ކުޑަކުދިންނާއި ޒުވާނުން ސޯޝަލް މީޑިއާއަށް ދެވިހިފާ ގޮތަށް އެޕްލިކޭޝަންތައް ފަރުމާކޮށްފައިވާ ކަމަށް ބުނެ، އެމެރިކާގައި ޓިކްޓޮކާއި މެޓާ އަދި ޔޫޓިއުބާ ދެކޮޅަށް އުފުލާފައިވާ ދައުވާގެ ޝަރީއަތް ފެށެން ކުޑަވަގުތުކޮޅަކަށް ވެފައި ވަނިކޮށް، ޓިކްޓޮކުން ކޯޓުން ބޭރުގައި އެއްބަސްވުމެއް ހަދައި އެ ދައުވާއިން ރެކިއްޖެ އެވެ.
ލޮސް އެންޖެލިސްގެ ކޯޓެއްގައި ކުރިއަށްދާ މި މައްސަލައިގެ ޝަރީއަތަށް ޖޫރީން ހޮވުމުގެ މަސައްކަތް ފެށުމުގެ ކުރިން މި އެއްބަސްވުމަށް އައިސްފައިވާއިރު، މިއީ ސޯޝަލް މީޑިއާ ކުންފުނިތަކުން ގަސްތުގައި ކުދިން ދެވިހިފާނެ ގޮތަށް އެޕްލިކޭޝަންތައް ތައްޔާރުކޮށްފައިވޭތޯ ބަލައި، ގާނޫނީ ގޮތުން ގޮތްތަކެއް ނިންމާނެ މުހިންމު މައްސަލައެކެވެ.
ކެލިފޯނިއާގެ ކޯޓުގައި ހިނގަމުންދާ މި މައްސަލައަކީ މިފަދަ އެހެން މައްސަލަތަކަށް މަގުދައްކައިދޭނެ މުހިންމު ޝަރީއަތެއްގެ ގޮތުގައި ބެލެވެ އެވެ. ސަބަބަކީ މި މައްސަލައިގެ ނިންމުމުގެ މައްޗަށް ބިނާކޮށް، އެމެރިކާގެ އެކި ކަންކޮޅުތަކުގައި މިފަދަ ގިނަ ދައުވާތަކެއް އުފުލުމުގެ ފުރުސަތު އޮތުމެވެ.
މި ދައުވާގައި ދެން ހިމެނޭ ކުންފުނިތަކަކީ ޓެކްނޮލޮޖީގެ ދާއިރާގެ ބޮޑެތި ބާރުތައް ކަމަށްވާ، ޔޫޓިއުބާއި ފޭސްބުކާއި އިންސްޓަގްރާމްގެ މައި ކުންފުނިތައް ކަމަށްވާ އެލްފަބެޓް އަދި މެޓާ އެވެ. މި ޝަރީއަތުގައި ހެކިބަސް ދިނުމަށް މެޓާގެ ބާނީ އަދި ސީއީއޯ މާކް ޒަކަބާގް ހާޒިރުކުރުމަށް ވެސް ވަނީ ހަމަޖެހިފަ އެވެ.
"މި މައްސަލައަށް ސުލްހަވެރި ހައްލެއް ލިބުމުން ދެ ފަރާތުން ވެސް ތިބީ ހިތްހަމަޖެހިގެން،" ކޯޓަށް މައްސަލަ ހުށަހެޅި 'ސޯޝަލް މީޑިއާ ވިކްޓިމްސް ލޯ ސެންޓަރު' އިން ޓިކްޓޮކާ އެކު ވީ އެއްބަސްވުމަށް އިޝާރަތްކޮށް ބުނެފައިވެ އެވެ.
ނަމަވެސް ޓިކްޓޮކާ އެކު ވެފައިވާ އެއްބަސްވުމުގެ ތަފްސީލު ހާމައެއް ނުކުރެ އެވެ.
މި މައްސަލަ ބިނާވެފައިވަނީ ސޯޝަލް މީޑިއާއަށް ދެވިހިފުމުގެ ސަބަބުން ނަފްސާނީ ގޮތުން ބޮޑެތި ގެއްލުންތަކެއް ލިބުނު ކަމަށް ބުނާ، "ކޭޖީއެމް" ގެ ގޮތުގައި ސިއްރު ނަމެއް ދީފައިވާ 19 އަހަރުގެ އަންހެނަކަށެވެ.
އުމުރުން އެންމެ ހަ އަހަރުގައި ޔޫޓިއުބް ބޭނުންކުރަން ފަށައި، 11 އަހަރުގައި އިންސްޓަގްރާމް، 13 އަހަރުގައި ސްނެޕްޗެޓް އަދި 14 އަހަރުގައި ޓިކްޓޮކް ބޭނުންކުރަން ފެށި ކެލިފޯނިއާގެ މި ޒުވާނާ ބުނާ ގޮތުގައި، އެ ޕްލެޓްފޯމްތަކަށް އޭނާ ވަނީ ވަރަށް ބޮޑަށް ދެވިހިފާފަ އެވެ. މީގެ ސަބަބުން ނަފްސާނީ ބަލިމަޑުކަމާއި، ހާސްކަމާއި، އަމިއްލަ ސޫރައާ މެދު ހިތްހަމަނުޖެހުން އުފެދި، އަމިއްލައަށް މަރުވުމުގެ ހިޔާލުތައް އޭނާގެ ހިތަށް ވެރިވި ކަމަށް އޭނާ ބުނެ އެވެ.
ދައުވާގައި ބުނަނީ، އެ ކުންފުނިތަކުން ކުޑަކުދިންނާއި ޒުވާނުން ސޯޝަލް މީޑިއާއަށް ދެވިހިފުވާ ކަމަށާއި، އޭގެ ސަބަބުން ނަފްސާނީ ބަލިތަކާއި، ކެއުމުގެ ނިޒާމަށް އަންނަ ބަދަލުތަކާއި، ނަފްސާނީ ބަލިތަކަށް ފަރުވާދޭ ހޮސްޕިޓަލްތަކުގައި އެޑްމިޓްކުރަން ޖެހުމުގެ އިތުރުން އަމިއްލައަށް މަރުވުމުގެ ހާދިސާތައް ވެސް ހިނގަމުންދާ ކަމަށެވެ.
ޖަޖް ކެރޮލިން ކޫލް ބައްލަވާ މި މައްސަލައިގެ ޝަރީއަތް، ޖޫރީއެއް ހޮވުމަށްފަހު އަންނަ ހަފުތާގައި ފެށޭނެ ކަމަށް ބެލެވެ އެވެ.
ޔޫޓިއުބްގެ ތަރުޖަމާނު ހޯޒޭ ކަސްޓަނޭޑާ ވިދާޅުވެފައިވާ ގޮތުގައި ތުހުމަތުތަކަކީ އެއްވެސް ހަގީގަތެއް އެކުލެވޭ ވާހަކަތަކެއް ނޫނެވެ. އަދި ޒުވާނުންނަށް ރައްކާތެރި އަދި ދުޅަހެޔޮ މާހައުލެއް ފޯރުކޮށްދިނުމަކީ އަބަދުވެސް އެ ކުންފުނީގެ މަސައްކަތުގެ އެންމެ މުހިންމު އަސާސް ކަމަށް އޭނާ ވިދާޅުވި އެވެ. މީގެ އިތުރުން، މެޓާ ކުންފުނިން ވެސް ވަނީ މި ތުހުމަތުތައް ދޮގުކޮށްފަ އެވެ.
ޓިކްޓޮކުން މި މައްސަލަ ހައްލުކުރުމަށް އެއްބަސްވުމަކަށް އައިސްފައިވާއިރު، ސްނެޕްޗެޓުން ވެސް ވަނީ ކޭޖީއެމް އިން ކުރި ދައުވާއާ ގުޅިގެން ޝަރީއަތަކަށް ދިޔުމުގެ ބަދަލުގައި، މައްސަލަ ކޯޓުން ބޭރުގައި ހައްލުކުރުމަށް އެއްބަސްވުމަކަށް އާދެވިފައިވާކަން މިދިޔަ ހަފުތާގައި ބުނެފަ އެވެ. ނަމަވެސް، މި އެއްބަސްވުންތަކުގެ ތަފްސީލެއް އެ ކުންފުނިން ހާމަކޮށްފައެއް ނުވެ އެވެ.