މާލޭގެ ގެއަކަށް ވަދެ މީހަކަށް ތޫނު އެއްޗަކުން ބިރުދައްކައި މާރާމާރީ ހިންގައި އަދި މުދަލަށް ގެއްލުންދިން މައްސަލާގައި ހައްޔަރުކުރި މީހާ އަށް ޖިންސީ ގޯނާކުރުމުގެ ތުހުމަތު ވެސް ކުރާ ކަން އެނގިއްޖެ އެވެ.
އެ ތުހުމަތު ކުރެވޭ ރ. މަޑުއްވަރީ، ދެތަނޑިމާގެ، އިބްރާހިމް ސަމީން، 34، ގެ ބަންދަށް ކްރިމިނަލް ކޯޓުން އިއްޔެ ވަނީ 30 ދުވަސް ދީފަ އެވެ.
ކޯޓު އަމުރުގައިވާ ގޮތުގައި، ސަމީންގެ މައްޗަށް ތުހުމަތު ކުރަނީ ނުރައްކާތެރި ހަތިޔާރު ބޭނުންކޮށްގެން ގްރޫޕް ހަދައިގެން މާރާމާރީ ހިންގުމާއި ބިރުދައްކައި، މުދަލަށް ގެއްލުން ދިނުމާއި އަދި ޖިންސީ ގޯނާ ކުރުމެވެ.
ސަމީން ހައްޔަރު ކުރީ ފުލުހުން އޭނާ ހޯދަން އިއުލާން ކުރުމުން، އަމިއްލަ އަށް ފުލުސް އޮފީހަށް ހާޒިރުވުމުން މިދިޔަ އަންގާރަ ދުވަހު އެވެ.
މި މަހުގެ ދެ ވަނަ ދުވަހު ގުރޫޕަކާއެކު، ސަމީން އެ އެޕާޓްމަންޓަކަށް ވަދެ އެ ތަނުގައި ދިރިއުޅޭ މީހަކަށް ތޫނު އެއްޗަކުން ބިރުދައްކައި ނުރައްކާތެރި ހަތިޔާރުން ހަމަލާދީ، މާރާމާރީ ހިންގުމަށް ފަހު، އެޕާޓްމަންޓުގައި ހުރި މުދަލަށް ގެއްލުން ދީފައިވާ ކަމަށް ފުލުހުން ބުނެފައި ވެ އެވެ.
