ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބަށް ކުރިމަތިލާ ކެންޑިޑޭޓުންގެ ކުށުގެ ރެކޯޑް ސާފުކުރުމުގެ މަސައްކަތްކުރަން އިތުރު ގަޑީގައި ވެސް މަސައްކަތް ކުރަމުންދާ ކަމަށް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނެފި އެވެ.
މިއަދު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ކެމްޕެއިން މެނޭޖަރު އަބްދުﷲ ވަހީދު ވަނީ ކުށުގެ ރެކޯޑް ސާފުކުރުމުގައި ހާއްސަކޮށް، ކަރެކްޝަނަލް ސާވިސް އާއި ޑީޖޭއޭއިން އިންތިހާއަށް ލަސްވަމުންދާ ކަމަށާއި އެ ތަންތަނުން އިންތިހާބަށް ތައްޔާރުވެފައި ނެތް ކަމަށް ވިދާޅުވެފަ އެވެ.
އެކަމާ ގުޅޭގޮތުން ސުވާލުކުރުމުން ޗީފް ޖުޑީޝަލް އެޑްމިނިސްޓްރޭޓާ އަމްޖަދު މުސްތަފާ ވިދާޅުވީ ކުށުގެ ރެކޯޑް ސާފުކުރަމުންދަނީ ހުރިހާ ރަށެއްގެ ކޯޓުތަކަށް ފޮނުވައިގެން ވަކިވަކިން މެނުއަލްކޮށް ކަމަށާއި އެހެންވެ، އެކަން ކުރުމުގައި ދަތިތަކާއި ލަސްތައް ހުންނަ ކަމަށެވެ.
ނަމަވެސް މިހާރު ސާފު ނުކުރެވި ހުރީ ގާތްގަނޑަކަށް 400 ވަރަކަށް ކެންޑިޑޭޓުންގެ ރެކޯޑް ކަމަށް އަމްޖަދު ވިދާޅުވި އެވެ. އަދި އެ ރެކޯޑްތައް ވެސް ކެންޑިޑެސީ ހުށަހެޅުމުގެ މުއްދަތުގައި ނިންމަން މުވައްޒަފުން ހުކުރު ދުވަހާއި ހޮނިހިރު ދުވަހާއި އަދި ކޮންމެ ދުވަހެއްގެ ރޭގަނޑު ވެސް މަސައްކަތް ކުރަމުންދާ ކަމަށް އޭނާ ވިދާޅުވި އެވެ.
އަމްޖަދު ވިދާޅުވީ ޑީޖޭއޭއިން މަސައްކަތް ކުރަމުންދަނީ ރެކޯޑް ސާފުކުރުމުގެ މަސައްކަތް އޮޓަމޭޓް ކުރެވޭނެ ނިޒާމެއް ގާއިމް ކުރަން ކަމަށެވެ. އަދި ކުށުގެ ރެކޯޑްތައް ރަށްރަށުގެ ކޯޓުތަކުން ޕޯޓަލަށް އަޕްޑޭޓް ކުރަމުންދާ ކަމަށާއި އެ މަސައްކަތް ނިމުމުން ކުށުގެ ރެކޯޑް ވަގުތުން ބެލޭނެ ކަމަށް އޭނާ ވިދާޅުވި އެވެ.
މީގެކުރިން ޑީޖޭއޭއަށް ފިޒިކަލް ފޯމް ލައިގެން އަދި އޭގެފަހުން މެއިލްކޮށްގެން ކުށުގެ ރެކޯޑް ސާފުކުރަން ހުށަހަޅަން ޖެހޭ ގޮތަށް އޮތް ނަމަވެސް، މިހާރު އީފާސް މެދުވެރިކޮށް ޕޯޓަލެއް މެދުވެރިކޮށް އެކަމަށް އެދެވެ އެވެ. ނަމަވެސް، އަދިވެސް ކުށުގެ ރެކޯޑް ބެލުމަށް ތިނެއް ނޫނީ ފަސް ވަރަކަށް ދުވަސް ހޭދަވެ އެވެ.
އެމްޑީޕީގެ ކެމްޕެއިން މެނޭޖަރު ވަހީދު ވިދާޅުވެފައިވަނީ އިންތިހާބަށް ކުރިމަތިލާން 16 ވަރަކަށް ދުވަސް އޮތްއިރު ކުށުގެ ރެކޯޑް ސާފުކުރަން އެހާ ގިނަ ދުވަސް ނެގުމަކީ ވަރަށް ބޮޑަށް ދަތިވާ ކަމެއް ކަމަށެވެ.
އެ ލަސްވުން އެހެން އޮވެ، ހަމައެކަނި އޮންލައިންކޮށް އިންތިހާބަށް ކުރިމަތިލެވޭ ގޮތަށް އޮތުމަކީ ވެސް އިންތިހާބީ ހައްގަށް ހުރަސް އެޅިގެންދާ ކަމެއްގެ ގޮތުގައި ވަހީދު ފާހަގަ ކުރެއްވި އެވެ. އެހެންވެ، އިންތިހާބަށް ކުރިމަތިލާން އިތުރު 10 ދުވަހުގެ މުއްދަތެއް ދިނުމަށް އެމްޑީޕީން އެދުނެވެ.
އެކަމާ ގުޅޭ ގޮތުން އިލެކްޝަން ކޮމިޝަނުން މިހާތަނަށް ވަކި އެއްޗެއް ބުނެފައެއް ނުވެ އެވެ.