ނުރައްކާތެރި ނިޕާ ވައިރަސް އިންޑިއާގެ ކެރަލާ އާއި ވެސްޓް ބެންގަލްގައި އާންމުވެ - އެންޑެމިކް - ހާލަތުގައިވާ ކަމުގެ އިންޒާރު ނޭޝަނަލް ޓެކްނިކަލް އެޑްވައިޒަރީ ގްރޫޕުން ދީފި އެވެ.
އެޑްވައިޒަރީ ގްރޫޕްގެ ކޮވިޑް-19 އަށް ހާއްސަ ގްރޫޕްގެ ޗެއާމަން ޑރ. ނަރެންދުރަ ކުމާރް އަރޯރާ އޭއެންއައި އަށް ދެއްވި އިންޓަވިއުއެއްގައި ވިދާޅުވީ ކެރަލާ އާއި ވެސްޓް ބެންގަލްގައި މިހާރު ނިޕާ ވައިރަސް ފެނުން އާންމު ކަމަށާއި މިފަހަރު ވައިރަސް އެންމެ ފުރަތަމަ ޖެހުނުކަން އެނގުނީ ވެސްޓް ބެންގަލް އިން ސިއްހީ ފަސް ހިދުމަތްތެރިއަކަށް ކަމަށެވެ.
އަރޯރާ ވިދާޅުވީ މި ފަސް މީހުންނާ ގުޅުން ހުރި 100-200 މީހަކު ބައްޔަށް ޓެސްޓުކޮށް، އިތުރަށް ބަލަންޖެހޭ ކަންކަން ބަލަމުން އަންނަ ކަމަށެވެ.
އަރޯރާ ވިދާޅުވީ ނިޕާ ވައިރަސް އަކީ ޒޫނޯޓިކް ނުވަތަ ޖަނަވާރުގެ ކިބައިން އިންސާނުންނަށް އަރާ ވައިރަސްއެއް ކަމަށާއި އެ ވައިރަސް ޖެހޭ މީހުންގެ ތެރެއިން 40 - 75 ޕަސެންޓާ ދެމެދުގެ އަދަދަކަށް މީހުން މަރުވާ ކަމަށެވެ. މިއީ ވަރަށް ފަސޭހައިން ގައިންގަޔަށް އަރާ ބައްޔެއް ކަމަށާއި ފުރާނައަށް ނުރައްކާވާ ފަދަ، ނޭވާލާ ނިޒާމުގެ މައްސަލަތައް ދިމާވެ އެކަމާ ގުޅޭ އަލާމާތްތައް ފެންނާނެ ކަމަށް އޭނާ ވިދާޅުވި އެވެ.
"... މި ބަލި ދޭތެދޭތެރެއިން ކެރަލާ އާއި ވެސްޓް ބެންގަލްގައި ފެތުރޭ. ބަންގްލާދޭޝް އަކީ ވެސް މި ބަލި ފެންނަ ގައުމެއް،" ޑރ. އަރޯރާ ވިދާޅުވި އެވެ.
އޭނާ ވިދާޅުވި ގޮތުގައި ސިއްހީ ހިދުމަތްދޭ ފަސް ސްޓާފަކަށް ނިޕާ ވައިރަސް ޖެހިފައިވާކަން އެނގުނީ ގޮތް ނޭނގޭ ބައްޔެއްގައި މީހަކު މަރުވުމުން ބެލި ބެލުންތަކުގެ ތެރެއިން ކަމަށެވެ. މި މީހުންނާ ގުޅުން އޮންނަ 100-200 މީހުންގެ ހާލަތު އަންނަނީ ބަލަމުންނެވެ.
"... މި ވައިރަސްއަށް ވެކްސިނެއް އަދި ނެތް. ނިޕާ ވައިރަސް ޖެހިއްޖެ ނަމަ މިހާރު ދެނީ މޮނޮކްލޯނަލް އެންޓިބޮޑީސް،" އަރޯރާ ވިދާޅުވި އެވެ.
މޮނޮކްލޯނަލް އެންޓިބޮޑީޒް އަކީ މުޅި ދުނިޔޭގައި ވެސް ސަޕްލައި ވަރަށް މަދު އެއްޗެއް ކަމަށާއި އެހެންވެ އިންޑިއާއިން އިސްނަގައިގެން މީގެ ސަޕްލައި އިތުރުކުރުމަށް މަސައްކަތްކުރަމުން އަންނަ ކަމަށް ޑރ. އަރޯރާ ވިދާޅުވި އެވެ.
އިންޑިއާގައި ނިޕާ ވައިރަސް ފެތުރޭތީ ތައިލެންޑާއި އަވަށްޓެރި އެހެން ބައެއް ގައުމުތަކުން ވަނީ އިންޑިއާއިން އެ ގައުމުތަކަށް އެތެރެވާ މީހުން މޮނިޓަކުރުން ހަރުދަނާކޮށްފަ އެވެ.
އިންޑިއާގައި މި ފަހުން ކޮންމެ އަހަރަކުހެން ކެރަލާ އާއި އެހެން ބައެއް ސިޓީތަކުގައި ނިޕާ ވައިރަސް ފެތުރިފައިވެ އެވެ. މި ވައިރަސް ޖެހުމުން އަލާމާތްތަކުގެ ގޮތުގައި ފެންނަނީ އާންމު ހުމާއި ރޯގާ ނުވަތަ ފްލޫގައި ފެންނަ ފަދަ އަލާމާތްތަކެވެ. ބަލި ބޮޑުވުމުން ނިއުމޯނިއާ ޖެހުމާއި ފިޓް ޖެހުމާއި ކޯމާއަށް ދިއުން އަދި މަރުވުމުގެ ނުރައްކާ ވެސް އޮވެ އެވެ.