ރައްޔިތުންގެ މަޖިލިސް ކުރިމަތީގައި އޮތް ބޮޑު ޕާކިން ޒޯން ބަންދުކޮށްފި އެވެ.
ދަރުމަވަންތަ ސްކޫލުގެ ކުރީގެ އިމާރާތް ހުރި ތަނުގައި ހެދި އެ ޕާކިން ޒޯނު ބޭނުންކުރަން ފެށީ 2020 ގަ އެވެ. އެއީ އޭރު މާލޭގައި ހުރި އެންމެ ބޮޑު އެއް ޕާކިން ޒޯނެވެ.
އޭރު އެތަން ތަރައްގީ ކޮށްފައިވަނީ ސައިކަލާއި ހަތަރު ފުރޮޅުލީ އުޅަނދުތަކަށް ޕާކުކުރެވޭނެ ގޮތަށެވެ. އެތަނުގައި ސައިކަލަށް 246 ޖާގަ އަދި ހަތަރު ފުރޮޅުލީ 12 ވެހިކަލަށް ޕާކު ކުރެވެ އެވެ. ނަމަވެސް އެ ޕާކިން ޒޯނު ބަންދުކޮށް އެތަނުގެ ވަށައިގެން މިދިޔަ ހަފްތާގައި ވަނީ ޓިނު ޖަހައިފަ އެވެ.
އެނގިފައިވާ ގޮތުގައި އެ ޕާކިން ޒޯން ބަންދުކުރީ އެ ބިން ހިމެނޭ ގޮތަށް ދަރުމަވަންތަ ސްކޫލު ކުރީގައި ހުރި އިމާރާތް ތަޅާލުމަށްފަހު އެތަނުގައި މަޖީދިއްޔާ ސްކޫލުގެ އާ އިމާރާތް އެޅުމުގެ މަސައްކަތް ކުރުމަށެވެ.
ޕާކިން ޒޯނެއް އެތަނުގައި ހަދާފައި އޮތަސް މާލޭ ސިޓީ ކައުންސިލުން ބުނީ އެ ބިމަކީ މަޖީދިއްޔާ ސްކޫލުގެ ބިމެއް ކަމަށެވެ.
ގިނަ އަދަދެއްގެ ސަރުކާރުގެ އޮފީސްތައް ވެސް ހުންނަ އެ ސަރަހައްދުގެ ޕާކިން ޒޯނު ބަންދު ކުރިއިރު އެތަން އޭރު ތަރައްގީކޮށްފައި ވަނީ ވެލާނާގޭ ކައިރީގައި ޕާކިން ޖާގައިގެ ދަތި ކަމަށް ހައްލެއް ހޯދުމަށެވެ.