ރާއްޖޭގައި ޝީޝާ މަނާ ކުރުމާ އެކު، ހަކުރުން ޓެކްސް ނެގުމުގެ އިތުރުން އެ އަށް ދޭ ސަބްސިޑީ ކަނޑާލުމުގެ ވިސްނުމެއް ނުގެންގުޅުއްވާ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
އަންނަ މަހު ހަތަރެއްގައި ބާއްވާ ލޯކަލް ކައުންސިލް އިންތިހާބަށް ޕީއެންސީގެ "ދަ ގްރޭޓާ އައްޑޫ" ކެމްޕެއިން އިފުތިތާހުކުރުމަށް ހެންވޭރު އާޓިފިޝަލް ބީޗުގައި ބޭއްވި ރަސްމިއްޔާތުގައި ރައީސް މުއިއްޒު ވިދާޅުވީ އާންމުންގެ މެދުގައި ވަރަށް ބޮޑަށް ނާޒުކު ނުވަތަ ހިޔާލު ތަފާތުވުން ބޮޑު ކަންކަމުގައި މި ސަރުކާރުން މުހިންމު ފިޔަވަޅުތައް އަޅަމުން އަންނަ ކަމަށެވެ.
އަޅުގަނޑުމެން ނޫޅެން ޝީޝާ ބުއިން ބޭން ކުރާކަށް. ހަކުރުގެ ސަބްސިޑީ ކަނޑާލާކަށް. މި ކަހަލަ ކަންކަން ކުރާކަށް ނޫޅެން.
ހާއްސަކޮށް، ސިއްހަތަށް އެތައް ގެއްލުމެއް ދޭ ވޭޕް މަނާކޮށް، ދުންފަތުގެ އިސްތިއުމާލުކުރުމުގެ އާދަތަކުން އާންމުން ދުރުކުރުމަށް މުހިންމު ފިޔަވަޅުތަކެއް މިހާތަނަށް އަޅާފައި ވިޔަސް، އިތުރު އެއްޗެއް މަނާކުރުމުގެ ވިސްނުން ސަރުކާރުން ނުގެންގުޅޭ ކަމަށް ރައީސް ވިދާޅުވި އެވެ.
"މި ދޭތެރޭން ހެލްތު މިނިސްޓަރު ވިދާޅުވި ކަމަކާ ގުޅިގެން ބައެއް ބޭފުޅުންގެ ހިތްނުތަނަވަސްކަމެއް އެބައޮތް. ދުންފަތުގެ އިސްތިއުމާލު ކުރުމުގެ މައުލޫގައި ނޫސްވެރިއަކު ކުރި ސުވާލަކަށް ޖަދާބު ދެއްވަމުން ވިދާޅުވި އެއްޗަކުން،" ރައީސް ވިދާޅުވި އެވެ.
"އަޅުގަނޑުންގެ ސިޔާސަތެއް ނޫން، އަޅުގަނޑު ހަމަ އެކަން ސާފުކޮށްލަން މި ދަންނަވަނީ އިތުރު ކަންކަން ބޭންކުރުމަކީ. އެހެނެއް ނޫން، ހޭލުންތެރިކަން އިތުރު ކުރާނަން."
ރައީސް ވިދާޅުވީ ސަރުކާރުގެ ވިސްނުމަކީ މުޖުތަމައުގެ ތެރޭގައި ހުރި ނުބައި އާދަތައް ނުވަތަ ސިއްހަތަށް ގެއްލުންދެނިވި ކަންކަމުން އާންމުން ދުރުކުރުމަށް ހޭލުންތެރިކަން އިތުރުކުރުން ކަމަށެވެ.
"އަޅުގަނޑުމެން ނޫޅެން ޝީޝާ ބުއިން ބޭން ކުރާކަށް. ހަކުރުގެ ސަބްސިޑީ ކަނޑާލާކަށް. މި ކަހަލަ ކަންކަން ކުރާކަށް ނޫޅެން،" ރައީސް ވިދާޅުވި އެވެ.
ނަމަވެސް، އާންމުންގެ ހޭލުންތެރިކަން އިތުރުކޮށް، މި ކަންކަމުން ދުރުހެލިވުމަށް ބާރުއަޅައި ހިތްވަރުދޭން ސަރުކާރުން ވަރަށް ބޮޑަށް ބޭނުންވާ ކަމަށް ރައީސް ވިދާޅުވި އެވެ.
"އަޅުގަނޑުމެން ކުޑައިރު ދުން ގުޑުގުޑާ ބޮނީ. އެއީ ދިވެހިންގެ ތެރޭގައި ވަރަށް ބޮޑު އާދައަކަށް ވެފައި އޮތް ކަމެއް. އެހާ ބޮޑަށް އާދަވެފައި ހުންނަ ކަމަކުން ދުރު ނުކުރެވޭނެ ބޭން ކޮށްގެނެއް. އެހެން ނަމަވެސް، އެ ކަންކަމަށް ހޭލުންތެރިކޮށްދީ، އެ ކަންކަމުން ދުރުވުމަށް ނިޒާމީ ގޮތެއްގައި ހިތްވަރުދެވޭނެ،" ރައީސް ވިދާޅުވި އެވެ.
"ހަކުރުގެ ޑިއުޓީ ކަނޑާލަން ނުވަތަ އަގު ބޮޑުކުރުމަކީ ކުރާނެ ކަމެއް ނޫން."
ސަރުކާރުން ބޭނުންވަނީ ހަށިގަނޑަށް ފައިދާހުރި މޭވާ އާއި ތަރުކާރީގެ ބާވަތްތައް އަގުހެޔޮ ގޮތެއްގައި ގައުމުން ލިބޭނެ ގޮތް ހަދައިދިނުމާއި އެ ތަކެތި ރާއްޖޭގައި އުފެއްދޭނެ ގޮތް ހެދުން ކަމަށް ވެސް ރައީސް މުއިއްޒު ވިދާޅުވި އެވެ.
ހެލްތު މިނިސްޓްރީން މިދިޔަ ހަފުތާގައި ބޭއްވި ޕްރެސް ކޮންފަރެންސްގައި "މިހާރު" އިން ކުރި ސުވާލާ ގުޅިގެން މިނިސްޓަރު އަބްދުﷲ ނާޒިމް އިބްރާހިމް ވިދާޅުވީ ދުންފަތުގެ އިތުރު ބާވަތްތައް މަނާކުރުމާއި ހަކުރު އެކުލެވޭ ބާވަތްތަކުން ޓެކްސް ނެގުމަކީ އާންމުންގެ ދިރިއުޅުމުގެ ވައްޓަފާޅިއާ ގުޅޭ ކަމަކަށް ވާތީ، އެ ކަންތައްތައް ވަކި އުސޫލެއްގެ ތެރެއިން ރެގިއުލޭޓް ކުރަމުން އަންނަ ކަމަށެވެ.
މިނިސްޓަރު ވިދާޅުވީ ހަކުރުގެ ބާވަތްތަކުން ޓެކްސް ނެގުމާއި ސަބްސިޑީ ކަނޑާލުމަކީ ހަމައެކަނި އެ މިނިސްޓްރީއަށް ނެގޭނެ ނިންމުމެއް ނޫން ކަމަށެވެ. ނަމަވެސް، އެ ފިޔަވަޅު އެޅޭނެ ދުވަހަކަށް ސިއްހީ ދާއިރާ އިން އިންތިޒާރުކުރާ ކަމަށް ވެސް އޭނާ ވިދާޅުވި އެވެ.
އާއްމު ސިއްހަތު ރައްކާތެރި ކުރުމުގައި ބޮޑެތި މަޝްވަރާތަކެއް ކުރަމުން އަންނަ ކަމަށް މިނިސްޓަރު އެ ދުވަހު ވިދާޅުވި އިރު، ޑޮކްޓަރުންގެ ޖަމިއްޔާއިން ވަނީ ޝީޝާ މަނާކޮށް، ހަކުރު އެކުލެވޭ ބުއިންތަކުން ނަގާ ޓެކްސް އިތުރުކުރަން ގޮވާލައިފަ އެވެ.