ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު ދެ ދުވަސްވަރެއްގައި ބޭއްވުމަކީ ގައުމުގެ ހަމަޖެހުން ގެއްލިގެން ދިއުމަށް މެދުވެރިވާ ކަމެއް ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
އަންނަ މަހު ހަތަރެއްގައި ބާއްވާ ލޯކަލް ކައުންސިލް އިންތިހާބަށް ޕީއެންސީގެ "ދަ ގްރޭޓާ އައްޑޫ" ކެމްޕެއިން އިފުތިތާހުކުރުމަށް ހެންވޭރު އާޓިފިޝަލް ބީޗުގައި ބޭއްވި ރަސްމިއްޔާތުގައި ރައީސް މުއިއްޒު ވިދާޅުވީ އިދިކޮޅު ފަރާތްތަކުން ދެ އިންތިހާބު އެއްކޮށްލަން އުޅެނީ ކަމަށް ކިޔަނީ ރައްޔިތުންނަށް އޮޅުވާލަން ކަމަށެވެ. ދެ އިންތިހާބު އެއްކޮށްލަން ނޫޅޭ ކަމަށާއި ސަރުކާރުން ކުރަން އުޅޭ ކަމަކީ ދެ އިިންތިހާބު އެއް ދުވަހެއްގައި ބޭއްވުން ކަމަށް ރައީސް ވިދާޅުވި އެވެ.
"ގާނޫނުއަސާސީގައި ކަނޑައަޅާފައި އޮތް ގޮތަށް، ދެ އިންތިހާބު އެއް ދުވަހެއްގައި ބޭއްވުމަށްޓަކާ ރައްޔިތުންގެ މަޖިލީހުގެ މިހާރު ހިނގަމުންދާ ދައުރު ކުރުވާން ޖެހޭތީވެ، އެކަމަށްޓަކާ ރައްޔިތުންގެ ކިބައިގައި މި އަހަނީ، އެ ދައުރު ކުރުކޮށް ދެ އިންތިހާބު އެއް ދުވަހެއްގައި ބޭއްވުމަށް ރައްޔިތުންނަށް ފެނޭތޯ،" ރައީސް ވިދާޅުވި އެވެ.
ރައީސް ވިދާޅުވީ ދެ އިންތިހާބު އެއް ދުވަހެއްގައި ބޭއްވުމުން ވީހާވެސް ގިނަ ރައްޔިތުންނަށް ވޯޓުގައި ބައިވެރިވުމުގެ ފުރުސަތު ލިބޭ ކަމަށެވެ. އިލެކްޝަންސް ކޮމިޝަންގެ ތަފާސްހިސާބުތަކުން ވެސް ދައްކާ ގޮތުގައި، އެންމެ ގިނަ ރައްޔިތުން ވޯޓުލަނީ ރިޔާސީ އިންތިހާބުގައިކަން އެނގޭ ކަމަށް ރައީސް ވިދާޅުވި އެވެ.
"ރިޔާސީ އިންތިހާބުގައި އެންމެ ގިނަ ރައްޔިތުން ވޯޓުލާފައި ވަނީ. ނަމަވެސް މަޖިލިސް އިންތިހާބުގައި 10-12 ޕަސެންޓް މީހުން މަދުން ވޯޓުލަނީ. އެކަމަކު ރައްޔިތުންގެ މަންދޫބުން ހޮވަންށޭ މި އުޅެނީ،" ރައީސް ވިދާޅުވި އެވެ.
"ޑިމޮކްރަސީއެއްގައި ވިއްޔާ ރައްޔިތުން އެ ރައްޔިތުންގެ މަންދޫބުން ހޮވަން ވޯޓުލާ އަދަދު މަދުވެގެން ދިއުމަކީ ޑިމޮކްރަސީއަކަށް އަންނަ ހީނަރުކަމެއް. މިއީ ޑިމޮކްރެޓިކް ގައުމެއް. އެހެނެއް ނޫން، ރައްޔިތުންގެ މަންދޫބުން ހޮވަން ނުކުންނަ މީހުންގެ އަދަދު ގިނަވެއްޖެއްޔާ އެ ޑިމޮކްރަސީ ފައްކާވެގެން އެބަދޭ."
އެހެންކަމުން، އެންމެ ގިނަ ރައްޔިތުން ވޯޓުލާ ދުވަހު މަޖިލިސް އިންތިހާބު ވެސް ބޭއްވުމަކީ އެ ރައްޔިތުންގެ މަންދޫބުން ހޮވުމަށްޓަކާ އެންމެ ގިނަ ވޯޓު ލިބޭނެ ދުވަސް ކަމަށް ރައީސް ވިދާޅުވި އެވެ.
އޭރުން މަޖިލީހުގައި ރައްޔިތުން ތަމްސީލުކުރާ މެމްބަރުންނަކީ ވީހާ ވެސް ގިނަ ރައްޔިތުންގެ ވޯޓުލައިގެން ހޮވިފައި ތިބި ބަޔަކަށް ހެދޭނެ ކަމަށް ރައީސް ވިދާޅުވި އެވެ.
ރައީސް ވިދާޅުވި ގޮތުގައި، ދެ އިންތިހާބު ދެ އިރެއްގައި ބޭއްވުމުން ފައިދާއަށް ވުރެ ލިބޭ ގެއްލުން ބޮޑެވެ.
"އެންމެ ބޮޑު ގެއްލުމަކީ ގައުމުގައި ހަމަޖެހުން ގެއްލިގެން ދިއުން. އަޅުގަނޑުގެ މައިގަނޑު އެއް ސިޔާސަތަކީ ހަމަޖެހުން ގާއިމްކުރުން،" ރައީސް ވިދާޅުވި އެވެ.
"މި ރާއްޖޭގެ ރައްޔިތުން އަޅުގަނޑުމެންނާ ސިޔާސީ ގޮތުން ކިތަންމެ ހިޔާލު ތަފާތަސް، މިހާރު ގަބޫލުކުރާނެ މި ގައުމުގައި ސިޔާސީ ހަމަޖެހުން އެބައޮތްކަން. މިހާރު ނުހުންނާނެ މިއަދާ ހަމައަށް އައިރުގައި ސިޔާސީ ގޮތުން އަދަބެއް ދީފައި ހުރި މީހެއް، ޖަލަށް ލާފައި ހުރި މީހެއް ނުހުންނާނެ."
އެކަމަކު، މީގެ ކުރިން ކަންތައްތައް ވެފައި އޮތީ އެހެން ނޫން ކަމަށާއި ވެރިކަމާ ހަވާލުވުމާ އެކުގައި އެންމެފަހުން ވެރިކަން ކުރި މީހާ ޖަލަށް ލުމުގެ ސަގާފަތެއް އުފެދިފައި އޮތް ކަމަށް ރައީސް ވިދާޅުވި އެވެ.
ރައީސް ވިދާޅުވީ އެއީ އެމަނިކުފާނު ގަބޫލުކުރައްވާ ހަމައެއް ނޫން ކަމަށެވެ. ސިޔާސީ ފިކުރު ކޮންމެ ގޮތަކަށް ހުއްޓަސް، ކުށެއް ނުކުރާހާ ހިނދަކު ޖަލަށް ލައިގެން ނުވާނެ ކަމަށް ރައީސް ވިދާޅުވި އެވެ.
ރައީސް ވިދާޅުވީ މި ސަރުކާރު އުފެދި ފުރަތަމަ ހަ މަސްދުވަހު އެމްޑީޕީގެ ސުޕަމެޖޯރިޓީ އޮތް މަޖިލީހުން ވަރަށް ގިނަ އުނދަގޫތައް ކުރިމަތި ކުރުވި ކަމަށާއި ސަރުކާރުގެ މަސައްކަތްތަކަށް ހުރަސްއެޅުމުގެ ސަބަބުން އަހަރެއްހާ ދުވަހު އެތައް ކަމެއް ނުވެ ދިޔަ ކަމަށެވެ. އެމަނިކުފާނުގެ ނޯ ކޮންފިޑެންސް ވޯޓެއް ނަގައި، ރިޔާސީ އިންތިހާބުގައި ރައްޔިތުން ނިންމި ނިންމުން ބޮލާލައިޖަހަން އުޅުނު ކަމަށް ރައީސް ވިދާޅުވި އެވެ.
އެއީ ވެސް ދެ އިންތިހާބު އެއް ދުވަހެއްގައި ބާއްވަން ޖެހޭ ސަބަބެއް ކަމަށް ރައީސް ވިދާޅުވި އެވެ.
ދެ އިންތިހާބު އެއް ދުވަހެއްގައި ބާއްވާ ގޮތަށް ގާނޫނުއަސާސީ ބަދަލުކުރަން ސަރުކާރުގެ ފަރާތުން ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހީމް ފަލާހު ހުށަހެޅުއްވި ބިލު ރައްޔިތުންގެ މަޖިލީހުން ފާސްކުރީ މިދިޔަ މަހުގެ 10 ވަނަ ދުވަހު އެވެ.
ދެ އިންތިހާބު އެއްކޮށް ބޭއްވުމުގެ ބަދަލު ގާނޫނުއަސާސީއަށް ގެނެވޭނީ ރައްޔިތުންގެ އާންމު ވޯޓަކުން އެކަމަށް އަޣުލަބިއްޔަތު ލިބިގެންނެވެ. އެހެންވެ، އެ ބަދަލާ ގުޅޭ ގޮތުން އަންނަ މަހު ބާއްވާ ލޯކަލް ކައުންސިލް އިންތިހާބާ އެކު ބާއްވަން އިލެކްޝަންސް ކޮމިޝަނުން ވަނީ ނިންމައިފަ އެވެ.
ރައީސް ކުރިން ވިދާޅުވެފައިވާ ގޮތުގައި، ރިޔާސީ އިންތިހާބާއި ރައްޔިތުންގެ މަޖިލިހުގެ އިންތިހާބު އެއްކޮށް ބޭއްވުމުން ބޮޑު ހަރަދެއް ސަލާމަތް ކުރެވޭނެ އެވެ. އެގޮތުން މިހާރު ހުރި ލަފާކުރުންތަކަށް ބަލާއިރު އެ ބަދަލާ އެކު، ބަޖެޓުން 80 މިލިއަން ރުފިޔާ ސަލާމަތް ކުރެވޭނެ އެވެ.