ނިއުރޯ ސާޖަރީތަކަށް ބޭނުންކުރާ "އިންޓްރާ އޮޕަރޭޓިވް ނިއުރޯމޮނިޓަރިން" ގެ ހިދުމަތް އައިޖީއެމްއެޗުގައި މިއަދު ތައާރަފުކޮށްފި އެވެ.
ސަރުކާރުގެ މައި ހޮަސްޕިޓަލުން އާންމުކުރި ވީޑިއޯއެއްގައި، ރާއްޖޭގައި ހުރި ނިއުރޯ ސާޖަންގެ އެންމެ ތަޖުރިބާކާރު ޑރ. އަލީ ނިޔާފު ވިދާޅުވީ، އިންޓްރާ އޮޕަރޭޓިވް ނިއުރޯމޮނިޓަރިންއަކީ ބަލިމީހާގެ ރައްކާތެރިކަމަށްޓަކައި ކޮންމެހެން މުހިންމު ވަސީލަތެއް ކަމަށެވެ.
އޭނާ ވިދާޅުވި ގޮތުގައި އެ ވަސީލަތުގެ އެންމެ މުހިންމު އެއް ބޭނުމަކީ ސާޖަރީ ހަދަމުންދާ ވަގުތު ނާރުތަކުގެ ފަންކްޝަންތައް ޑޮކްޓަރުންނަށް ފެނި، ނާރަކަށް ގެއްލުމެއް ވާ ނަމަ އެކަމަށް ސަމާލުވާން ފުރުސަތު ލިބުން ކަަމަށެވެ. ސާޖަރީ ހަދާ ވަގުތު އެ ސާޖަރީއާ ގުޅުން ނެތް ނާރަކާ ހިސާބަށް ދެވޭ ނަމަ ކުރިން އެކަން ޑޮކްޓަރުންނަށް އެލާމް ކުރާނެ އެވެ.
"ނާރަކަށް ގެއްލުމެއް ވާ ނަމަ އަޅުގަނޑުމެންނަށް އެ ޕަސެންޓޭޖާ އެކު އެނގޭނެ،" ޑރ. ނިޔާފް ވިދާޅުވި އެވެ.
"އެއާ އެކީގައި އޮޕަރޭޝަންގައި އަޅުގަނޑުމެން ކުރަމުންދާ ކަމެއް ބަދަލުކޮށް، ނޫނިއްޔާ އެހެން ހިސާބަކުން ސާަޖަރީ ކުރިއަށް ގެންދަން ފަސޭހަވާނެ."
އޭގެ އިތުރުން އެންމެ އާންމު ސަާޖަރީތައް ކަމަށްވާ ކަނދުރާ އާއި މައިބަދައިގެ ޑިސްކު ސާޖަރީ ކުރާއިރު ނާރަކަށް ލިބިދާނެ ގެއްލުމަކުން ޑޮކްޓަރުން ސަމާލުވާން އިންޓްރާ އޮޕަރޭޓިވް ނިއުރޯމޮނިޓަރިންގެ ސަބަބުން ވަގުތު ލިބޭނެ ކަމަށް ޑރ. ނިޔާފް ވިދާޅުވި އެވެ.
"އިސްކުރު ޖަހާއިރު އެ އިސްކުރުގެ އިންޓެގްރިޓީ ނޫނިއްޔާ އެ އިސްކުރު ޖެހެމުންދާތަނާ އެކީގައި އިތުރު ނާރަކަށް ފިތުން ކަހަލަ ކަމެއް ވަންޏާ ފާހަގަވާނެ. އޭގެ ނަތީޖާއަކަށް ވާނީ ބަލިމީހާ އޮޕަރޭޝަންގެ ތެރޭގައި ދިމާވެދާނެ ނޭދެވޭ ކަންކަން މަދުކުރެވުން،" އިންޓްރާ އޮޕަރޭޓިވް ނިއުރޯމޮނިޓަރިންގެ ބޭނުމާ ގުޅޭ ގޮތުން ނިޔާފް ވިދާޅުވި އެވެ.
ނިޔާފް ވިދާޅުވި ގޮތުގައި، އެ ސިސްޓަމް ބޭނުންކުރަން ފެށުމާ އެކު، ނިއުރޯ ސާޖަރީ ހަދާއިރު ކުރިމަތިވާނެ ބޮޑެތި ނުރައްކާތަކުން ސަލާމަތް ވެވޭނެ އެވެ.