ލާދީނީ ކަންކަމާއި ހަރުކަށި ފިކުރާއި ހުއްދަ ނޫން ވިޔަފާރިތަކާ ދެކޮޅަށް މަސައްކަތްކުރުމާ ބެހޭ ގޮތުން ކަމާ ގުޅޭ އިދާރާތަކުގެ އިސްވެރިން މިއަދު އެއްބަސްވެއްޖެ އެވެ.

އިސްލާމިކް މިނިސްޓްރީގައި ބޭއްވި ބައްދަލުވުމުގައި އިސްލާމިކް މިނިސްޓަރު ޑރ. އަހުމަދު ޒާހިރާއި ހޯމް މިނިސްޓަރު އިމްރާން އަބްދުﷲ އަދި ޕޮލިސް ކޮމިޝަނަރު މުހައްމަދު ހަމީދު ބައިވެރިވެވަޑައިގެން ލާދީނީ ފިކުރުތަކާ ގުޅޭގޮތުން ހުށަހަޅާ މައްސަލަތަކާ ގުޅޭގޮތުން މަޝްވަރާ ކުރެއްވި އެވެ.

ޝަރީޢަތާ ހިލާފު ޢަމަލުތައް ހުއްޓުވަން އެޅޭނެ ފިޔަވަޅުތަކާ ގުޅޭ ގޮތުން، އިސްލާމިކް މިނިސްޓަރު ޑރ. އަހުމަދު ޒާހިރު، ކަމާގުޅޭ އިދާރާތަކުގެ އިސްވެރިންނާ މިއަދު ބައްދަލުކުރައްވަނީ.-- ފޮޓޯ: އިސްލާމިކް މިނިސްޓްރީ
ޝަރީޢަތާ ހިލާފު ޢަމަލުތައް ހުއްޓުވަން އެޅޭނެ ފިޔަވަޅުތަކާ ގުޅޭ ގޮތުން، އިސްލާމިކް މިނިސްޓަރު ޑރ. އަހުމަދު ޒާހިރު، ކަމާގުޅޭ އިދާރާތަކުގެ އިސްވެރިންނާ މިއަދު ބައްދަލުކުރައްވަނީ.-- ފޮޓޯ: އިސްލާމިކް މިނިސްޓްރީ

އެ ބައްދަލުވުމުގައި، އިސްލާމް ދީނުގެ ނަމުގައި ހިންގާ ހަރުކަށި އަމަލުތަކާއި އިސްލާމީ އަހުލާގީ މިންގަނޑުން ބޭރު އަމަލުތަކާއި އިސްލާމީ ޝަރީއަތް ހުއްދަނުކުރާ ވިޔަފާރިތައް މުޖުތަމައުގައި އާއްމުވަމުންދާތީ އެ ކަންކަން ހުއްޓުވުމަށް ކުރަންޖެހޭ މަސައްކަތްތަކާ ގުޅޭ ގޮތުން ވެސް މަޝްވަރާކޮށް އެކަންކަމާ ދެކޮޅަށް މަސައްކަތްކުރުމަށް އެއްބަސްވެފައިވާ ކަމަށް އިސްލާމިކް މިނިސްޓްރީން ބުންޏެވެ.

މިނިސްޓްރީން ބުނީ، ގާނޫނީ ބާރު ލިބިގެން އެފަދަ މައްސަލަތައް ހައްލުކުރުމާއި އިދާރާތަކުގެ އިސްވެރިންނާ އެކު މަޝްވަރާކޮށްފައިވާ ކަމަށެވެ.

މި މަޝްވަރާތައް ކޮށްފައި މި ވަނީ ހަރުކަށި ފިކުރާއި ލާދީނީ އަމަލުތަކުގެ މައްސަލަތައް ރާއްޖޭގައި އިތުރުވަމުންދާ ކަމުގެ ކަންބޮޑުވުން އޮތް ވަގުތެއްގަ އެވެ.