ހުޅުމާލޭގައި ހުންނަ ސްޓެލްކޯގެ ބާ އިންޖީނުގޭގައި މިދިޔަ މަހު ހިނގި އަލިފާނުގެ ހާދިސާގައި ފިހިގެން ލިބުނު އަނިޔާތަކާ ގުޅިގެން ރާއްޖެއިން ބޭރުގައި ފަރުވާ ދެމުން ދަނިކޮށް ނިޔާވި މީހާގެ ހަށިގަނޑު މާލެ ގެންނަން ނިންމައިފި އެވެ.
އަލިފާނުގެ ހާދިސާގައި ފިހުނީ ސްޓެލްކޯގެ ސުޕަވައިޒަރެއްގެ ގޮތުގައި މަސައްކަތް ކުރަމުން އައި އުމުރުން 43 އަހަރުގެ އަހުމަދު އަޒްމީލް އެވެ. އޭނާއަށް ތައިލެންޑްގެ ވެރިރަށް ބެންކޮކްގެ ހޮސްޕިޓަލެއްގައި ފަރުވާ ދެމުން ދަނިކޮށް އޭނާ ނިޔާވީ މިދިޔަ ބުރާސްފަތި ދުވަހު އެވެ.
ސްޓެލްކޯގެ މީޑިއާ އޮފިޝަލަކު "މިހާރު" އަށް ވިދާޅުވީ އަޒްމީލްގެ ހަށިގަނޑު ރާއްޖެ ގެންނަން ނިންމީ އާއިލާއިން ބޭނުންވެގެން ކަމަށެވެ.
އަޒްމީލްގެ ހަށިގަނޑު ރާއްޖެ ގެނައުމަށް ހަމަޖައްސަން ޖެހޭ ހުރިހާ އިންތިޒާމެއް ކުރަނީ އެ ކުންފުނިން ކަމަށް ވެސް އޭނާ ވިދާޅުވި އެވެ.
"އެ މީހުން ބުނެފައިވަނީ ހޯމަ ނޫނީ އަންގާރާ ދުވަހު އަޒްމީލްގެ ހަށިގަނޑު ރާއްޖެ ގެނެވޭނެ ކަމަށް،" އޮފިޝަލް ވިދާޅުވި އެވެ.
އަޒްމީލް ނިޔާވިއިރު އަންބަކާއި ދެ ކުދިން ތިބެ އެވެ. އަދި އަނބިމީހާ މިހާރު އިނީ ތިންވަނަ ދަރިފުޅަށް ބަލިވެ އެވެ.