މީހުން ދިރިއުޅޭ އަދި ޓޫރިޒަމްގެ ވަސީލަތްތަކާއި އިގުތިސާދީ އެހެން ބައެއް މަސައްކަތްތައް ވެސް ކުރާ ގޮތަށް "ސަސްޓެއިނަބުލް ޓައުންޝިޕް" އެެއް ތަރައްގީ ކުރަން ސަރުކާރުން ފުރަތަމަ ފަހަރަށް ހުއްދަ ދިން ކްރިސްޓަލް ހޯލްޑިންސް އިން ނ. އަތޮޅުގައި ގާއިމްކުރާ ޓައުންޝިޕްގެ އަމަލީ މަސައްކަތް ރަސްމީކޮށް މިއަދު ފަށައިފި އެވެ.
ނ. އަތޮޅު ކުރަމާދޫ އާއި ދެކެނަންފަރާއި ދިގުފަރުގައި "އައިލާ މޯލްޑިވްސް" ގެ ނަމުގައި ހިންގާ އެ ޕްރޮޖެކްޓްގެ އަމަލީ މަސަައްކަތް ރަސްމީކޮށް ފަށްޓަވައިދެއްވީ ރައީސް ޑރ. މުހައްމަދު މުއިޒު އެވެ. އެ ސަރަހައްދުގައި ހިއްކާފައިވާ ބިމެއްގައި ބޭއްވި އެ ރަސްމިއްޔާތުގައި މިނިސްޓަރުންނާއި ރައްޔިތުންގެ މަޖިލީހުގެ މެންބަރުން ވެސް ބައިވެރިވެވަޑައިގެންނެވި އެވެ.
މިއަދުގެ ރަސްމިއްޔާތުގައި ކްރިސްޓަލް ހޯލްޑިންސްގެ ސީއީއޯ ޕެޓާ ކާސްޓިކް ވިދާޅުވީ އައިލާ މޯލްޑިވްސްއާ އެކު، ރާއްޖޭގައި އިންވެސްޓްމެންޓްގެ އާ ޒަމާނެއް ގެނެސްދޭނެ ކަމަށް ގަބޫލު ކުރައްވާ ކަމަށެވެ. ރާއްޖޭގައި ހިންގާ އެ ފަދަ ފުރަތަމަ ޕްރޮޖެކްޓަކީ އައީލާ މޯލްޑިވްސް އަށް ވީތީ ކްރިސްޓަލް ހޯލްޑިންސް އިން ފަހުރުވެރިވާ ކަމަށް ވެސް އޭނާ ވިދާޅުވި އެވެ.
އައިލާ މޯލްޑިވްސްގައި ގާއިމްކުރާނެ ވަސީލަތްތަކުގެ ތަފްސީލު ދެއްވަމުން ކާސްޓިކް ވިދާޅުވި ގޮތުގައި އެތަނުގައި ހޮސްޕިޓަލިޓީ އެކަޑަމީ އަކާއި އެންމެ މަތީ ފެންވަރުގެ މެޑިކަލް ފެސިލިޓީއެއް ހިމެނޭނެ އެވެ. ހޮސްޕިޓަލިޓީ އެކަޑަމީ ހިންގާނީ އެ ހިދުމަތް ރަނގަޅު ފެންވަރެއްގައި ދޭ ބަޔަކާ ގުޅިގެން ކަމަށް ވެސް އޭނާ ވިދާޅުވި އެވެ.
"މި ރަސްމިއްޔާތަށް ފަހު އިމާރާތްކުރުމުގެ މަސައްކަތް ދާނީ ކުރިއަށް. މުއްދަތަށް މަސައްކަތް ނިންމަން އަދި 2028 ވަނަ އަހަރުގެ ހޫނުމޫސުމުގައި އައިލާ މޯލްޑިވްސް ގައި ހުޅުވަން އަޅުގަނޑުމެން ސާބިތުކަމާ އެކު މަސައްކަތް ކުރާނަން،" ޕެޓާ ކާސްޓިކް ވިދާޅުވި އެވެ.
ސްޕެޝަލް އިކޮނޮމިކް ޒޯން ގާނޫނަށް އެންމެ ފަހުން ގެނައި ބަދަލުގައި ތަސައްވުރު ކޮށްފައިވާ ގޮތަަށް ސަސްޓެއިނަބުލް ޓައުންޝިޕެއް ގާއިމްކުރަން ކްރިސްޓަލް ހޯލްޑިންގްސް އަށް ސަރުކާރުން ހުއްދަދިނީ 790 މިލިއަން ޑޮލަރު އިންވެސްޓްކުރާ ގޮތަށެވެ.
ޕްރޮޖެކްޓް އައިލާގެ އަމަލީ މަސައްކަތް ފެށުމުގެ ރަސްމިއްޔާތުގައި ކްރިސްޓަލް ހޯލްޑިންގްސް އިން ދެއްކި ވީޑިއޯ ޕްރެޒެންޓޭޝަންގައިވާ ގޮތުން ދިގު މުއްދަތަކަށް މީހުންނަށް ދިރިއުޅެވޭ ރިއަލްއެސްޓޭޓް ވިޔަފާރީގެ ބައެއް އެ ޕްރޮޖެކްޓްގައި ހިމެނެ އެވެ. އެސްއީޒެޑް ގާނޫނުގައިވާ ގޮތަށް އެ ތަނުގައި ކަރަންޓްގެ 60 ޕަސެންޓް އުފައްދާނީ އިއާދަކުރަނިވި ހަކަތައިންނެވެ. އެ ތަނުގައި ޒަމާނީ ފެންވަރަަށް ދަނޑުވެރިކަން ކުރުމުގެ ވަސީލަތްތައް ވެސް ގާއިމްކުރާނެ ކަމަށް އެ ޕްރެޒެންޓޭޝަންގައި ބުންޏެވެ.
އެ ޕްރޮޖެކްޓް ފެށުމުގެ ރަސްމިއްޔާތުގައި އިކޮނޮމިކް މިނިސްޓަރު މުހައްމަދު ސައީދު ވިދާޅުވީ އައިލާ އަކީ ހަމަ އެކަނި އާ މަޝްރޫއެއް ނޫން ކަަމަށާއި އެއީ ރާއްޖޭގެ ޓޫރިޒަމާއި އިގުތިސާދު ބިނާކުރުމުގެ މުޅިން އާ ވިސްނުމެއް ކަމަށް ވެސް އޭނާ ވިދާޅުވި އެވެ.