އަހަރުގެ ކޮންމެ ދުވަސްވަރެއްގައި ވެސް ދެވޭ ގޮތަށް މޯލްޑިވްސް ހައްޖު ކޯޕަރޭޝަނުން "ކުރު އުމްރާ" ޕެކޭޖެއް އިއްޔެ ތައާރަފުކޮށްފި އެވެ.
ހައްޖު ކޯޕަރޭޝަންގެ ވެބްސައިޓުގައި ބުނީ ހައްޖު މޫސުން ފިޔަވައި، އަހަރުގެ ކޮންމެ ދުވަސްވަރެއްގައި ވެސް އުމްރާ ކުރެވޭނެ "ކުރު އުމްރާ" ޕެކޭޖެއް މިހާރު ތައާރަފު ކޮށްފައިވާ ކަމަށެވެ.
އެއީ، އަހަރުގެ ތެރޭގައި ލިބޭ ކުރު ޗުއްޓީއެއް ނުވަތަ އެ ނޫން ވެސް ދުވަސްވަރެއްގައި އާއިލާ އާއި ރަހުމަތްތެރިން ނުވަތަ އެކަނި އުމްރާ ކުރުމަށް ފަސޭހަ އިންތިޒާމުތަކަކާ އެކު، ތައާރަފު ކުރި ޕެކޭޖެއް ކަމަށް އެ ކޯޕަރޭޝަނުން ބުންޏެވެ.
އެ ޕެކޭޖުގެ ދަށުން ދަތުރުކުރާނެ ދުވަސް އިހުތިޔާރު ކުރާނީ އެ މީހަކު އަމިއްލަ އަށް ކަަމަށާއި އުމްރާ އަށް ފުރާނެ ދުވަހާއި އެނބުރި އަންނަން ބޭނުންވާ ދުވަހާއި ބޭނުންވާ ފްލައިޓާއި ހުންނަން ބޭނުންވާ ހޮޓަލާއި ސައުދީގައި ދަތުރު ކުރާނެ އުޅަނދާއި ޒިޔާރަތްކުރަން ބޭނުންވާ ތަންތަން ވެސް ހިޔާރު ކުރާނީ އަމިއްލަ އަށް ކަމަށް ހައްޖު ކޯޕަރޭޝަނުން ބުންޏެވެ.
އެ ކޯޕަރޭޝަނުން ބުނި ގޮތުގައި، އެއީ ބިޒީކޮށް އުޅޭ މީހުންނަށް ލިބޭ ކުރު ޗުއްޓީއެއްގައި އުމްރާގެ މަތިވެރި އަޅުކަން އަދާކުރަން ތައާރަފުކުރި ހާއްސަ ޕެކޭޖެކެވެ.
ޕެކޭޖުގެ ތަފްސީލު
- ވިޔަފާރި ދަތުރުތަކާ ގުޅުވައިގެން އުމްރާ ދަތުރުތައް ކުރަން ބޭނުންވާ މީހުންނަށް ވެސް ހާއްސަ ޕެކޭޖެއް ހިމެނޭ. އުމްރާގެ އަޅުކަމަށް ފަހު ދުބާއީ ކަހަލަ ގައުމަކަށް ވިޔަފާރިކުރަން ދިއުމަށް ވިސާ ހަމަޖައްސައިދޭނެ.
- އުމްރާއަށް ދިޔުމަށް ދަތުރުކުރާނެ ފްލައިޓެއް އަމިއްލައަށް އިހުތިޔާރުކޮށް، ފްލައިޓުގައި ދަތުރުކުރާނެ ކްލާސް އިހުތިޔާރުކުރުމުގެ ފުރުސަތު ދޭނެ.
- އުމްރާގެ އަޅުކަން އަދާކުރަން ސައުދީ އަރަބިއްޔާގައި ހުންނާނެ ހޮޓަލާއި ހޮޓަލުގެ ފެންވަރާއި ހޮޓާ ހިފަން ބޭނުންވާ ސަރަހައްދު ވެސް އަމިއްލައަށް އިހުތިޔާރު ކުރެވޭނެ.
- އެ މީހެއްގެ ފުދުންތެރިކަމާ (ނުވަތަ ބަޖެޓާ) އެކަށީގެންވާ ރޭޓެއްގެ އުޅަނދުތަކެއްގައި ސައުދި އަރަބިއްޔާގައި ދަތުރުކުރުމުގެ އިންތިޒާމުތައް ހަމަޖައްސައިދޭނެ. ދަތުރުކުރަން ބޭނުންވަނީ ކޮން ކަހަލަ އުޅަނދެއްގައި ކަމާއި އުޅަނދުގެ ފެންވަރު ވެސް ކަނޑައެޅޭނެ.
- އެކަނި އުމްރާ ކުރަން ބޭނުންވާ މީހުންނާއި އާއިލާގެ މެންބަރުން އެކުގައި އުމްރާކުރަން ބޭނުންވާ މީހުންނާއި ވަކި ގުރޫޕެއްގެ ގޮތުގައި އުމްރާ ކުރަން ބޭނުންވާ މީހުން ބޭނުންވާ ގޮތްގޮތަށް ދަތުރުގެ އިންތިޒާމުތައް ހަމަޖައްސައިދޭނެ.
- އެންމެ ބަލައިލަން ބޭނުންވާ ނުވަތަ އެތަނަކަށް ޒިޔާރަތް ކޮށްލަން ބޭނުންވާ ހާއްސަ ތަނެއް ހުރި ނަމަ އެ ތަންތަނަށް އެ މީހަކަށް އެންމެ ފަސޭހަ ގަޑިތަކެއްގައި ދެވޭނެ އިންތިޒާމު ހަމަޖައްސައިދޭނެ.
- ގުރޫޕުތަކާ ނުގުޅި، އެ މީހަކު ބޭނުން ގަޑިއެއްގައި ފަސޭހަ ގޮތަކަށް އުމްރާގެ އިންތިޒާމުތައް ހަމަޖައްސައިދޭނެ. ޒިޔާރަތް ކުރަން ބޭނުންވާ ތަންތަނަށް އެކަނި ދިޔުމާއި އުމްރާ ކުރަން ބޭނުން ގަޑިތަކުގައި އުމްރާ ކުރެވޭނެ އިންތިޒާމު ވެސް ހަމަޖައްސައިދޭނެ.
ހައްޖު ކޯޕަރޭޝަނުން ބުނީ އެ ޕެކޭޖުގެ ދަށުން އުމްރާ ދަތުރުގައި އެ މީހަކު އިހުތިޔާރު ކުރާ ކަމަކަށް ފައިސާ ދެއްކުމުގެ ފުރުސަތު އޮންނާނެ ކަމަށެވެ. ޒިޔާރަތް ދަތުރުތަކާއި އެހެނިހެން ދަތުރުތައް ކުރަން ބޭނުން ނަމަ އެ ކަމަކަށް ވެސް ފައިސާ ދެއްކުމުގެ ފުރުސަތު އޮންނާނެ ކަމަށް އެ ކޯޕަރޭޝަނުން ބުންޏެވެ.
"އުމްރާއަށް ދާން ގަސްދުކުރާ ހިސާބުން ފެށިގެން ދަތުރުގެ ފެށުމާ ހަމައަށް ހުރިހާ އިރުޝާދެއް އަޅުގަނޑުމެން ދޭނަމެވެ. އަދި އޮޅުން ފިލުވަން ބޭނުންވާ ކަންކަން އޮޅުންފިލުވައިދީ، ދަތުރާ ގުޅޭ ފަންނީ ތަޖުރިބާ އާއި އެހީތެރިކަމާ ލަފާ ދޭނެ އެވެ،" ހައްޖު ކޯޕަރޭޝަނުން ބުންޏެވެ.
