ދިވެހި ޕްރިމިއާ ލީގުގެ ޗެމްޕިއަންކަން ހަވަނަ ފަހަރަށް ހޯދައި ރާއްޖޭގެ އެންމެ ބޮޑު ލީގު ފަތަހަކޮށްފި އެވެ.
މާޒިޔާ އަށް ލީގު ޗެމްޕިއަންކަން ކަށަވަރު ކުރީ، ދިރާގު ދިވެހި ޕްރިމިއާ ލީގުގައި މިއަދު ހަވީރު ބުރު ސްޕޯޓްސްއާ ދެކޮޅަށް ކުޅުނު މެޗުން އޮޑި އަށް މޮޅު ނުވެވުމުންނެވެ.
ގައުމީ ފުޓްބޯޅަ ދަނޑުގައި ބުރާއި އޮޑިގެ މެޗު އެއްވަރުވީ 1-1 ންނެވެ.
އެ ނަތީޖާއާ އެކު އެންމެ ޕޮއިންޓަކުން އޮޑި ފުއްދާލުމުން މާޒިޔާ އަށް ބާކީ ދެ މެޗު އޮއްވައި ލީގު ކަށަވަރުވީ، އެ ދެމެޗުން މާޒިޔާ ބަލިވިޔަސް އޮޑި އަށް މާޒިޔާއާ ޕޮއިންޓްގެ ގޮތުން ހަމަހަމަ ނުކުރެވޭނެތީ އެވެ.
ކުޅުނު 16 މެޗުން މާޒިޔާ ވަނީ 44 ޕޮއިންޓް ހޯދާފަ އެވެ. މިއަދު ކުޅުނު މެޗާ އެކު އޮޑި އަށް ހަމަކުރެވުނީ 39 ޕޮއިންޓެވެ. އެ ޓީމަށް ބާކީ އޮތީ އެންމެ މެޗެކެވެ. އެއީ ލީގުގެ ފަހު މެޗުގައި މާޒިޔާއާ ދެކޮޅަށް ކުޅޭ މެޗެވެ. އެ މެޗުން އޮޑި މޮޅުވިޔަސް އެ ޓީމަށް ލިބޭނީ 43 ޕޮއިންޓެވެ.
މާޒިޔާގެ މި ކާމިޔާބާ އެކު އެ ޓީމުން ވަނީ ރާއްޖޭގެ ލީގު އެންމެ ގިނަ ފަހަރު ހޯދި ޓީމުގެ މަގާމު ހޯދާފަ އެވެ. ރާއްޖޭގެ މައި ލީގު ދިވެހި ޕްރިމިއާ ލީގުގެ ނަމުގައި 2015 ގައި ތައާރަފު ކުރި ފަހުން ލީގުގެ އެންމެ ކާމިޔާބު ޓީމަކީ ވެސް މާޒިޔާ އެވެ.
މާޒިޔާގެ ކާމިޔާބާ އެކު އެ ޓީމުން ވަނީ ރާއްޖޭގެ ލީގުގެ ރެކޯޑްގައި ނިއު ރޭޑިއަންޓާ އެއްވަރަށް އެ އައްޑަނަ މިހާރު ހޯޑާފަ އެވެ. ދެހާސްވަނަ އަހަރު ތައާރަފު ކުރި ދިވެހި ލީގު ހަތަރު ފަހަރު ނިއުއިން ވަނީ ކާމިޔާބުކޮށްފަ އެވެ. އަދި ދިވެހި ޕްރިމިއާ ލީގުގެ ނަމަށް ރާއްޖޭގެ މައި ލީގު ބަދަލުކުރި ފަހުން ނިއުއިން ވަނީ ދެ ފަހަރަށް މުބާރާތުގެ އައްޑަނަ ހޯދާފަ އެވެ.
މާޒިޔާއިން މިރޭ ނުކުންނާނީ ނިއު ރޭޑިއަންޓާ ދެކޮޅަށެވެ.
މިއަދު ކުޅުނު މެޗުގައި ބުރުގެ ޝަމްވީލް މުހައްމަދު، ބުރަށް ލިޑް ނަގާފައިވަނިކޮށް ދެވަނަ ހާފުގައި އޮޑި އަށް ނަތީޖާ ހަމަހަމަކޮށްދިނީ ކިއާނޫ މާޝް ބްރައުން އެވެ.