ޖީޕީ ކްލިނިކްތައް ހަދައިގެން ނޫނީ ރާއްޖޭގެ ސިއްހީ ހިދުމަތް އިތުރު ހަރުފަތަކަށް ނުދާނެ ކަމަށް، ހެލްތު މިނިސްޓަރު އަބްދުﷲ ނާޒިމް އިބްރާހިމް މިއަދު ވިދާޅުވެއްޖެ އެވެ.
"ތަރުޖަމާނާއެކު" ނަމުގައި ގެންދާ ސިލްސިލާ ޕޮޑްކާސްޓުގައި، މާލެ ސަރަހައްދުގެ ސިއްހީ ދާއިރާ ކުރިއަރުވަން ކުރާ މަސައްކަތްތަކާ ގުޅޭގޮތުން ނާޒިމް ވިދާޅުވީ މީހަކަށް ކޮންމެ ކަމެއް ދިމާވިއަސް ފުރަތަމަ ވެސް ދައްކަނީ ސްޕެޝަލިސްޓު ޑޮކްޓަރަކަށް ކަމަށެވެ. އެފަދަ ކަންކަމުގެ ސަބަބުން، ދައްކަންޖެހޭ ޑޮކްޓަރަށް ނުދެއްކި، އަތުން އެތައް ހަރަދެއް އިސްރާފުވެގެންދާކަން އޭނާ ފާހަގަކުރެއްވި އެވެ.
ނަމަވެސް، މާލެ ސަރަހައްދުގައި ގާއިމްކުރަން ނިންމާފައިވާ ހަ ޖީޕީ ކްލިނިކާއެކު، ޑޮކްޓަރަށް ދެއްކުމަށް މީހުން ހޭދަކުރާ ވަގުތާއި ހަރަދު ސަލާމަތްވެ، ކިއު ކުޑަވެގެންދާނެ ކަމަށް މިނިސްޓަރު ވިދާޅުވި އެވެ.
މާފަންނު އަދި ހުޅުމާލެ 2 އަދި މިހާރު ވެސް ޖީޕީ ކްލިނިކެއް ހިންގަ އެވެ. އޭގެ ތިން ވަނަ ކްލިނިކް، އެފްޑީސީގެ ޓަވަރެއްގައި ގާއިމްކުރަން މިހާރު ވަނީ ހަވާލުކޮށްފަ އެވެ.
ސަރުކާރުން ނިންމާފައިވަނީ މާލޭގެ ކޮންމެ އަވަށެއްގައި ޖީޕީ ކްލިނިކެއް ހަދާށެވެ.
ނާޒިމް ވިދާޅުވީ އައިޖީއެމްއެޗްގެ އިމަޖެންސީއަށް ދުވާލަކު 500 އަށް ވުރެ ގިނަ ބަލި މީހުން ދެއްކިއަސް، އޭގެ ދެބައިކުޅަ އެއްބައި މީހުންނަކީ އަސްލު އެ ތަނަށް ދާންޖެހޭ ބައެއް ނޫން ކަމަށެވެ. ހަރުދަނާ ޖީޕީ ނިޒާމަކާއެކު އިމަޖެންސީގެ ހިދުމަތް ހޯދާ މީހުންގެ އަދަދު މަދުވުމުން، އެ ފަރުވާ ހަގީގަތުގައި އެންމެ ބޭނުންވާ މީހުންނަށް އެންމެ ރަނގަޅަށް ދެވިގެންދާނެ ކަމަށް އޭނާ ވިދާޅުވި އެވެ.
ޖީޕީ ކްލިނިކްތައް ހިންގަނީ ކުޑަކުދިންނަށް ވެކްސިން ޖެހުމާއި ސިޒޭޝަން ކްލިނިކާއި ނަފްސާނީ މައްސަލަތައް ހުންނަ މީހުންނަށް ކައުންސެލިން ވެސް ދޭ ގޮތަށެވެ. އަދި ސީރިއަސް ލެވެލްގައި ހުރި ނަމަ އައިޖީއެމްއެޗް ނުވަތަ ހުޅުމާލެ ހޮސްޕިޓަލްގެ ސައިކޭޓްރީ ޑިޕާޓްމަންޓަށް ރިފާ ކޮށްގެން ފަރުވާ ދެވޭނެ ކަމަށް މިނިސްޓަރު ވިދާޅުވި އެވެ.
"މި ނިޒާމު މި ގޮތަށް އައިސްގެން މެނުވީ އަޅުގަނޑުމެންގެ ސިއްހީ ހިދުމަތް ދެން މިހާރު ދާން މި އޮތް އިތުރު ހަރުފަތަކަށް ހަގީގަތުގައި ނުގެންދެވޭނެ. ހަމައެކަނި ހިދުމަތަށް އިންވެސްޓުކޮށްގެން، ހަމައެކަނި މެޝިނަރީ ލައްވައިގެން، ހަމައެކަނި އިންފްރަސްޓްރަކްޗާ އިތުރުކޮށްގެން މިކަމެއް ރަނގަޅެއް ނުކުރެވޭނެ. މުޅި ނިޒާމް، މުޅި ގަވަނެންސް ސްޓްރެންތެން ކުރަންޖެހޭ،" ނާޒިމް ވިދާޅުވި އެވެ.
"މިއީ ދުނިޔޭގައި ބަލައިގަންނަ، މަގުބޫލު ސިސްޓަމެއް."
އޭނާ ވިދާޅުވީ ހުރިހާ ޖީޕީ ކްލިނިކެއް ގާއިމްކޮށް ހިންގަން ފެށުމުން، ބަލި މީހުން އޮޓޯމެޓިކުން ބެހިގެންދާނީ ޒޯނުތަކަކަށެވެ. މިސާލެއްގެ ގޮތުން މިނިސްޓަރު ފާހަގަކުރެއްވީ މާފަންނުގައި އުޅޭ މީހަކު، މާފަންނު ޖީޕީ ކްލިނިކަށް ރަޖިސްޓްރީވެފައި އޮތުމެވެ. އޭރުން، އެ މީހާގެ މެޑިކަލް ރިކޯޑުތައް ބަލަހައްޓަން ފަސޭހަވާނެ އެވެ.
"އެކަމުގެ ސަބަބުން މީހުންގެ ބިހޭވިއާއަށް ބަދަލު އަންނާނެ. ވިސްނުމާ ފިކުރަށް ބަދަލު އަންނާނެ. އެ ނިޒާމު ހަމައަކަށް އެޅިގެންދާއިރު ރައްޔިތުންނަށް ލުއި ފަސޭހަވާނެ،" އޭނާ ވިދާޅުވި އެވެ.
މިނިސްޓަރު ވިދާޅުވީ ސިއްހީ ދާއިރާއަށް މިހާރު ކުރާ ހޭދަ އެ ވަރުގައި ހިފަހައްޓައިގެން ހިދުމަތުގެ ފެންވަރު ރަނގަޅުކުރަން އުނދަގޫވާނެ ކަމަށެވެ. އެ ދާއިރާއަށް ބޮޑު ހޭދައެއް ކުރާ ކަމަށާއި މުޅި ނިޒާމު އަލުން ބައްޓަންކޮށްގެން ނޫނީ ލުޔެއް ނުލިބޭނެ ކަމަށް ވެސް ނާޒިމް ވިދާޅުވި އެވެ.