މީހުން ދިރިއުޅޭ އަދި ޓޫރިޒަމްގެ ވަސީލަތްތަކާއި އިގުތިސާދީ އެހެން ބައެއް މަސައްކަތްތައް ވެސް ކުރެވޭ ގޮތަށް "ސަސްޓެއިނަބުލް ޓައުންޝިޕް" ތަރައްގީކުރަން ނ.އަތޮޅުގައި މިއަދު ފެށި މަޝްރޫއާއެކު ރާއްޖޭގެ ޓޫރިޒަމް މޮޑެލް ބަދަލުވާނެ ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.
ނ.ކުރަމާދޫ އާއި އެ ރަށުގެ ކައިރީގައި އޮންނަ ބޮޑު ދެ ފަޅު ކަމަށްވާ ދެކެނަންފަރާއި ދިގުފަރުގައި "އައިލާ މޯލްޑިވްސް"ގެ ނަމުގައި ގާއިމްކުރާ ޓައުންޝިޕްގެ އަމަލީ މަސައްކަތް ފަށަން މިއަދު ބޭއްވި ރަސްމިއްޔާތުގައި ސައީދު ވިދާޅުވީ ރާއްޖޭގެ ޓޫރިޒަމް މޮޑެލް ބަދަލު ކުރަނީ ޑިމާންޑާ އެއްވަރަށް ހިދުމަތް ދޭން ކަމަށެެވެ. އަދި ރާއްޖޭގެ "އައިކަނިކް" ރިސޯޓްތަކާއި ގެސްޓްހައުސްތަކުގެ އިތުރުން "އައިލާ މޯލްޑިވްސް" ފަދަ ޕްރޮޖެކްޓްތަކުން، ރާއްޖެއަށް ޒިޔާރަތްކުރާ މީހުންނަށް ދޭ ހިދުމަތުގެ ފެންވަރު އިތުރަށް މަތިވާނެ ކަމަށް އޭނާ ވިދާޅުވި އެވެ.
"މި ބިންގަލުގެ މަތީގައި އަޅުގަނޑުމެން މި ބަދަލުކުރަނީ ޓޫރިޒަމް މޮޑެލް، ޑިމާންޑާ އެއްވަރަށް ހިދުމަތްދޭން. އަޅުގަނޑުމެންގެ ރިސޯޓްތަކުގެ މަޝްހޫރު ކަމާއި ގެސްޓްހައުސް ޓޫރިޒަމްގެ ކުރިއެރުންތަކާއެކު، އައިލާ ފަދަ ޕްރޮޖެކްޓްތަކުން ރާއްޖެއަށް ޒިޔާރަތްކުރާ މީހުންނަށް ލިބޭ ހިދުމަތުގެ ފެންވަރު މަތިވާނެ،" ސައީދު ވިދާޅުވި އެވެ.
ރާއްޖެއަށް ޒިޔާރަތްކުރާ މީހުންނަށް، އައިލާ މޯލްޑިވްސްއާ އެކު އަލަށް ލިބޭނެ ހިދުމަތްތަކަކީ ސައީދު ވިދާޅުވި ގޮތުގައި ސިއްހަތާއި ދުޅަހެޔޮ ކަމަށް ބޭނުންވާ ހިދުމަތްތަކާއި ތައުލީމާއި ދިގު މުއްދަތަކަށް ރާއްޖޭގައި ތިބުމުގެ ހިދުަމަތެވެ.
"މިގޮތަށް ކަންތައް ކުރީމާ ހަމައެކަނި ޗުއްޓީ ހޭދަކޮށްލަން އަންނަ ތަނަކަށް ވުރެ މަތީ ފެންވަރުގެ ތަނެއްގެ ގޮތުަގައި ރާއްޖެ ފެންނާނެ. ދިރިއުޅެ، އިންވެސްޓްކޮށް، ދިގުމުއްދަތުގައި ނަފާ ލިބޭ ތަނެއްގެ ގޮތުގައި ރާއްޖެ ބަލައިގަންނާނެ،"ސައީދު ވިދާޅުވި އެވެ.
ސައީދު ވިދާޅުވީ އައިލާއަކީ ހަމައެކަނި އާ މަޝްރޫއެއް ނޫން ކަަމަށާއި އެއީ ރާއްޖޭގެ ޓޫރިޒަމާއި އިގުތިސާދު ބިނާކުރުމުގެ މުޅިން އާ ވިސްނުމެއް ކަމަށް ވެސް އޭނާ ވިދާޅުވި އެވެ.
ކުރަމާދޫ އާއި ދެކެނަންފަރާއި ދިގުފަރުގައި "އައިލާ މޯލްޑިވްސް" ގެ ނަމުގައި ހިންގާ އެ ޕްރޮޖެކްޓްގެ އަމަލީ މަސަައްކަތް ރަސްމީކޮށް ފަށްޓަވައިދެއްވީ ރައީސް ޑރ. މުހައްމަދު މުއިއްޒެވެ. އެ ސަރަހައްދުގައި ހިއްކާފައިވާ ބިމެއްގައި ބޭއްވި އެ ރަސްމިއްޔާތުގައި މިނިސްޓަރުންނާއި ރައްޔިތުންގެ މަޖިލީހުގެ މެންބަރުން ވެސް ބައިވެރިވެވަޑައިގަތެވެ.
އެ ރަސްމިއްޔާތުގައި ކްރިސްޓަލް ހޯލްޑިންސްގެ ސީއީއޯ ޕެޓާ ކާސްޓިކް ވިދާޅުވީ އައިލާ މޯލްޑިވްސްއާއެކު، ރާއްޖޭގައި އިންވެސްޓްމެންޓްގެ އާ ޒަމާނެއް ގެނެވޭނެ ކަމަށެވެ. އަދި ރާއްޖޭގައި ހިންގާ އެފަދަ ފުރަތަމަ ޕްރޮޖެކްޓަކީ އައިލާ މޯލްޑިވްސްއަށް ވާތީ އެ ކުންފުނިން ފަހުރުވެރިވާ ކަމަށް ވެސް އޭނާ ވިދާޅުވި އެވެ.
އައިލާ މޯލްޑިވްސްގައި ގާއިމްކުރާނެ ވަސީލަތްތަކުގެ ތަފްސީލު ދެއްވަމުން ކާސްޓިކް ވިދާޅުވި ގޮތުގައި އެތަނުގައި ހޮސްޕިޓާލިޓީ އެކަޑަމީއަކާއި މަތީ ފެންވަރުގެ މެޑިކަލް ފެސިލިޓީއެއް ހުންނާނެ އެވެ. އަދި އެކަޑަމީ ހިންގާނީ އެ ހިދުމަތް ރަނގަޅު ފެންވަރެއްގައި ދޭ ބަޔަކާ ގުޅިގެން ކަމަށް އޭނާ ވިދާޅުވި އެވެ.
ސްޕެޝަލް އިކޮނޮމިކް ޒޯންގެ ގާނޫނަށް އެންމެފަހުން ގެނައި ބަދަލުތަކާ އެއްގޮތަށް ސަސްޓެއިނަބުލް ޓައުންޝިޕެއް ގާއިމްކުރަން ކްރިސްޓަލް ހޯލްޑިންގްސް އަށް ސަރުކާރުން ހުއްދަދިނީ 790 މިލިއަން ޑޮލަރު (12 ބިލިއަން ރުފިޔާ) އިންވެސްޓްކުރާ ގޮތަށެވެ.
ޕްރޮޖެކްޓް އައިލާގެ އަމަލީ މަސައްކަތް ފެށުމުގެ ރަސްމިއްޔާތުގައި ކްރިސްޓަލް ހޯލްޑިންގްސް އިން ދެއްކި ވީޑިއޯ ޕްރެޒެންޓޭޝަންގައިވާ ގޮތުން ދިގު މުއްދަތަކަށް މީހުންނަށް ދިރިއުޅެވޭ ރިއަލްއެސްޓޭޓް ވިޔަފާރީގެ ބައެއް އެ ޕްރޮޖެކްޓްގައި ހިމެނެ އެވެ. އަދި އެސްއީޒެޑް ގާނޫނުގައިވާ ގޮތަށް އެ ތަނުގައި ކަރަންޓްގެ 60 ޕަސެންޓް އުފައްދާނީ އިއާދަކުރަނިވި ހަކަތައިންނެވެ. އަދި އެތަނުގައި ޒަމާނީ ފެންވަރަަށް ދަނޑުވެރިކަން ކުރުމުގެ ވަސީލަތްތައް ވެސް ގާއިމްކުރާނެ ކަމަށް އެ ޕްރެޒެންޓޭޝަންގައި ބުންޏެވެ.