އިޒްރޭލާއި އެމެރިކާއިން އީރާނަށް ހަމަލާދޭން ފެށުމާ އެކު ރައްދުގައި އީރާނުން ދޭން ފެށި ހަމަލާތަކާ އެކު ވައިގެ ސަރަހައްދު ބަންދުކުރި ގަތަރުން ވެސް، ބައެއް ދަތުރުތަކަށް ހާއްސަކޮށްގެން ވައިގެ ސަރަހައްދުން ބައެއް ހުޅުވާލަން ނިންމައިފި އެވެ.
"ހާއްސަ، ވަގުތީ ނެވިގޭޝަން ރޫޓްތަކެއް ކަނޑައަޅައި ލިމިޓެޑް އޮޕަރޭޝަނަލް ކެޕޭސިޓީއެއްގައި ވައިގެ ބައެއް ދަތުރުތައް ފަށަން ނިންމާފައިވާކަން އިއުލާނުކުރަން،" ގަތަރުގެ ސިވިލް އޭވިއޭޝަން އޮތޯރިޓީން ނެރުނު ބަޔާނުގައި ބުންޏެވެ.
"މި މަރުހަލާގައި އޮޕަރޭޓްކުރާނީ ތާށިވެފައި ތިބި ފަސިންޖަރުން އުފުލުމަށާއި އެއާ ކާގޯގެ ފްލައިޓްތަކަށް،" ބަޔާނުގައިވެ އެވެ.
ރައްކާތެރިކަމުގެ ޔަގީންކަން ބޮޑު ގަލްފުގެ ގައުމުތަކަށް ގޮސް ތިބި އެތައް ދަތުރުވެރިންނަކަށް ވަނީ އީރާންގެ ރައްދު މިސައިލް އަދި ޑްރޯން ހަމަލާތަކާ އެކު ގަލްފުގެ ގައުމުތައް ބިރުވެރި މަންޒިލްތަކަށް ބަދަލުވެފަ އެވެ. އަދި އެތައް ހާސް ބަޔަކު އެކި ގައުމުތަކުގައި ވަނީ ތާށިވެފަ އެވެ.
ގަތަރު އެއާވޭސް އިން ނެރުނު ބަޔާނެއްގައި ބުނީ ރައްކާތެރި ކޮރިޑޯއެއް ގާއިމްކުރުމަށް ފަހު އެ އެއާލައިނުން ލަންޑަން، ޕެރިސް، މެޑްރިޑް، ރޯމް އަދި ފްރޭންކްފާޓަށް ދަތުރުކުރާނެ ކަމަށެވެ.
ތާށިވެފައި ތިބި އާއިލާތަކާއި އުމުރުން ދުވަސްވީ ފަސިންޖަރުންގެ އިތުރުން ސިއްހީ ފަރުވާއަށް ބޭނުންވާ މީހުންނަށް މި ފްލައިޓުތަކުގައި އިސްކަން ދޭނެ ކަމަށް ވެސް އެ ބަޔާނުގައި ބުނެފައިވެ އެވެ.
ގަތަރުގެ މައި އެއާޕޯޓު ކަމަށްވާ ހަމަދު އިންޓަނޭޝަނަލް އެއާޕޯޓުން ބުނީ ލިމިޓެޑް ދަތުރުތައް ކުރާނީ ތާށިވެފައި ތިބި ފަސިންޖަރުން އުފުލުމަށާއި ކާގޯ އޮޕަރޭޝަންތަކަށް އެކަނި ކަމަށާއި މިއަދު އެ ދަތުރުތައް ފަށާނެ ކަމަށެވެ.
ހަމަދު އިންޓަނޭޝަނަލް އެއާޕޯޓުން ބުނީ ކުރިއަށް އޮތް ދުވަސްތަކުގައި ހާލަތަށް ބަލައި އިތުރު ފްލައިޓްތައް އޮޕަރޭޓްކުރާނެ ކަމަށެވެ.
ގަތަރުގެ ޑިފެންސް މިނިސްޓްރީން ހުކުރު ދުވަހު ބުނި ގޮތުގައި އީރާނުގެ 10 ޑްރޯން ހަމަލާ ދީފައި ވާއިރު އޭގެ ތެރެއިން ނުވަ ހަމަލާއެއް އެ ގައުމުގެ އަސްކަރިއްޔާއިން ހުއްޓުވާފައިވާ ކަމަށެވެ. އެއް ޑްރޯން، މީހުން ނޫޅޭ ސަރަހައްދަކަށް ވެއްޓިފައިވާ ކަމަށާއި މީހަކަށް ގެއްލުމެއް ނުވާ ކަމަށް ވެސް ބުންޏެވެ.
އަންގާރަ ދުވަހު ހަމަދު އިންޓަނޭޝަނަލް އެއާޕޯޓަށް ވެސް ހަމަލާތަކެއް އަމާޒުކުރި ކަމަށާއި އެކަމަކު އެ ހުރިހާ ހަމަލާއެއް ވެސް ނާކާމިޔާބުކޮށްލެވިފައިވާ ކަމަށް ބުންޏެވެ. -- އޭއެފްޕީ