ދަރިވަރުން މަދު ސްކޫލުތަކުގައި މަލްޓިގްރޭޑް ސިސްޓަމަށް ކިޔަވައިދިނުން މުޅި ރާއްޖެއަށް ރަސްމީކޮށް ފަށައިފި އެވެ.
އެ ސިސްޓަމް ރާއްޖޭގެ ސްކޫލުތަކަށް ތައާރަފްކޮށްދެއްވީ ވ. އަތޮޅު ތައުލީމީ މަރުކަޒުގައި މިއަދު ހަވީރު ބޭއްވި ރަސްމިއްޔާތެއްގައި، ޑރ. އާއިޝަތު ޝިހާމެވެ.
މަލްޓި ގްރޭޑް ޓީޗިން އަކީ އާބާދީ މަދު ސްކޫލުތަކުގައި ރަނގަޅު ފެންވަރެއްގައި ދަރިވަރުންނަށް ތައުލީމު ފޯރުކޮށްދިނުމަށް، ދަރިވަރުންނަށް ކްލާސްރޫމެއްގެ މާހައުލުން ލިބެންޖެހޭ މައުލޫމާތާއި ހުނަރުތައް ލިބިގަތުމަށްޓަކައި އެއް ގްރޭޑަަކަށް ވުރެ ގިނަ ގްރޭޑުތައް އެއްކޮށް، ދަރިވަރުންގެ ފެންވަރާ ގުޅޭގޮތުން އެއް ކްލާސްރޫމެއްގައި ކިޔަވައިދިނުމުގެ ނިޒާމެކެވެ.
އެޑިއުކޭޝަން މިނިސްޓްރީން ބުނީ ދަރިވަރުންގެ އަދަދު މަދުކަމުން، 44 ސްކޫލެއްގައި މިހާރު މަލްޓި ގްރޭޑް ސިސްޓަމަށް ކިޔަވައިދޭން ފަށާފައިވާ ކަމަށެވެ.
އެ ނިޒާމަށް ކިޔަަވައިދޭން ފެށުމުގެ މަގުސަދަކީ، އެޑިއުކޭޝަނުން ބުނިގޮތުގައި، ގާބިލް ޓީޗަރުން މަދުވުމުން ލިބޭ އުނިކަން ކުޑަކުރުމާއި ދަރިވަރުންގެ އިޖުތިމާއީ ހުނަރު ތަރައްގީ ކުރުމުގެ އިތުރުން ގުޅިގެން މަސައްކަތް ކުރުމުގެ ރޫހު އާލާކޮށްދިނުމެވެ.
އާބާދީ މަދު ސްކޫލުތަކުގައި ހުރިހާ ކްލާހަކަށް ޓީޗަރުން ހަމަކޮށް ކިޔަވައިދިނުމަކީ އިގުތިސާދީ ގޮތުން ދެކޮޅު ނުޖެހޭ އަދި ހަރަދު ބޮޑު ކަމެއްކަން މިނިސްޓްރީން ފާހަގަކުރި އެވެ. އެހެންކަމުން، ރާއްޖެ އުފެދިފައިވާ ގޮތުން ތައުލީމް ފޯރުކޮށްދިނުމުގައި އެޅޭ ހުރަސްތައް ކުޑަކޮށްދިނުމާއި އެންމެ ކުއްޖަކު ވެސް ބާކީ ނުވާނެކަން ކަށަވަރު ކުރެވުމާއި ކުދި ރަށްތަކުގެ އާބާދީއަށް ވެސް ސަމާލުކަން ދެވޭނެތީ މަލްޓިގްރޭޑް ޓީޗިން ރާއްޖެ ފަދަ ގައުމަކަށް މުހިއްމު ކަމަށް މިނިސްޓްރީން ބުންޏެވެ.
އާބާދީ މަދު ސްކޫލުތަކަށް އަމާޒުކޮށްގެން މަލްޓި ގްރޭޑް ޓީޗިން 2015 ވަނަ އަހަރު ތައާރަފުކޮށް އެކަން ޓެސްޓުކުރަން ފަށާފައިވާ ކަމަށް މިނިސްޓްރީން ބުންޏެވެ. އަދި މިވީ ދުވަސްތަކުގައި އެ ނިޒާމަށް ކިޔަވައިދޭ ޓީޗަރުން ތަމްރީނުކޮށް، އެފަދަ ސްކޫލުތަކުގައި ބޭނުންކުރާ ވަސީލަތްތައް ވެސް ސްކޫލުތަކުގައި ގާއިމްކޮށްފައިވާ ކަމަށް ބުންޏެވެ.
ވޭތުވެދިޔަ ތިން އަހަރުގެ ތެރޭގައި މަލްޓި ގްރޭޑް ޓީޗިންނަށް 400 އަށްވުރެ ގިނަ ޓީޗަރުން ވަނީ ތަމްރީނުކޮށްފަ އެވެ.
އެޑިއުކޭޝަން މިނިސްޓްރީން ބުނީ ކްލާސް ރޫމުގައި ދަރިވަރުންގެ އަދަދު މަދުވުމުން، އެ ދަރިވަރުންނަށް މުއާމަލާތްކޮށްގެން އެއްޗެހި ދަސްކުރާ މިންވަރު ކުޑަވެގެންދާ ކަމަށެވެ. އަދި އޭގެ ސަބަބުން ވިސްނުމާއި އެ ދަރިވަރުންގެ އިޖުތިމާއީ ތަރައްގީއަށް އަސަރުފޯރައި ޑިމޮކްރެޓިކް ވެއްޓެއްގައި ގިނަ ބަޔަކާއެކު އުޅުމުގެ ގާބިލްކަން ލިބުން ކުޑަވާކަން ވެސް ފާހަގަކުރި އެވެ.
