ކޯނަރުތަކުން ލިބުނު ފުރުސަތުތަކުގެ ބޭނުން ހިފައި، ޗެލްސީ އަތުން 2-1 އިން އާސެނަލް މޮޅުވި މެޗަށްފަހު، އެ ޓީމަށް މަލާމާތުގެ ގޮތުން ދީފައިވާ ވަނަން، "ސެޓްޕީސް އެފްސީ" ގެ ލަގަބު އުފަލާއެކު ބަލައިގަންނަ ކަމަށް ކޯޗު މީކޭލް އާޓެޓާ ބުނެފި އެވެ.
އާސެނަލްގެ އެމިރޭޓްސް ސްޓޭޑިއަމްގައި ރޭ ކުޅުނު މެޗުގައި ވިލިއަމް ސަލީބާ އަދި ޔޫރިއެން ޓިމްބާ ބޮލުން ޖެހި ލަނޑުތަކާއެކު އާސެނަލް ވަނީ ޕްރިމިއާ ލީގުގެ ތާވަލުގެ ކުރީގައި 5 ޕޮއިންޓްގެ ލީޑެއް ނަގާފައެވެ. މި ސީޒަނުގައި އާސެނަލް އިން މިހާތަނަށް ކޯނަރުތަކުން 16 ލަނޑު ޖަހާފައިވާއިރު، މިއީ ލީގުގެ ރެކޯޑަކާ އެއްވަރުގެ އަދަދެކެވެ.
މެޗުގެ ފުރަތަމަ ހާފު ނިމެން އުޅެނިކޮށް ޗެލްސީގެ ރީސް ޖޭމްސް ނެގި ކޯނަރެއް އާސެނަލްގެ ހިންކަޕީގެ ބޮލުގައި ޖެހި ބައިކޮޅަށް ވަދެ، ޗެލްސީން ނަތީޖާ އެއްވަރުކުރިއެވެ. ނަމަވެސް އާސެނަލްގެ ސެޓް ޕީސް ކޯޗު ނިކޮލަސް ޖޯވާގެ ރޭވުންތެރިކަމާއެކު އެ ޓީމުން ވަނީ އަލުން ލީޑު ނަގައި މެޗު ކާމިޔާބުކޮށްފައެވެ.
2004 ވަނަ އަހަރަށްފަހު ފުރަތަމަ ފަހަރަށް ލީގު ތަށި ހޯދުމަށް އާސެނަލް ކުރާ މަސައްކަތުގައި ސެޓް ޕީސްތަކަކީ އެ ޓީމުގެ އެންމެ ވަރުގަދަ ހަތިޔާރަށް ވަނީ ވެފައެވެ. ނަމަވެސް ބައެއް އެނަލިސްޓުން މިކަމާ އެކަމަށް ފާޑުކިޔަ އެވެ. ޗެލްސީގެ ކުރީގެ ފޯވާޑް ކްރިސް ސަޓަން ބުނިގޮތުގައި އާސެނަލް މޮޅުވަނީ "ހުތުރު" ކުޅުމެއް ކުޅެގެންނެވެ.
"އަނެއްކާވެސް ސެޓް ޕީސް އާސެނަލް. އަހަންނަށް ހީވަނީ އެމީހުން (ލީގު) ކާމިޔާބު ކުރާނެހެން،" ބީބީސީ ރޭޑިއޯ ފައިވް ލައިވްގައި ވާހަކަދައްކަމުން ސަޓަން ބުންޏެވެ.
"އެމީހުން ކާމިޔާބީގެ އިން ފަހަނައަޅައި ގޮސްފިނަމަ (ލީގު ހޯދައިފިނަމަ)، އެއީ ތާރީޚުގައި ޕްރިމިއާ ލީގު ކާމިޔާބުކުރާ އެންމެ ހުތުރުކޮށް (ރީތި ކުޅުމެއް ނުކުޅެ) ލީގު ހޯދާ ޓީމަށް ނުވާނެބާ؟ އެމީހުންގެ ފަރާތުން ރަނގަޅު ކުޅުމެއް ނުފެނުނު."
އެ ފާޑުކިޔުންތަކަށް ރައްދު ދެމުން އާޓެޓާ ބުނީ، ޕްރިމިއާ ލީގުގައި ސެޓް ޕީސްތަކުގެ މުހިންމުކަން ވަރަށް ބޮޑު ކަމަށާއި، އެފަދަ ފުރުސަތުތަކުން ލަނޑު ޖެހުމަކީ ލިބޭ ބޮޑު ކުރިއެރުމެއް ކަމަށެވެ.
"ސެޓް-ޕްލޭތަކުގައި ކުޅުންތެރިން އެކަކު އަނެކަކާ ގުޅިގެން ކުރާ މަސައްކަތުގެ މުހިންމުކަން އަހަރެމެންނަށް އެނގޭ. ސަބަބަކީ ޗެލްސީއަކީ އެފަދަ ފުރުސަތުތަކުގައި އެޓޭކް ކުރުމުގައި (އަދި) ދިފާއުކުރުމުގައި ވެސް ވަރަށް ވަރުގަދަ ޓީމަކަށް ވާތީ،" އާސެނަލްގެ ކޯޗު ބުންޏެވެ.
"ހަގީގަތަށް ބުނާނަމަ ހުރިހާ ޓީމެއްވެސް އެހެން. ޕްރިމިއާ ލީގުގައި ސެޓްޕީސްތަކުގެ ފެންވަރު ވަރަށް މަތި."
"މިއީ ވަރަށް މުހިންމު ކަމެއް. ދާދި ފަހުން ދުރުން އެއްލާ ބޯޅަތަކުގެ ސަބަބުން އަހަރެމެންނަށް ޕޮއިންޓްތަކެއް ގެއްލިފައިވޭ، އަދި ފަހަކަށް އައިސް ސެޓްޕީސްތަކުން މާ ގިނަ ލަނޑުތަކެއް ޖެހިފައެއް ނުވޭ. މިއަދު އަހަރެމެން އެކަން ކޮށްފިން. މިފަދަ ގޮތްގޮތަށް ލަނޑު ޖެހުމުގެ ފުރުސަތު އޮތުމަކީ ވަރަށް ބޮޑު ހިތްހަމަޖެހުމެއް."
މެޗުގެ ދެވަނަ ހާފުގައި ޗެލްސީގެ ޕެޑްރޯ ނެޓޯ އަށް ރަތް ކާޑު ދައްކާ އެއް ކުޅުންތެރިޔަކު މަދުކޮށް ކުޅުނު ޓީމު، ޗެލްސީގެ ކޯޗު ލިއަމް ރޮސީނިއާ ބުނީ ކޯނަރުތަކުން ދެ ލަނޑު ވަނުމަކީ ބަލައިގަނެވޭނެ ކަމެއް ނޫން ކަމަށެވެ. އާސެނަލް އަކީ ސެޓްޕީސްތަކުގައި މިހާރު ދުނިޔޭގެ އެންމެ ވަރުގަދަ ޓީމު ކަމަށް އޭނާ ބުންޏެވެ. - (އޭއެފްޕީ)