ހެލްތު ސެންޓަރުތަކުގައި ލެބޯޓްރީގެ ހިދުމަތް ފަށަން ގިނަ އަދަދެއްގެ ބިދޭސީ ޓެކްނީޝަނުން ހޯދަން މިއަދު އިއުލާންކޮށްފި އެވެ.
ހެލްތު މިނިސްޓްރީން ކުރި އިއުލާނުގައި ބުނީ އެކި ރަށްރަށުގެ ހެލްތު ސެންޓަރާއި ހޮސްޕިޓަލްތަކުގައި މަސައްކަތްކުރަން 60 ލެބް ޓެކްނީޝަނުން ބޭނުންވާ ކަމަށެވެ. އެ މަގާމަށް އަންނަ އަންގާރަ ދުވަހުގެ ކުރިން ފޯމު ހުށަހެޅޭނެ ކަމަށް އިއުލާނުގައިވެ އެވެ.
"ތަރުޖަމާނާ އެކު" ނަމުގައި މިދިޔަ ހުކުރު ދުވަހު ބޭއްވި ޕޮޑްކާސްޓުގައި ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވީ ބޭސް ފަރުވާ ފެށޭނީ ރަނގަޅު ޑައިގްނޯސްޓިކް ސިސްޓަމެއް އޮވެގެން ކަމަށާއި އެ ނިޒާމަށް އިތުބާރު ކުރެވޭނެ ގޮތެއް އޮަންނަންޖެހޭ ކަމަށެވެ.
"ޑައިގްނޯސް ސިސްޓަމަށް އިތުބާރު ނުކުރެވޭ ނަމަ އެ ލިޔެވޭ ޕްރިސްކްރިޕްޝަނަކަށް އެއްވެސް މީހެއްގެ އިތުބާރެއް ނޯންނާނެ. ނަތީޖާއަކީ ޑައިގްނޯސް ސިސްޓަމް ވަރުގަދަނުކޮށް ހެލްތު ނިޒާމުގެ ވާހަކަ ނުދެއްކޭނެކަން،" އޭނާ ވިދާޅުވި އެވެ.
އެ މަސައްކަތުގެ ތެރެއިން، މީހުން ދިރިއުޅޭ ހުރިހާ ރަށެއްގައި މި އަހަރު ނިމުމުގެ ކުރިން ލެބޯޓްރީ ގާއިމްކުރަން ވަނީ ނިންމައިފަ އެވެ. މިދިޔަ މަހުގެ ތެރޭގައި ވެސް ހަތަރު ރަށެއްގައި ލެބޯޓްރީ ހުޅުވާފައިވާ ކަމަށް ނާޒިމް ވިދާޅުވި އެވެ.
މިނިސްޓްރީން މިއަދު އިއުލާންކުރީ، މި އަހަރުގެ ފުރަތަމަ ތިން މަސް ދުވަހަށް ބޭނުންވާނެ ލެބް ޓެކްނީޝަނުން ހޯދާށެވެ. އޭގެ އިތުރުން، ރަށްރަށަށް ދިވެހިން ނުލިބިގެން ބިދޭސީ 50 ނަރުހުން ހޯދަން ވެސް ވަނީ އިއުލާންކޮށްފަ އެވެ.
ލެބް ޓެކްނީޝަނެއްގެ އަސާސީ މުސާރައަކީ 5،610ރ. އެވެ. ސާވިސް އެލަވަންސްއަށް 2،500ރ، އެކޮމޮޑޭޝަން އެލަވަންސަށް 3،000ރ، އަދި ފުޑް އެލަވަންސްގެ ގޮތުގައި 1،800ރ. އާއެކު ޖުމްލަ 12،910ރ. ލިބޭނެ އެވެ.
ނާޒިމް ވިދާޅުވީ ސަރުކާރުން އާބަން ސެންޓަރުތައް ގާއިމުކުރުމުގެ މަސައްކަތް ވެސް ކުރަމުން އަންނައިރު، އޭގެ ދަށުން ސިއްހީ ދާއިރާ ވެސް ކުރިއަރުވާނެ ކަމަށެވެ. އެތަންތަނުގައި ސީޓީ ސްކޭން މެޝިން ފަދަ ހިދުމަތްތައް ގާއިމުކުރުމުގެ މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.