ހުޅުމާލެ 2 ގައި ހުންނަ ހިޔާ ފްލެޓުގެ ޓަވަރުތަކުގައި އިތުރު ސީސީޓީވީ ކެމެރާ ހަރުކުރުމުގެ މަސައްކަތް އެޗްޑީސީން ފަށައިފި އެވެ.
އެޗްޑީސީން މިއަދު ސޯޝަލް މީޑިއާގައި ކުރި ޕޯސްޓެއްގައި ބުނީ ހިޔާ ސަރަހައްދުގައި ދިރިއުޅޭ މީހުންގެ ރައްކާތެރިކަން ކަށަވަރު ކުރުމަަށް ޓަވަރުތަކުގައި ސީސީޓީވީ ކެމެރާތައް ބެހެއްޓުމުގެ މަސައްކަތް ކުރަމުން އަންނަ ކަމަށެވެ.
"މި ކެމެރާތާކުގެ އެހީގައި ހިޔާ ސަރަހައްދު މޮނީޓާކޮށް ބެލެހެއްޓުން އިތުރަށް ހަރުދަނާ ވެގެންދާނެ،" އެޗްޑީސީން ބުންޏެވެ.
މިފަހަރު ސީސީޓީވީ ކެމެރާ ހަރުކުރަނީ ހިޔާގެ ޓަވަރުތަކުގެ ބޭރުގަ އެވެ.
ހިޔާގެ ޓަވަރުތަކުގެ އެތެރޭގައި ކޮންމެ ފުލޯއަކާއި ސިޑިގޮޅިތަކާއި ލިފްޓުތަކާއި ބޭސްމަންޓުގައި މިހާރު ވެސް ސީސީޓީވީ ކެމެރާ ހަރުކޮށްފައި ހުރެ އެވެ.
ހުޅުމާލޭގެ މަގުތަކާއި އާންމު ތަންތަނާއި އިމާރާތްތަކުގެ ސެކިއުރިޓީ 24 ގަޑިއިރު ބަލަހައްޓަން އެސްޓޭޓް ސެކިއުރިޓީގެ ހިދުމަތް ވެސް އެޗްޑީސީން މި ހަފުތާގައި ވަނީ ތައާރަފުކޮށްފަ އެވެ.
ބޮޑު އާބާދީއެއް ދިރިއުޅޭ ހިޔާ ފްލެޓުގެ 16 ޓަވަރު ހުޅުމާލެ 2 ގައި ހުރެ އެވެ. އެޗްޑީސީން އަންނަނީ އެ ހުރިހާ ޓަވަރެއްގައި އިތުރު ލިފްޓު ހަރުކުރުމުގެ މަސައްކަތް ވެސް ކުރަމުންނެވެ.