ގިރާވަރުފަޅުގެ ޕްލޭނަށް ގެނައި ބަދަލާ އެކު ގުރުނެގުން ކުރިއަށް

ގިރާވަރުފަޅުގެ ލޭންޑް ޔޫސް ޕްލޭން ބަދަލުކޮށް، އާ ލޭންޑް ޔޫސް ޕްލޭނާ އެއްގޮތަށް ގިރާވަރުފަޅުން ގޯތި ލިބުނު މީހުންގެ މެދުގައި ގުރުއަތު ނަގަން މިއަދު ފަށައިފި އެވެ.

ކުރިން ހަދާފައިވާ، ގިރާވަރުފަޅުގެ ލޭންޑް ޔޫސް ޕްލޭންގައިވާ ގޮތުން އެ ތަނުން ދޫކުރަން ނިންމި 610 ގޯތި މަދުވާތީ އާ ލޭންޑް ޔޫސް ޕްލޭނެއް ހައުސިން މިނިސްޓްރީން ވަނީ ތައްޔާރު ކޮށްފަ އެވެ. އާ ޕްލޭނާ އެކު އެފަޅުން 4،072 ގޯތި ދޫކުރާނެ އެވެ.

ގިރާވަރުފަޅުން 264.3 ހެކްޓަރުގެ ބިން ހިއްކަން ނިންމާފައިވާއިރު، މި ސަރުކާރުން ވަނީ ތަނުގެ ލޭންޑް ޔޫސް ޕްލޭން ބަދަލުކޮށް، އިތުރަށް ހިއްކަން ނިންމައިފަ އެވެ.

ގިރާވަރުފަޅުން ހިއްކަންޖެހޭ ޖުމުލަ 167.15 ހެކްޓަރުގެ ތެރެއިން ބާކީ ނުހިއްކާ އޮތް 97.15 ހެކްޓަރުގެ ބިން ހިއްކުމުގެ މަސައްކަތް އެމްއޭސީއެލުން އިއްޔެ ވަނީ ފަށައިފަ އެވެ. 

އެ ބަދަލާއެކު، ގިރާވަރުފަޅުން ގޯތި ލިބިފައިވާ މީހުންނަށް ކަނޑައަޅާފައިވާ ބިމުގެ ސަރަހައްދުތަކަށް ބަދަލު އައިސް، އާ ލޮޓް ނަމްބަރު ތަކެއް ވެސް ވަނީ ކަނޑައަޅައިފަ އެވެ. އަދި މިއަދު ހެނދުނު 9:30 ގައި ވަނީ ގުރު ނެގުން ފަށައިފަ އެވެ.

ހައުސިން މިނިސްޓްރީން ބުނީ އެ ބަދަލާ އެކު، ގިރާވަރު ފަޅުން ގޯތި ލިބޭ މީހުންނަށް ލިބޭ ޕްލޮޓްގެ ގުރުއަތުލުމުގެ ކަންކަން ކުރިއަށް ގެންދާނީ އެކަމަށް އެ މިނިސްޓްރީން ކަނޑައަޅާފައިވާ މުވައްޒަފުން ކަމަށެވެ.

މިނިސްޓްރީން ބުނީ ގިރާވަރުފަޅުން ގޯތި ލިބިފައިވާ މީހުންގެ މެދުގައި ގުރު ނަގަމުންދާ ވަރަކުން، އެކަމަށް ގާއިމްކޮށްފައިވާ ހާއްސަ ލިންކު މެދުވެރިކޮށް ބަލައިލެވޭނެ ކަމަށެވެ. 

ގޯތި ލިބޭ މީހުންގެ ގުރުއަތުލުން ނިމުމުން، ގޯތިތަކުގެ ރަޖިސްޓަރީ އާއި ބިން ލިބޭ މީހުންނާ އެކު ހަދަންޖެހޭ އެއްބަސްވުންތަކާ ގުޅޭ މައުލޫމާތު ހައުސިން މިނިސްޓްރީން ފަހުން އާންމު ކުރާނެ ކަމަށާއި ބިން ހިއްކާ ނިމުމުން، ގޯތި ލިބިފައިވާ މީހުންނާ ގޯތި ހަވާލުކުރުމުގެ މަސައްކަތް ކުރިއަށް ގެންދާނެ ކަމަށް ވެސް އެ މިނިސްޓްރީން ބުންޏެވެ.