ހުޅުމާލޭ 2 ގައި ހުންނަ ހިޔާ ފްލެޓުގެ 8 ވަނަ ޓަވަރުގައި ދެ ބެއިންގެ މެދުގައި ހިނގި ހަމަނުޖެހުމެއްގައި ތޫނު އެއްޗަކުން ހަމަލާދީ އެކަކު މިއަދު ޒަހަމްކޮށްލައިފި އެވެ.
ޑޮކްޓަރުންނާ ހަވާލާދީ، ފުލުހުން ބުނި ގޮތުގައި ހަމަލާގެ ސަބަބުން އުމުރުން 38 އަހަރުގެ ދިވެހި ފިރިހެންމީހާގެ ފަލަމަސްގަނޑު ފުންކޮށް ކަފައިގެންގޮސް، މައި ނާރު ވަނީ ބުރިވެފަ އެވެ.
އޭނާއަށް މިހާރު ހުޅުމާލޭ ހޮސްޕިޓަލުގައި އަންނަނީ ފަރުވާދެމުންނެވެ.
އެ ހޮސްޕިޓަލުގެ އޮފިޝަލަކު "މިހާރު" އަށް ވިދާޅުވީ ތޫނު އެއްޗަކުން ހަމަލާދިނުމުގެ ސަބަބުން އަނިޔާވި މީހަކަށް ފަރުވާދެމުން އަންނަ އޭނާއަށް އިތުރު ފަރުވާ ދިނުމަށް އޭޑީކޭ ހޮސްޕިޓަލަށް ފޮނުވުމުގެ މަސައްކަތް ކުރާ ކަމަށެވެ.
އޮފިޝަލް ވިދާޅުވި ގޮތުގައި އެ މީހާ އޭޑީކޭއަށް ފޮނުވަނީ ސާޖަރީއެއް ހެދުމަށެވެ. އެކަމަކު އެއީ ކޮން ކަހަލަ ސާޖަރީއެއް ކަމާއި ލިބުނު އަނިޔާގެ ތަފްސީލު ހިއްސާއެއް ނުކުރެ އެވެ.
އޮފިޝަލް ވިދާޅުވި ގޮތުގައި އަނިޔާވި މީހާގެ ހަށިގަނޑުގައި ބޮޑެތި ޒަހަމްތަކެއް ވެސް ހުއްޓެވެ.
އެ ހާދިސާ ގުޅިގެން ފުލުހުން ބުނީ ހިޔާގެ 8 ވަނަ ޓަވަރުގެ ފްލެޓެއްގައި އަޑުގަދަވެގެން ރިޕޯޓެއް ލިބިގެން، ފުލުހުން އެ ތަނަށް ގޮސް ބެލިއިރު ދެބެއިންގެ މެދުގައި ހިނގި ހަމަނުޖެހުމެއްގެ ތެރެއިން އެކަކަށް ތޫނު އެއްޗަކުން ހަމަލާދީފައިވާ ކަމަށެވެ.
އެކަމާ ގުޅިގެން ބަލަންޖެހޭ ކަންކަން ބަލަމުންދާ ކަމަށް ވެސް ފުލުހުން ބުންޏެވެެ.