މެދުއިރުމަތީގައި ހިނގަމުންދާ ހަނގުރާމައާ ގުޅިގެން އަނބުރާ ގައުމަށް ނުދެވި ރާއްޖޭގައި ތާށިވި ފަސިންޖަރުން ގެންދިއުމަށް މިހާތަނަށް ހާއްސަ 8 ފްލައިޓެއް ބާއްވައިފި އެވެ.
ވިޒިޓް މޯލްޑިވްސް ކޯޕަރޭޝަން (ވީއެމްސީ)ގެ ވެބްސައިޓުގައި އިއްޔެ ބުނީ ދުނިޔޭގެ ވައިގެ ދަތުރުފަތުރުގެ ނިޒާމަށް ކުރިމަތިވެފައިވާ ގޮންޖެހުންތަކާ ގުޅިގެން، އެ ކޯޕަރޭޝަނާއި ކަމާބެހޭ މިނިސްޓްރީތަކާއި ސިނާއަތުގެ ހިއްސާދާރުންނާ ގުޅިގެން ފުރިހަމަ އިޖާބީ ހަރަކާތްތަކެއް ފަށާފައިވާ ކަމަށެވެ.
ފްލައިޓްތައް ކެންސަލްވުމުގެ ސަބަބުން ދަތުރުވެރިންނަށް ދިމާވަމުންދާ ދަތިތަކާއި ކަންބޮޑުވުންތައް ބަލައިގަނެ، އެންމެ އިސްކަމެއް ދެނީ ޓޫރިސްޓުންގެ ރައްކާތެރިކަމަށާއި ރާއްޖޭގެ ޓޫރިޒަމް ދެމެހެއްޓުމަށް ކަމަށް ވީއެމްސީން ބުންޏެވެ.
މިހާތަނަށް އަޅާފައިވާ މުހިންމު ފިޔަވަޅުތައް
- މިއަދާ ހަމައަށް ޖުމްލަ 8 ރިޕެޓްރިއޭޝަން ފްލައިޓެއް ނުވަތަ ތާށިވި ފަސިންޖަރުން އަނބުރާ ގައުމަށް ގެންދިއުމަށް ފްލައިޓްތައް ވަނީ ބާއްވާފައި. އޭގެ ތެރޭގައި ޖަރުމަނާއި ފްރާންސަށް ހާއްސަ ކޮށްގެން ބޭއްވި ފްލައިޓްތައް ހިމެނޭ
- އެމްއޭސީއެލް އާއި ޓޫރިޒަމް މިނިސްޓްރީ ގުޅިގެން ވެލާނާ އިންޓަނޭޝަނަލް އެއާޕޯޓުގައި ހާއްސަ އެހީތެރިކަން ފޯރުކޮށްދޭނެ ހެލްޕް ޑެސްކެއް ގާއިމްކޮށްފައިވޭ
- ކުރިއަށް އޮތް ހަފުތާތަކުގައި ފްލައިޓްތައް އިތުރުކުރުމަށާއި ދަތުރުފަތުރުގެ ފުރުސަތުތައް ފަހިކުރުމަށް އެކި އެއާލައިންތަކާ އެކު އަންނަނީ މަޝްވަރާކުރަމުން.
ވީއެމްސީން ވަނީ ރާއްޖެއަށް ޓޫރިސްޓުން އަންނަ މިންވަރު ދަށްވިޔަނުދިނުމަށް ދަތުރުފަތުރުގެ ދަތިކަން ކުޑަ މާކެޓްތަކަށް އަމާޒުކޮށްގެން ޖޮއިންޓް މާކެޓިން ކެމްޕޭންތަކެއް ފެށުމަށް ގޮވާލައިފަ އެވެ. އޭގެ ތެރޭގައި ހިމެނެނީ އިންޑިއާ، ޗައިނާ، ރަޝިއާ އަދި އޭޝިއާގެ އެހެނިހެން ސަރަހައްދުތަކެވެ.
މީގެ އިތުރުން، ދިގު މުއްދަތަކަށް އަމާޒުކޮށްގެން "ކްރައިސިސް ރެސްޕޮންސް ސްޓްރެޓެޖީ"އެއް އެކުލަވާލުމުގެ މަސައްކަތް ވެސް ކުރަމުން އަންނަ ކަމަށާއި އެކަމާ ގުޅޭ ގޮތުން ސިނާއަތުގެ ހުރިހާ ހިއްސާދާރުންނާ ބައްދަލުކޮށް، ހިޔާލު ބަދަލުކުރުމަށް ހަމަޖެހިފައިވާ ކަމަށް ވީއެމްސީން ބުންޏެވެ.
އީރާނަށް އިޒްރޭލާއި އެމެރިކާއިން މިދިޔަ ހަފުތާގެ ހޮނިހިރު ދުވަހު ދޭން ފެށި ހަމަލާތަކުގެ ރައްދުގައި އީރާނުން ވަނީ މެދުއިރުމަތީގެ އެކި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާ ދީފަ އެވެ. އަދި އެމެރިކާގެ ހަމަލާތަކުގައި އީރާންގެ ލީޑަރު އާޔަތުﷲ އަލީ ހާމަނާއީ ވަނީ އަވަހާރަވެފަ އެވެ.
އެ ހަމަލާތަކާ ގުޅިގެން ގަލްފުގެ ގައުމުތަކުގެ ވައިގެ ސަރަހައްދު ބަންދުކުރުމުން، ރާއްޖެއަށް ދަތުރުކުރާ ގިނަ އެއާލައިންތަކުގެ ފްލައިޓްތައް ކެންސަލްވެ ވެލާނާ އިންޓަނޭޝަނަލް އެއާޕޯޓުގައި ވެސް ގިނަ ޓޫރިސްޓުންތަކެއް ވަނީ ނުފުރި ތާށިވެފަ އެވެ.