންފުނިތަކުން އެ މީހުންގެ ޕްރޮޑަކްޓްތަކަށް ޕްރައިވެޓްކޮށް ހަދާފައިވާ އެތައް މިލިއަން ފައިލެއްގެ އިތުރުން, ކޮންމެ މީހަކަށް ވެސް ހިލޭ ބޭނުންކުރެވޭ ގޮތަށް, ޑިޒައިނަރުންނާއި ޑިވެލޮޕަރުން ލޮޓީފައިލްސް އަށް އެތަކެއް ހާސް އެނިމޭޝަން އާއްމުކޮށް ދޫކޮށްލާފައި ވެސް އެބަހުއްޓެވެ. ލޮޓީފައިލްސް އިން ބުނިގޮތުގައި އެ ޕްލެޓްފޯމަށް ސިކުންތަކު އެވްރެޖުކޮށް 15 ލޮޓީ ފައިލް އަޕްލޯޑްކުރެ އެވެ.
ކޮވިޑްގެ ލޮކްޑައުން ތެރޭގައި ލޮޓީފައިލްސް އިން ވަނީ އެނިމޭޝަން ހަދާ މީހުންނަށް އެ މީހުންގެ މަސައްކަތް ވިއްކާލެވޭނެ އަދި ޕްރޮޖެކްޓްތައް ހޯދޭނެ މާކެޓްޕްލޭސްއެއް ތައާރަފްކޮށްފަ އެވެ. ލޮޓީފައިލްސް އިން ބުނި ގޮތުގައި އެނިމޭޝަން ވިއްކައިގެން ލިބޭ އެއްޗެއްގެ 70 ޕަސެންޓް ދެނީ އެ އެއްޗެއް ހެދި މީހަކަށެވެ.
ލޮޓީފައިލްސް އިން ބުނީ އެ ކުންފުނީގެ މައި ޕްލެޓްފޯމާއި ޓޫލްތަކުން މިހާތަނަށް އާމްދަނީއެއް ހޯދާފައި ނުވިޔަސް މި އަހަރު ފަހުކޮޅު އާމްދަނީ ހޯދަން ފަށާނެ ކަމަށެވެ. އިންގިލާބީ ފޯމެޓެއް އައިސް އިންޑަސްޓްރީއެއް އެއްކޮށް ބަދަލުކޮށްލުމަކީ މާ ގިނައިން ވާ ކަމެއް ނޫން ކަމަށާއި ކުރީކޮޅު އާމްދަނީ ހޯދަން ހަދައިގެން ލޮޓީ ބޭނުންކުރާ މިންވަރު މަދުވާން ބޭނުން ނުވީ ކަމަށް ލޮޓީފައިލްސް އިން ބުނެ އެވެ.
