މާލޭގެ މަގުތަކަށް ކުނި އަޅާ މައްސަލާގައި 12،600 އަށް ވުރެ ގިނަ ޝަކުވާ މިދިޔަ އަހަރު ހުށަހެޅި ކަމަށް މާލޭ ސިޓީ ކައުންސިލުން މިއަދު ބުނެފި އެވެ.
ކައުންސިލުން މިއަދު ވަނީ މިދިޔަ އަހަރުގެ ޖެނުއަރީ އެކަކުން ފެށިގެން މިދިޔަ ޑިސެމްބަރު 31 އަށް ކައުންސިލްގެ ކޮމިއުނިޓީ އެންގޭޖްމަންޓް ޔުނިޓަށް ހުށަހަޅާފައިވާ މައްސަލަތަކުގެ ތަފާސްހިސާބު އާންމުކޮށްފަ އެވެ. އެ ހިސާބުތަކުން އެނގޭ ގޮތުގައި، އާއްމުންނަށް އުނދަގޫވެގެން ކައުންސިލަށް އެންމެ ގިނައިން ޝަކުވާ ހުށަހެޅީ މަގުތައް ގޮނޑުކުރާ މައްސަލައިގަ އެވެ.
އެންމެ ގިނައިން ބަލާފައި ވަނީ ވެސް ކުނި މެނޭޖްކުރުމާ ގުޅޭ މައްސަލަތައްކަން ފާހަގަކޮށް ކައުންސިލުން ބުނީ މަގުތަކާއި ގޯޅިތަކާއި ހުސްބިންތަކަށް ކުނި އެޅުމާ ގުޅޭ ޖުމްލަ 12،652 މައްސަލަ ބަލާފައިވާ ކަމަށެވެ.
ދެން އެންމެ ގިނައިން ރިޕޯޓު ކޮށްފައިވާ މައްސަލަތައް:
- މިސްކިތްތަކާއި މައިޒާންތައް އަދި ޕާކުތައް ބަލައި ޗެކް ކުރަން އެދި 8557 މައްސަލަ
- އާންމު ރައްކާތެރިކަމާ ގުޅޭ މައްސަލަތައް؛ މަގުގެ ޕޭވްމަންޓާއި ކާނު އަދި މަގުގެ ގާ ނޫނީ ތާރުތައް ނެއްޓި ހަލާކުވެފައި ހުރުމާ ގުޅޭ 1،133 މައްސަލަ
- ފުރާޅު ނޫނީ ދިޔަދޮވި އަދި އެއާ ކޮންޑިޝަން އައުޓްޑޯ ޔުނިޓުތަކުން މަގުތަކަށް ފެން ލީކުވުން ނުވަތަ ފެން ތިކިޖެހުމުގެ 1131 ޝަކުވާ
ކައުންސިލުން ބުނީ ކުނީގެ ޝަކުވާގެ އިތުރުން އާންމު އިޖުތިމާއީ މިންގަޑާއި ހިލާފުވުމާއި ގަވައިދާ ހިލާފު ހަރަކާތްތަކާއި ވިޔަފާރީގެ އުސޫލްތަކާ ހިލާފުވުމާއި އާންމު ޝަކުވާތަކާއި އާންމު ރައްކާތެރިކަމާއި އާންމު ސިއްހަތާއި ޓްރެފިކް އަދި ޕާކިން ވައިލޭޝަނާއި ގުދުރަތީ އަދި ތިމާވެށީގެ މައްސަލަތަކާ ގުޅޭ ޝަކުވާތައް ވެސް އެ މުއްދަތުގައި ހުށަހަޅާފައިވާ ކަމަށެވެ.
ކައުންސިލަށް ހުށަހެޅި 31،131 މައްސަލަ އަށް ވެސް ޖަވާބުދާރީ ވެފައިވާ ކަމަށް ތަފާސްހިސާބުގައިވެ އެވެ.
އޭގޭ ތެރެއިން 29،350 މައްސަލަ ނިމިފައިވާއިރު، މައްސަލައިގެ ބާވަތުން ފޮލޯއަޕް ހަދާފައިވާ 1،781 މައްސަލަ ހިމެނޭ ކަމަށް ވެސް ކައުންސިލުން ބުންޏެވެ. އޭގެ އިތުރުން އެ މައްސަލަތަކުގެ ތެރޭގައި ހިމެނެނީ ނަސޭހަތް ދީފައިވާ 874 މައްސަލަ އާއި ޖޫރިމަނާ ކުރި 483 މައްސަލަ ކަމަށް ވެސް ކައުންސިލުން ބުންޏެވެ.