ކުރިއަށް އޮތް ލޯކަލް ކައުންސިލް އިންތިހާބަށް އިލެކްޝަން ކޮމިޝަނުން ހުޅުވާލިއިރު، އެކަމަށް އެހެން އިދާރާތަކުން ތައްޔާރުވެފައި ނެތް ކަމަށް އިދިކޮޅު އެމްޑީޕީން މިއަދު ބުނެފި އެވެ.
އިލެކްޝަން ކޮމިޝަނުން އިންތިހާބަށް ކުރިމަތިލާން ދީފައިވަނީ ވަރަށް ކުރު މުއްދަތެއް ކަމަށްވާތީ ބޮޑެތި ދަތިތަކާ ކުރިމަތިވަމުންދާ ކަމަށް ބުނެ، އެމްޑީޕީން އިއްޔެ ވަނީ ކަންބޮޑުވުން ފާޅުކޮށްފަ އެވެ. އަދި ދައުލަތުގެ އިދާރާތަކުން ރެކޯޑް ސާފް ކުރުމާއި އެހެނިހެން ކަންކަން ފުރިހަމަކުރުމަށް އެތައް ދުވަހެއް ހޭދަވާތީ، އެއީ ފޯމު ހުށަހެޅުމަށް އެކަށީގެންވާ މުއްދަތެއް ނޫން ކަމަށް ވެސް އެ ޕާޓީން ބުންޏެވެ.
އަންނަ އޭޕްރީލް މަހުގެ 4 ގައި ބާއްވާ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބަށް ކުރިމަތިލާން އިލެކްޝަންސް ކޮމިޝަނުން ހުޅުވާލީ މި މަހުގެ 17 ވަނަ ދުވަހު އެވެ. އެ ފުރުސަތު އޮތީ އަންނަ މަހުގެ ފުރަތަމަ ދުވަހުގެ މެންދުރުފަހު 3:30 އާ ހަމައަށެވެ.
އެކަމާ ގުޅޭ ގޮތުން މިއަދު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ކެމްޕެއިން މެނޭޖަރު އަބްދުﷲ ވަހީދު ވިދާޅުވީ ކުށުގެ ރެކޯޑް ސާފުކުރުމުގައި ހާއްސަކޮށް، ކަރެކްޝަނަލް ސާވިސް އާއި ޖުޑީޝަލް އެޑްމިނިސްޓްރޭޝަނުން އިންތިހާއަށް ލަސްވަމުންދާ ކަމަށާއި އެ ތަންތަނުން އިންތިހާބަށް ވާންޖެހޭ ތައްޔާރީތައް ވެފައި ނެތް ކަމަށެވެ.
އެއިން ކޮންމެ ތަނަކަށް ފޯމް ހުށަހަޅައިގެން، ކުށުގެ ރެކޯޑް ސާފުކުރަން ތިން ދުވަސް ނޫނީ ފަސް ދުވަސް ހޭދަވާ ކަމަށް ވަހީދު ވިދާޅުވި އެވެ. އިންތިހާބަށް ކުރިމަތިލާން ވެސް 16 ވަރަކަށް ދުވަސް ލިބިފައިވާއިރު، ކުށުގެ ރެކޯޑް ސާފުކުރަން އެހާ ގިނަ ދުވަސް ނެގުމަކީ ވަރަށް ބޮޑަށް ދަތިވާ ކަމެއް ކަމަށެވެ.
އަދި އެ ލަސްވުން އެހެން އޮވެ، ހަމައެކަނި އޮންލައިންކޮށް އިންތިހާބަށް ކުރިމަތިލެވޭ ގޮތަށް އޮތުމަކީ ވެސް އިންތިހާބީ ހައްގަށް ހުރަސް އެޅިގެންދާ ކަމެއްގެ ގޮތުގައި ވަހީދު ފާހަގަކުރެއްވި އެވެ. އެހެންވެ، އިލެކްޝަން ކޮމިޝަނުން އިންތިހާބަށް ކުރިމަތިލާން އިތުރު 10 ދުވަހުގެ މުއްދަތެއް ދިނުމަށް އެމްޑީޕީން އެދުނެވެ.
"އެހެން ނޫނީ އަޅުގަނޑުމެންނަށް ޖެހޭނީ އެ ހައްގު ހޯދަން އެހެން ގޮތްތަކުން މަސައްކަތް ކުރަން،" ވަހީދު ވިދާޅުވި އެވެ.
ވަހީދު ވިދާޅުވީ ސަރުކާރުގެ ކެންޑިޑޭޓުންނަށް ފަހިވާ ގޮތަށް އިދާރާތައް މަސައްކަތްކުރާ ކަމަށާއި އެއީ މިނިވަން އިންސާފުވެރި އިންތިހާބަކަށް ޖާގަ ނުދިނުން ކަމަށެވެ. އިލެކްޝަން ކޮމިޝަންގެ ޑާޓާއަށް ޕީއެންސީން އެކްސެސްވާ ކަމަށް ވެސް ވަހީދު ތުހުމަތު ކުރެއްވި އެވެ.
އޭނާ ވިދާޅުވީ އެމްޑީޕީން ބޭނުން ވަނީ ފުރިހަމަ ތައްޔާރީތަކާ އެކު އިންސާފުވެރި އިންތިހާބެއް އޮތުން ކަމަށެވެ. އެ ޕާޓީން އިންތިހާބަށް ވަރަށް ބޮޑަށް ތައްޔާރުވަމުން އަންނަ ކަމަށާއި މެނިފެސްޓޯ އެކުލަވާލުމުގެ މަސައްކަތް ވެސް ކުރަމުން އަންނަކަން އޭނާ ފާހަގަކުރެއްވި އެވެ.
ލޯކަލް ކައުންސިލްތަކުގެ އިންތިހާބަށް އަމިއްލަ ގޮތުން ވާދަކުރާ ކެންޑިޑޭޓުންގެ ތާއީދު ފޯމު ފުރުމަށް ހަމައެކަނި އީފާސް ބޭނުންކުރަން އިލެކްޝަންސް ކޮމިޝަނުން ނިންމާފައިވާ މައްސަލާގައި ބައެއް ޕާޓީތަކުން ވަނީ ކަންބޮޑުވުން ފާޅުކޮށްފަ އެވެ.
އީސީން ބުނެފައިވާ ގޮތުގައި އިންތިހާބަށް ކުރިމަތިލުމަށް އެދޭ ފަރާތްތަކުން އެކަމަށް އެދި ހުށަހަޅަންޖެހޭ ލިޔެކިޔުންތަކާއި އިންތިހާބަށް ކުރިމަތިލުމަށް އެދޭ ފަރާތްތަކުން ދައްކަންޖެހޭ އިދާރީ ފީ ދައްކަން ޖެހޭނީ ކޮމިޝަނުގެ ޕޯޓަލް my.elections.gov.mv އިންނެވެ. އީސީން ބުނީ އިންތިހާބަށް ކުރިމަތިލުމަށް އެދި ހުށަހެޅި ހުށަހެޅުމާ މެދު ނިންމާ ގޮތެއް ކެންޑިޑޭޓުންނަށް އަންގާނީ ވެސް އެ ޕޯޓަލް މެދުވެރިކޮށް ކަމަށެވެ.
އެ އިންތިހާބުގައި ރަށު ކައުންސިލުގެ ރައީސުންނާއި ނައިބުން އަދި ކައުންސިލަރުންގެ އިތުރުން ސިޓީތަކަށް މޭޔަރުންނާއި ކައުންސިލަރުން ހޮވާނެ އެވެ. އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ވެސް މެމްބަރުން ހޮވާނެ އެވެ.
މި ދެ އިންތިހާބުގެ ވޯޓާސް ލިސްޓު މިމަހުގެ 8 ވަނަ ދުވަހު ވަނީ އާންމުކޮށްފަ އެވެ. އެ ލިސްޓުގައިވާ ގޮތުން ވޯޓު ދިނުމުގެ ހައްގު 294,937 މީހަކަށް ލިބެ އެވެ. މި ފަހަރުގެ ލޯކަލް ކައުންސިލްތަކާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގެ އިންތިހާބުގައި 225 ދާއިރާއަކަށް މީހުން އިންތިހާބު ކުރާނެ ކަމަށެވެ.