ޓިކްޓޮކްގައި 1.4 މިލިއަނަށް ވުރެ ގިނަ ފޮލޯވަރުން ތިބި، ފަލަސްތީނުގެ މަޝްހޫރު ނޫސްވެރިއެއް ކަމަށްވާ ބިސާން އައުދާ އެ ޕްލެޓްފޯމުން ބޭރުކޮށްލައިފި އެވެ.
ސޯޝަލް މީޑިއާގެ އެކި ޕްލެޓްފޯމްތަކުގައި އިޒްރޭލުގެ އަނިޔާވެރި އަމަލުތައް ހާމަކުރަމުން ގެންދާ، އެމީ އެވޯޑް ވެސް ހާސިލްކޮށްފައިވާ ބިސާންގެ އެކައުންޓް ޓިކްޓޮކުން ޑިލީޓްކޮށްލާފައި މި ވަނީ ޓިކްޓޮކްގެ އެމެރިކާ ކުންފުނީގެ ހިއްސާ އެހެން ކުންފުންޏަކަށް ބަދަލުކުރުމަށް ޑޮނަލްޑް ޓްރަމްޕުގެ ސަރުކާރުން މަޖުބޫރު ކުރުމުން އެ މަރުހަލާ ފުރިހަމަކުރުމާ އެކުގަ އެވެ.
އެމެރިކާއިން ވަނީ ޓިކްޓޮކްގެ ސަބަބުން ގައުމީ ސަލާމަތަށް ނުރައްކާވާ ކަމަށް ބުނެ ގާނޫނެއް ފާސްކޮށް، އެމެރިކާގެ ކުންފުންޏަކަށް ހިއްސާ ބަދަލު ނުކޮށްފި ނަމަ އެ ގައުމުގައި ޓިކްޓޮކް އެއްކޮށް މަނާކުރަން ނިންމައިފަ އެވެ. އެހެންވެ އެކަމުން ސަލާމަތްވުމަށް މިހާރު ވަނީ ކުންފުންޏަށް އެމެރިކާގެ އިންވެސްޓަރެއް ގެނެސްފަ އެވެ.
އަލްޖަޒީރާއަށް ވެސް މަސައްކަތްކޮށްދޭ ބިސާން ވަނީ އޭނާގެ ޓިކްޓޮކް އެކައުންޓް ޑިލީޓްކޮށްލިކަން ހާމަކޮށް އިންސްޓަގްރާމްގައި ވީޑިއޯއެއް އާންމުކޮށްފަ އެވެ.
"ޓިކްޓޮކުން އަހަރެންގެ އެކައުންޓް ޑިލީޓްކޮށްލައިފި. އޭގައި 1.4 މިލިއަން ފޮލޯވަރުން ތިބޭނެ. އެއީ ހަތަރު އަހަރުން ކުރި މަސައްކަތް،" ޣައްޒާގައި ހުރެގެން ރެކޯޑްކޮށްފައިވާ ވީޑިއޯގައި ބިސާން ބުންޏެވެ.
"އަހަރެން އަބަދުވެސް ބަލަމުން އައީ އެކައުންޓް 'ރެސްޓްރިކްޓް' ކޮށްފާނެ ކަމަށް. އެއީ އަބަދުވެސް އެކަން ވަމުން އައި ގޮތް. އެކަމަކު ދާއިމަށް އެކައުންޓް ޑިލީޓްކޮށްލާނެ ކަމަކަށް ހިއެއް ނުކުރަން،" އޭނާ ބުންޏެވެ.
އަލްޖަޒީރާއިން ބުނީ މިކަން ހިނގި ގޮތް ސާފުކުރުމަށް ޓިކްޓޮކްގައި ސުވާލުކުރުމުން އަދި މިހާތަނަށް ޖަވާބެއް ލިބިފައި ނެތް ކަމަށެވެ.
ބިސާންގެ އެކައުންޓް އެކައުންޓް ޑިލީޓްކޮށްލިތާ މާ ގިނައިރެއް ނުވެ ހަމަ އެ ނަމުގައި އެހެން މީހަކު އެކައުންޓެއް ހަދާފައިވާކަން ވެސް އޭނާ ހާމަކޮށްފައިވެ އެވެ. ބިސާން ބުނީ އޭނާގެ ނަމުގައި މިހާރު ޓިކްޓޮކްގައި ހަދާފައިވާ އެކައުންޓުން ޕޯސްޓްކޮށްފައި ހުރީ ބައެއް މީހުންނަށް ބަލަން ފަސޭހަ ނުވާނެ ފަދަ އެއްޗެހި ކަމަށެވެ.
ޓިކްޓޮކްގެ ހިއްސާ ބަދަލުކޮށް، އޭގެ އެމެރިކާ ކުންފުނީގެ ކޮންޓްރޯލް އެހެން ބައެއްގެ އަތްދަށަށް ގެންގޮސްފައި ވަނީ ޓިކްޓޮކްގެ އެ މުއާމަލާތް އެގޮތަށް ކުރިއަށް ގޮސްފި ނަމަ ޓިކްޓޮކްގައި ޔަހޫދީންނާ ދެކޮޅު ކޮންޓެންޓް ކޮންޓްރޯލްކުރެވޭނެ ކަމަށް އުންމީދުކުރާ ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުނެފައި ވަނިކޮށެވެ.
ޒަޔަނިސްޓުންނަށް ތާއީދުކޮށް ސޯޝަލް މީޑިއާގައި އުޅޭ އެކްޓިވިސްޓުންނާ އެކު މިދިޔަ ސެޕްޓެމްބަރު މަހު ނަތަންޔާހޫ ބޭއްވި އެ ބައްދަލުވުމުގައި ބުނީ "މިހާރު ކުރިއަށްދާ އެންމެ މުހިންމު ވިޔަފާރީގެ މުއާމަލާތަކީ ޓިކްޓޮކް" ކަމަށެވެ.
އެމެރިކާ ސަރުކާރުން އެންގި ގޮތަށް ޓިކްޓޮކްގެ އެމެރިކާ ކުންފުނީގެ އޯނަޝިޕް ބަދަލުކުރިކަން ރަސްމީކޮށް އިއުލާނުކުރީ މިދިޔަ ހަފްތާގަ އެވެ.