ރާއްޖެ އާއި އިންޑިއާއާ ދެމެދު އެއްވެސް މައްސަލައެއް ނެތް ކަމަށާއި ނަމަވެސް ބޭރުގެ އެއްވެސް ގައުމެއްގެ ސިފައިން ރާއްޖޭގައި ތިބުމަކީ ދިވެހިން އެދޭ ކަމެއް ނޫން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އދ. ގެ އާއްމު މަޖިލީހުގައި ބައިވެރިވެވަޑައިގަތުމަށް ކުރެއްވި ދަތުރުފުޅުގެ ތެރެއިން، އެމެރިކާގެ މަޝްހޫރު ޕްރިންސްޓަން ޔުނިވާސިޓީގައި ވާހަކަފުޅު ދައްކަވަމުން ރައީސް ވިދާޅުވީ، ދިމާވި މައްސަލައަކީ އިންޑިއާގެ ސިފައިން ރާއްޖޭގައި ގާއިމްވެ ތިބުން ކަމަށެވެ.
ރައީސް މުއިއްޒު ރިޔާސީ އިންތިހާބުގައި ރައްޔިތުންނަށް ވެވަޑައިގަތް ވައުދާ އެއްގޮތަށް، އިންޑިއާގެ ސިފައިން ވަނީ އަނބުރާ ފޮނުވާލައިފަ އެވެ. އޭގެ ބަދަލުގައި އެ ގައުމުން މިހާރު ފޮނުވާފައި ތިބީ ސިވިލިއަނުންނެވެ.
ރާއްޖޭގައި ގާއިމްވެ ތިބި 77 ސިފައިންނަކީ ގިނަ އަދަދެއް ނޫން ކަން ފާހަގަކުރައްވަމުން، އެކަމަށް ރައީސް ވިދާޅުވީ ބޭރުގެ އެންމެ ސިފައިންގެ މީހަކު ވެސް ރާއްޖޭގައި ހުރުމަކީ ދިވެހިންނަށް ގަބޫލުކުރެވޭ ކަމެއް ނޫން ކަމަށެވެ.
"ބޭރުގެ އެންމެ ސިފައިންގެ މީހަކު ހުރުމަކީ ވެސް ދިވެހިން ގަބޫލުކުރާ ކަމެއް ނޫން. އިންޑިއާގެ ސިފައިން ތިބުމުން އެކަމާ ދެކޮޅަށް ނުކުތުމުގެ މާނައެއް ނޫން އަޅުގަނޑުމެން އިންޑިއާއާ ދެކޮޅަށް މައްސަލައެއް އޮތީ ކަމަށް،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި ރާއްޖޭގައި އެ ވަގުތު ތިބީ އެހެން ގައުމެއްގެ ސިފައިން ނަމަވެސް އެވަގުތު އެ އޮތް ނުތަނަވަސް ކަން ކުރިމަތިވާނެ އެވެ.
އިންޑިއާއާ އެކު އެ މައްސަލަ ޑިޕްލޮމެޓިކް ހަމަތަކުގެ މަތިން ހައްލުކުރުމަށް މަސައްކަތް ކުރެވި، އެ ގައުމުގެ ސަރުކާރުގެ އެއްބާރުލުމާ އެކު ރާއްޖޭގައި ތިބި އިންޑިއާ ސިފައިން އަނބުރާ ގައުމަށް ފޮނުވާލައި، ހެލިކޮޕްޓަރު ދުއްވުމަށް މިހާރު މަދަނީ މީހުން ގެނެސްފައިވާ ކަމަށް ވެސް ރައީސް ވިދާޅުވި އެވެ.
ޕްރިންސްޓަން ޔުނިވާސިޓީއަށް ރައީސް ޒިޔާރަތްކުރެއްވީ އެ ޔުނިވާސިޓީގެ ޕަބްލިކް އެންޑް އިންޓަނޭޝަނަލް އެފެއާޒް ސްކޫލްގެ އެޑްވާޑްސް އެސް. ސެންފޯޑް ޕްރޮފެސާ އޮފް ޕޮލިޓިކްސް އެންޑް އިންޓަނޭޝަނަލް އެފެއާޒް، ޑީން އަމާނީ އޭ. ޖަމާލްގެ ދައުވަތަކަށެވެ.