މެންޗެސްޓާ ޔުނައިޓެޑް އަތުން ބަލިވުމުން ކުރިމަތިވި އުނދަގޫ ހާލަތުން ނަގަން އާސެނަލްގެ ކުޅުންތެރިންނާ އޭނާ ކުރީ ދެ ސުވާލެއް ކަމަށް އެ ޓީމުގެ ކޯޗު މިކަލް އާޓެޓާ ބުނެފި އެވެ.
އާދިއްތަ ދުވަހު ޔުނައިޓެޑް އަތުން އަމިއްލަ ދަނޑުގައި އާސެނަލް އަށް ކުރިމަތިވި ބައްޔާ އެކު އެ ޓީމަށް ވަނީ އުނދަގޫ ހާލަތެއް ކުރިމަތިވެފަ އެވެ. އެންމެ ފަހުން ކުޅުނު ތިން މެޗުގައި އާސެނަލް އަށް ހޯދުނީ ދެ ޕޮއިންޓެވެ.
އެކަމަކު އެއްވަނައިގައި އާސެނަލް އަށް އަދިވެސް ހަތަރު ޕޮއިންޓްގެ ލީޑެއް އެބައޮތެވެ.
އާޓެޓާ ބުނީ ޔުނައިޓެޑްގެ މެޗަށް ފަހު ބޭއްވި ބައްދަލުވުމަކީ ކާމިޔާބު ބައްދަލުވުމެއް ކަމަށެވެ.
"ޔުނައިޓެޑްގެ މެޗަށް ފަހު ބޭއްވި ބައްދަލުވުމަށް ލިބުނު ތަރުހީބު ވަރަށް ރަނގަޅު. މިހާލަތުން ނަގަން އަހަރެމެން ދެ ސުވާލެއް ކުރަން ވަގުތު ހޭދަކުރިން،" އާޓެޓާ ބުންޏެވެ.
"އެއް ސުވާލަކީ: 'އަހަރެމެންނަށް އިހްސާސް ކުރެވެނީ ކިހިނެއް؟ އަހަރެން އަމިއްލަ ނަފްސަށް އިހްސާސް ކުރެވުނީ ކިހިނެއް ހެއްޔޭ؟ ދެން (ދެވަނަ ސުވާލަކީ) ކުރިއަށް އޮތް ހަތަރު މަސް ދުވަހު އަހަރެމެން ހޭދަކުރަން ބޭނުންވަނީ ކިހިނެއް ހެއްޔެވެ؟'"
އާޓެޓާ ބުނީ ކުޅުންތެރިން އެ ސުވާލުތަކަށް އިޖާބަ ދިން ގޮތް ވަރަށް ރަނގަޅު ކަމަށެވެ.
"އެއީ ވަރަށް ހިތްވަރު ލިބުނު ބައްދަލުވުމެއް އަދި ވަރަށް ކާމިޔާބު ބައްދަލުވުމެއް، ސަބަބަކީ އެ ބައްދަލުވުމުން މަގްސަދު ހާސިލު ކުރެވުނީ ވަރަށް ފަސޭހަކޮށް،" އޭނާ ބުންޏެވެ.
ހަތަރު މުބާރާތެއްގައި ވަރުގަދަ މަގާމެއްގައި ދެމިއޮތުމުގެ ހައްގު އަޅުގަނޑުމެންނަށް ލިބިފައި އެބައޮތް، ކުރިއަށް އޮތް ހަތަރު މަސް ދުވަހުގެ ތެރޭގައި އަހަރެމެން ވާދަކުރާނީ ކުރާނީ ބުރަ މަސައްކަތްކޮށްގެން ވަރަށް ހިތްވަރާ އެކު، ކާމިޔާބު ހޯދާނެ ކަމުގެ ޔަގީންކަމާ އެކު."
ޗެމްޕިއަންސް ލީގުގައި އާސެނަލުން މިރޭ ނުކުންނާނީ ކަޒަކިސްތާނުގެ އެފްސީ ކައިރާޗާ ދެކޮޅަށެވެ. ޗެމްޕިއަންސް ލީގުގައި ވެސް އާސެނަލް އޮތީ ލީގު ބުރުގެ އެއްވަނައިގަ އެވެ.