އިދިކޮޅު އެމްޑީޕީގެ ފަރާތުން އައްޑޫގައި އިސްވެ ހަރަކާތްތެރިވި ފަރާތްތަކެއް ސަރުކާރު ހިންގާ ޕާޓީ ޕީއެންސީއާ ރޭ ގުޅިއްޖެ އެވެ.
އެ މީހުންގެ ފޯމު ރައީސް އަދި ޕީއެންސީގެ ރައީސް ޑރ. މުހައްމަދު މުއިއްޒާ ހަވާލުކުރީ ކުރިއަށް އޮތް ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގެ އިންތިހާބުގައި އެ ޕާޓީގެ ޓިކެޓުގައި އައްޑޫން ވާދަކުރާ ކެންޑިޑޭޓުން މާލޭގައި ބޭއްވި ހާއްސަ ޖަލްސާގަ އެވެ.
ޕީއެންސީއާ އަލަށް ގުޅުނު އެމްޑީޕީގެ އައްޑޫގެ އިސް މީހުންގެ ތެރޭގައި ހިމެނެނީ:
- އެމްޑީޕީގެ އައްޑޫގެ ކުރީގެ ރައީސް އަހުމަދު އަދުހަމް
- އެމްޑީޕީގެ ފޭދޫ ދާއިރާގެ ކުރީގެ ރައީސް އަބްދުﷲ ސައީދު
- އެމްޑީޕީގެ ފޭދޫ ދާއިރާގެ ކުރީގެ ނައިބު ރައީސް މުހައްމަދު ސައީދު (ދަގޭ)
- އަންހެނުންގެ ތަރައްގީގެ ކޮމިޓީގެ މިހާރުގެ ވެސް މެމްބަރު ހައްވާ ޒާހިރާ
- އެމްޑީޕީގެ ފަރާތުން ލަންކާގައި ހަރަކާތްތެރިވި އިސް އެއް މެމްބަރު ފާތިމަތު ޝިޔާމާ
- އެމްޑީޕީގެ ފޭދޫ ދާއިރާގެ ކުރީގެ ކައުންސިލަރު އަހުމަދު ރިފްހާން
އާޓިފިޝަލް ބީޗު ސަރަހައްދުގައި އައްޑޫގެ ޕީއެންސީގެ މެމްބަރުން ބޭއްވި ޖަލްސާގައި އެ ނޫނަސް އިތުރު ބައެއް މީހުން އެ ޕާޓީއާ ގުޅުނުކަން އިއުލާންކުރި އެވެ.
ރޭގެ ޖަލްސާގައި ވަނީ އައްޑޫގައި އީޖާދީ ވިސްނުންތައް އުފަންކުރާ ގައުމީ ފެންވަރުގެ މަރުކަޒެއް ހެދުމަށް ޕީއެންސީގެ "ދަ ގްރޭޓާ އައްޑޫ"ގެ ތަސައްވުރު ނުވަތަ މެނިފެސްޓޯގައި ރަސްމީކޮށް އިފުތިތާހުކޮށްފަ އެވެ.
ގިނަ ބަޔަކު ބައިވެރިވި ޖަލްސާގައި ރައީސް މުއިއްޒު އެދިވަޑައިގަތީ ކުރިއަށް އޮތް ލޯކަލް އިންތިހާބުގައި އައްޑޫގެ ގޮނޑިތައް ޕީއެންސީ އަށް ކާމިޔާބު ކޮށްދިނުމަށެވެ. އަދި ބޭނުންވަނީ މި ސަރުކާރުގެ ތަރައްގީ އަށް ހުރަސްނާޅާނެ ބައެއް ކަމަށް އެ މަނިކުފާނު ވިދާޅުވި އެވެ.
"...މި އަހަރުގެ ބަޖެޓުން އައްޑޫގެ ސިޓީގެ ތަރައްގީ އަށް ގިނަ ކަންތައްތަކެއް ކުރުމަށް ކަނޑައެޅި އަދި މިދިޔަ އަހަރުގެ ބަޖެޓުގެ ތެރެއިން އެތައް މަޝްރޫއުތަކެއް ކުރިއަށް ގެންދަން ސޮއިކުރެވިަފައިވާ މި ދަނޑިވަޅުގައި ކައުންސިލްގެ ތެރެއިން މި ކަންކަމަށް ހުއްޓުން އަންނާނެ ފަދަ ގޮތެއް މެދުވެރިވެގެން ދިއުމަކީ އަޅުގަނޑު އެދޭ ގޮތެއް ނޫން،" ރައީސް ވިދާޅުވި އެވެ.