ދަރިންނަށް ދެ އަހަރު ފުރެންދެން، މުވައްޒަފުންނަށް ކޮންމެ ދުވަހަކު ހުސް ވަގުތު ދޭންޖެހޭ ގޮތަށް ވަޒީފާއާ ބެހޭ ގާނޫނަށް ހުށަހަޅާފައިވާ އިސްލާހު ރައްޔިތުންގެ މަޖިލީހުން މިއަދު ފާސްކޮށްފި އެވެ.
ވަޒީފާ އާ ބެހޭ ގާނޫނު އޭރު އޮތް ގޮތުން، ދުވާލަކު ދެ ފަހަރު 30 މިނެޓުގެ ހުސް ވަގުތުކޮޅެއް އަންހެން މުވައްޒަފުންނަށް ލިބެނީ ދަރިފުޅަށް އެއް އަހަރު ފުރުމާ ހަމައަށެވެ.
ސަރުކާރުގެ ފަރާތުން މަޑަވެލި ދާއިރާގެ މެމްބަރު މުހައްމަދު ޝަމީޒް ހުށަހެޅުއްވި އެ ބިލްގައި ވަނީ ދަރިފުޅުގެ އުމުރުން ދެ އަހަރު ވަންދެން ކޮންމެ ދުވަހަކު ދެ ފަހަރަށް 30 މިނެޓްގެ ހުސް ވަގުތުކޮޅެއް މުވައްޒަފުންނަށް ދޭންޖެހޭ ގޮތަށް ބަދަލު ކުރުމަށެވެ.
ވަޒީފާއާ ބެހޭ ގާނޫނަށް ގެނައި އިސްލާހުގައި މުވައްޒަފުން ވަކި ކުރަން ނޯޓިސް ދިނުމާއި އިތުރު ގަޑީގެ ފައިސާ އަށް ވެސް ބަދަލު ވަނީ ގެނެސްފަ އެވެ،
އެގޮތުން އެއް އަހަރަށް ވުރެ ދިގު ނޫން މުއްދަތެއްގައި ވަޒީފާގެ އެއްބަސްވުން ހަދާފައިވާ މުވައްޒަފަކު ވަކިކުރާ ނަމަ އެ މުވައްޒަފަކަށް ދެ ހަފުތާގެ ނޯޓިސް ދޭން ޖެހޭނެ ކަމަށް އިސްލާހުގައި ވެ އެވެ.
އިސްލާހުގައި ބުނީ އިތުރުގަޑީގައި މުވައްޒަފަކާ ލައްވާ މަސައްކަތް ކުރުވަން ޖެހޭނީ އެއްބަސްވުމެއްގެ ދަށުން ކަމަށެވެ.
މީގެ އިތުރުން ބައެއް ބާވަތުގެ ވިޔަފާރިތަކަށް ބިދޭސީން ގެނައުމަށް ދައްކަންޖެހޭ ކޯޓާ ފީ ދެއްކުމުން އިސްތިސްނާ ކުރުމުގެ ބާރު ކެބިނެޓަށް ލިބޭ ގޮތަށް ވެސް އެ ބިލްގައި ވަނީ ހިމަނައިފަ އެވެ. ނަމަވެސް އެގޮތަށް އިސްތިސްނާއެއް ދެވޭނީ ކުދި އަދި މެދުފަންތީގެ ވިޔަފާރިތައް ކުރިއެރުވުމަށާއި އާ ވިޔަފާރިތަކަށް ފުރުސަތު ދިނުމާއި ވިޔަފާރީގެ ވާދަވެރިކަން އުފެއްދުމަށް ކަމަށް އެ ބިލްގައި ބުނެފައިވެ އެވެ.
އެ ބިލު ފާސްކުރުމުގެ ކުރިން، އެމްޑީޕީގެ ފަރާތުން ދަރިން ގާތަށް ދިޔުމަށް ދޭންޖެހޭ ހުސްވަގުތު ޖުމްލަ ދޮޅު ގަޑިއިރަށް އިތުރުކުރަން ހުށަހެޅިޔަސް، އެ އިސްލާހަށް ތާއީދެއް ނުލިބުނެވެ.
މީގެއިތުރުން، ކޯޓާ ފީ ދެއްކުމުން އިސްތިސްނާ ކުރުމުގެ ކުރިން މަޖިލީހަށް ހުށަހަޅައިގެން ފާސްކުރަންޖެހޭ ގޮތަށް ހަދަން އެމްޑީޕީން ހުށަހެޅި އިސްލާހަށް ވެސް ތާއީދު ނުލިބި ވަނީ ބޭރުވެފަ އެވެ.
އެއާ އެކު، ވަޒީފާއާ ބެހޭ ގާނޫނަށް ގެނައި އިސްލާހުތައް މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީން ދިރާސާކޮށް ނިންމިގޮތަށް، މަޖިލީހުގެ މިއަދުގެ ޖަލްސާގައި ފާސްކޮށްފައިވަނީ އެކަމަށް ނެގި ވޯޓުގައި ބައިވެރިވެވަޑައިގެންނެވި 62 މެމްބަރުންގެ އިއްތިފާގުންނެވެ.