ލަނޑު ޖެހުމުގެ ރޭޓް ދައްވެފައިވާ ހާލިން ހާލަންޑަށް އެ ހާލަތު ކުރިމަތިވުމުގެ ޒިންމާ މެންޗެސްޓާ ސިޓީގެ މުޅި ޓީމުން ނަގަން ޖެހޭނެ ކަމަށް ކޯޗު ޖޯސެފް ޕެޕް ގާޑިއޯލާ ބުނެފި އެވެ.
ނޯވޭގެ ފޯވާޑް ހާލަންޑަށް އެންމެ ފަހުން ލަނޑު ޖެހުނީ މި މަހު ކުރީކޮޅު ބްރައިޓަންއާ ދެކޮޅަށް ކުޅުނު މެޗުގައި ޕެނަލްޓީއަކުންނެވެ. ޑިސެމްބަރު 25 ގެ ފަހުން އޯޕަން ޕްލޭގައި އޭނާ އަށް ލަނޑެއް ޖެހިފައެއް ނުވެ އެވެ.
ގާޑިއޯލާ ބުނީ ހާލަންޑަށް ކުރިމަތިވެފައިވާ ގޮންޖެހުންތަކުން އަރައިގަންނަން ސިޓީގެ ޓީމުން އެހީތެރިވާން ޖެހޭނެ ކަމަށެވެ. ގާޑިއޯލާ ދާދި ފަހުން ބުނި ގޮތުގައި 20 ގޯލް ޖަހައިގެން ޕްރިމިއާ ލީގުގެ ލަނޑު ލިސްޓްގެ އެއް ވަނައިގައި އޮތް އޭނާގެ ސްޓާ ފޯވަޑް ހާލަންޑް ހުރީ ވަރުބަލިވެފަ އެވެ. މިދިޔަ ހޮނިހިރު ދުވަހު ވުލްވްސް އަތުން 2-0 އިން މޮޅުވި މެޗުގައި އުމުރުން 25 އަހަރުގެ ހާލަންޑަށް ނުހިމަނައި ގާޑިއޯލާ ވަނީ އޭނާ އަށް އަރާމުކުރަން ވަގުތު ދީފަ އެވެ.
އެ މެޗަށް ފަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ގާޑިއޯލާ ބުނީ ހާލަންޑަށް އެހީވާން އޭނާގެ ޓީމު ރަނގަޅު ކުޅުމެއް ދައްކަން ޖެހޭ ކަމަށެވެ.
"ގޯލް ޖަހާނެ އިތުރު ފުރުސަތުތައް އުފައްދައި ތަނަވަސްކޮށް ދީފިނަމަ އޭނާ ލަނޑު ޖަހާނެ. ގޯލް ޖަހާ ކުޅުންތެރިން ފެންވަރު ދަށްވެދާނެކަމަށް ހީނުކުރާތި. އަހަރެމެން ބޭނުންވަނީ އޭނާ މުޅި އުމުރަށް ވެސް ލަނޑު ޖެހަން މަސައްކަތް ކުރަން،" ގާޑިއޯލާ ބުންޏެވެ.
ޗެމްޕިއަންސް ލީގުގައި ސިޓީން މިރޭ ނުކުންނާނީ ގަލަތަސާރާއީއާ ދެކޮޅަށެވެ. އެ މެޗަށް ޓީމުގެ މިޑްފީލްޑަރު ރޮޑްރީ ހެނާންޑޭޒް ވަނީ ސަސްޕެންޑް ވެފަ އެވެ. އެއީ އެންމެ ފަހުން ނޯވޭގެ ބޯޑޯ/ގްލިމްޓް އަތުން ބަލިވި މެޗުގައި އޭނާ އަށް ދެއްކި ރަތްކާޑާ ގުޅިގެންނެވެ.