ކޮންޓްރްކްޓާ ފައިނޭންސް އުސޫލުން އާރުސީސީން ހުޅުމާލެ 2 ގައި ސަރުކާރަށް އިމާރާތް ކޮށްދިން އާ ސްކޫލްގެ މަސައްކަތް ދެ އަހަރުގެ ތެރޭގައި ނިންމައި ސަރުކާރާ ހަވާލުކޮށްފި އެވެ.
ޝަހީދު އަލީ ސްކޫލުގެ ނަން ދީފައިވާ އެންމެ ޒަމާނީ ފެންވަރުގެ އެ ސްކޫލް އިމާރާތުގެ ބިންގާ ރައީސް ޑރ. މުހައްމަދު މުއިއްޒު އަޅުއްވައި ދެއްވީ ޑިސެމްބަރު 2023 ގަ އެވެ. ބިލްޑް އެންޑް ޑިޒައިންގެ އުސޫލުން ހަދަން އާރުސީސީއާ ހަވާލުވި އެ އިމާރާތުގެ މަސައްކަތް ނިންމައި މިއަދު ވަނީ އެ ސްކޫލުގައި ރަސްމީކޮށް ކިޔަވައިދޭން ފަށައިފަ އެވެ.
ކޮންޓްރެކްޓަ ފައިނޭންސް އުސޫލުން 247 މިލިއަން ރުފިޔާ ހަރަދު ކޮށްގެން އާރުސީސީން އިމާރާތް ކޮށްދިން ޝަހީދު އަލީ ސްކޫލް އިމާރާތުގެ އަގުގެ ފައިސާ ސަރުކާރުން އެ ކުންފުންޏަށް ދައްކަން ޖެހެނީ އަންނަ ފެބްރުއަރީ މަހުގެ 1 ވަނަ ދުވަހުން ފެށިގެންނެވެ. ފައިސާ ދައްކައި ހަލާސް ކުރަން ޖެހެނީ އެއްބަސްވުމުގައިވާ ގޮތުން ފަސް އަހަރުގެ ތެރޭގަ އެވެ.
ޕްރޮޖެކްޓުގެ އަގުގެ ތެރޭގައި އެ ސްކޫލަށް ބޭނުންވާ ހުރިހާ ސާމާނެއް ހިމެނެ އެވެ. އޭގެ ތެރޭގައި އޭސީ ހަރުކުރުމާއި ލިފްޓުތަކާއި ހުރިހާ ފަރުނީޗަރުތަކާއި ސްކްރީން ޓީވީތައް ބެހެއްޓުން ފަދަ ހަރަދުތައް ހިމެނެ އެވެ.
ޝަހީދު އަލީ ސްކޫލަކީ މާލޭގައި ފަހަކަށް އައިސް އިމާރާތް ކުުރާ ސްކޫލުތަކާ ހިލާފަށް އޮޑިޓޯރިއަމަކާއި އިތުރު އެތައް ވަސީލަތްތަކަކާ އެކު ހަދާފައިވާ ޖާގަ ބޮޑު ތަނެކެވެ.
ރާއްޖޭގެ ގައުމީ ބަތަލު އަލި ރަސްގެފާނަށް ނިސްބަތްކޮށް ނަން ދީފައިވާ އެ ސްކޫލު ހުޅުއްވައި ދެއްވީ މިއަދު އެ ސްކޫލުގައި ބޭއްވި ހާއްސަ އެސެމްބްލީއެއްގައި ރައީސް މުއިއްޒު އެވެ. އެ މަނިކުފާނުގެ އަރިހުގައި އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އާއި އާރުސީސީގެ ޗެއާމަން މުހައްމަދު ނާޒިމް ވެސް ބައިވެރިވެވަޑައިގަތެވެ.
ހުޅުމާލެ 2ގައި ސަރުކާރުން އިމާރާތްކުރި އެ ސްކޫލް ހުޅުވުމުގެ އެންމެ ފަހުގެ ތައްޔާރީތަކާ ގުޅޭގޮތުން ނޫސްވެރިންނާ ވާހަކަ ދައްކަވަމުން މިނިސްޓަރު އިއްޔެ ވިދާޅުވީ، އެ ސްކޫލްގައި ކިޔެވުމަށް 1،950 ދަރިވަރަކަށް ޖާގަ ދީފައިވާ ކަމަށެވެ.
ދެ ދަންފަޅި އަށް ކިޔަވައިދޭން ނިންމާފައިވާ އެ ސްކޫލުގައި 230 ޓީޗަރުން ތިބޭނެ ކަމަށް ވެސް އިސްމާއިލް ވިދާޅުވި އެވެ.
މި ވަގުތު މާލެ ސަރަހައްދުގައި އެންމެ ޒަމާނީ ފެންވަރަށް އިމާރާތް ކޮށްފައިވާ ސްކޫލަކީ ޝަހީދު އަލީ ސްކޫލުކަން ފާހަގަ ކުރައްވަމުން މިނިސްޓަރު ވިދާޅުވީ، ކިޔެވުން ފެށިއިރު އެއްވެސް ދަތިކަމެއް ކުރިމަތި ނުވެ އެ ސްކޫލުގައި ކިޔަވައިދެވޭ ވަރަށް ތައްޔާރު ވެފައިވާ ކަމަށެވެ.
ޝަހީދު އަލީ ސްކޫލަކީ މި ސަރުކާރުން މާލެ ސަރަހައްދުގައި އިމާރާތްކުރި ފުރަތަމަ ސްކޫލް ވެސް މެ އެވެ.
އެ ސްކޫލްގެ މަސައްކަތް އާރުސީސީއާ ހަވާލުކުރީ ޖޫން 27، 2021 ގަ އެވެ. އެކި ސަބަބުތަކާ ހެދި އަމަލީ މަސައްކަތް ފެށުން ދެ އަހަރަށް ލަސްވެފައި އޮއްވައި، މި ސަރުކާރު ވެރިކަމާ ހަވާލުވިތާ މަހެއް ވެސް ނުވަނީސް އެންމެ އިސްކަންދޭ ކަންތައްތަކުގެ ލިސްޓުގައި އެ ސްކޫލް ޕްރޮޖެކްޓު ހިމަނައިގެން މަސައްކަތް ފެށީ ކަމަށް ސަރުކާރުގެ އޮފިޝަލަކު ވިދާޅުވި އެވެ.
ގްރޭޑް 1-10 އާ ހަމައަށް ކިޔަވައިދޭން ނިންމާފައިވާ ޝަހީދު އަލީ ސްކޫލުގައި 32 ކުދިންގެ ޖާގައިގެ 54 ކްލާސްރޫމު ހިމެނެ އެވެ.
އަދި 400 ކުދިންގެ އޮޑިޓޯރިއަމަކާއި ލައިބްރަރީ އާއި ކޮމްޕިއުޓަރު ލެބާއި ތިން ކެމިސްޓްރީ ލެބާއި އިންޑޯ ހޯލަކާއި އައުޓްޑޯ ހޯލެއް ވެސް ވަނީ ގާއިމްކޮށްފަ އެވެ. އޭގެ އިތުރުން 20 ކުދިންގެ ޖާގައިގެން ތިން ލިފްޓު ވެސް ވަނީ ހަރުކޮށްފަ އެވެ.