ރާއްޖެ އަށް މަސްތުވާތަކެތި އެތެރެކުރި މައްސަލައެއްގައި ފަސް މީހަކު ހައްޔަރުކޮށްފި އެވެ.
ވެލާނާ އިންޓަނޭޝަނަލް އެއާޕޯޓުން ހައްޔަރުކުރި އެ ފަސް މީހުންގެ ތެރެއިން ތިން މީހެއްގެ އަތުން ހަ ކިލޯ އަށް ވުރެ ގިނަ މަސްތުވާތަކެތި ފެނުނު ކަމަަށް ފުލުހުން ބުންޏެވެ.
އެ ކޭސްގައި ހައްޔަރުކުރީ އިންޑިއާގެ ދެ މީހަކާއި ދިވެއްސެކެވެ.
އެއީ:
- އަލީ އިރުފާން، 28، ހިތިލާގެ، ގދ. ގައްދޫ
- ދަނޫޝްކާނދަން ގޯޕާލް، 19، އިންޑިއާ
- ކަތިރިވިލް މަނިމަރަން، 21، އިންޑިއާ
އެ ތިން މީހުން ހައްޔަރުކުރީ ރާއްޖެ އަށް ޑްރަގް އެތެރެކޮށް ވިއްކައި، ވިޔަފާރިކުރާކަމުގެ ތުހުމަތުގައި މިދިޔަ އަންގާރަ ދުވަހު ކަމަށް ފުލުހުން ބުންޏެވެ.
އެ މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން އިރުފާނު ވަނީ ޝަރީއަތް ނިމެންދެން ބަންދު ކުރަން ކޯޓުން އަމުރު ކޮށްފަ އެވެ. އަދި އިންޑިއާ ދެ މީހުން ފަސް ދުވަހަށް ބަންދުކުރުމަށް އަމުރުކޮށްފައިވާ ކަމަށް ފުލުހުން ބުންޏެވެ.
ދެވަނަ ކޭސްގައި ވެސް ހައްޔަރުކުރީ އިންޑިއާ އިން އައި އެ ގައުމުގެ ދެ މީހެކެވެ. އެއީ:
- ޖައިނަބު ވާޖިދު އަލީ، 25
- މުހައްމަދު ނަވާޒް ދަޔަތަރު، 21
ފުލުހުން ބުނީ އެއީ ރާއްޖެ އައިއިރު، ކިލޯއަކަށް ވުރެ ގިނަ ޑްރަގް ރާއްޖެ އެތެރެކުރިކަމުގެ ތުހުމަތުގައި ކަސްޓަމްސް އިން ފުލުހުންނާ ހަވާލުކުރި ދެ މީހުން ކަމަށެވެ.
އެ ދެ މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން ދެ މީހުން ވެސް ފަސް ދުވަސް ބަންދުގައި ބައިތިއްބަން އަމުރު ކޮށްފައިވާ ކަމަށް ފުލުހުން ބުންޏެވެ.