އަންނަ އަހަރުގެ މާޗްގައި އޮންނަ ކުރު އުމުރާގެ ދަތުރުގެ އަގު ހައްޖު ކޯޕަރޭޝަނުން ހެޔޮކޮށް، ފުރުސަތު ހުޅުވާލައިފި އެވެ.
ހައްޖު ކޯޕަރޭޝަނުން ބުނީ ސްކޫލު ޗުއްޓީއާ ދިމާކޮށް އޮންނަ 10 ދުވަހުގެ މި އުމުރާ އަށް ދާން ކުރިން ހަރަދު ކުރަން ޖެހޭނީ 25،900 ރުފިޔާ ނަމަވެސް މިހާރުގެ އަގަކީ 22،900 ރުފިޔާ ކަމަށެވެ.
އަދި ހަތަރު މީހުންގެ ގުރޫޕަކުން ދާ ކަމުގައި ވާނަމަ ހާއްސަ ޑިސްކައުންޓެއް ލިބޭނެ ކަމަށް ވެސް ހައްޖު ކޯޕަރޭޝަނުން ބުންޏެވެ. އެގޮތުން ހަތަރު މީހުންގެ ގުރޫޕެއް ނަމަ މީހަކަށް 1،000 ރުފިޔާގެ ޑިސްކައުންޓެއް ލިބޭއިރު 10 މީހުން ރަޖިސްޓަރީ ކޮށްދޭ ފަރާތަކަށް އުމުރާގެ އަގުގެ 50 ޕަސެންޓް ޑިސްކައުންޓް ލިބޭނެ ކަމަށް އެ ކޯޕަރޭޝަނުން ބުންޏެވެ. އޭގެ އިތުރުން ސްކޫލު ކުދިންނަށް ވެސް ހާއްސަ ޑިސްކައުންޓެއް ލިބެ އެވެ.
އުމުރާއަށް ދިޔުމަށް ރަޖިސްޓްރީކޮށް، ފައިސާ ދެއްކުމުގެ ފުރުސަތު މިހާރު ހުޅުވާލާފައިވާއިރު، އެކަމުގެ އެންމެ ފަހުގެ ތާރީހަކީ އަންނަ ޖެނުއަރީ 31 އެވެ. ރަޖިސްޓަރީ ކުރުމަށް ފޯމު ހުށަހަޅަން ޖެހެނީ ހައްޖު ކޯޕަރޭޝަނުގެ އޮފީހަށާއި މޯލްޑިވްސް އިސްލާމިކް ބޭންކްގެ ބްރާންޗުތަކަށެވެ.
ހައްޖު ކޯޕަރޭޝަނުން ބުނީ ފޯމާއެކު މަދުވެގެން 5،000 ރުފިޔާ ދައްކަން ޖެހޭނެ ކަމަށާއި ބާކީ ފައިސާ، އަންނަ ޖެނުއަރީ މަސް ނިމުމުގެ ކުރިން، ބައި ބަޔަށް ބަހާލައިގެން ވެސް ދެއްކި ދާނެ ކަމަށެވެ.
އުމުރާ ދަތުރުގެ މި ޕެކޭޖުގައި ސައުދީ އަރަބިއްޔާގެ ދެކޮޅު ޓިކެޓާއި އުމުރާ ކުރުމަށް އެހީތެރިކަން ފޯރުކޮށްދިނުމާއި ދެ އުމުރާ ކުރުމުގެ ފުރުސަތާއި 10 ދުވަހުގެ ހުރުމާއި ކެއުމާއި މައްކާ އާއި މަދީނާގެ ބަސް ދަތުރުގެ އިތުރުން އެހެން ހިދުމަތްތައް ވެސް ހިމެނެ އެވެ.
މި ޕެކޭޖުގެ އިތުުރުން، ހައްޖު ކޯޕަރޭޝަނުން ވަނީ އަންނަ އަހަރުގެ ރޯދަ މަހަށް ހާއްސަ އުމުރާ ޕެކޭޖެއް ތައާރަފްކޮށްފަ އެވެ. ރޯދަ މަހުގެ ފަހު 15އިގައި ކުރާ މި ދަތުރުގެ އަގު 39،965 ރުފިޔާ އަށް އަރާއިރު ރަޖިސްޓްރީ ކުރުމާއި ފައިސާ ދެއްކުމުގެ ފުރުސަތު އޭޕްރީލް މަހުގެ ނިޔަލަށް ވަނީ ހުޅުވާލައިފަ އެވެ.