ގައުމީ އެއާލައިން، މޯލްޑިވިއަންގެ ފަސިންޖަރުންގެ ތެރެއިން، އިންޑިއާގެ ޓްރިވަންޑްރަމްގައި ހުންނަ އަނަންތަޕޫރީ ހޮސްޕިޓަލްސް އެންޑް ރިސާޗް އިންސްޓިޓިއުޓުން ޑޮކްޓަރަށް ދައްކާ މީހުންނަށް ޑިސްކައުންޓް ލިބޭ ގޮތަށް އެމްއޯޔޫއެއްގައި ސޮއިކޮށްފި އެވެ.
ޓްރިވަންޑްރަމަކީ މިހާރު ވެސް ގިނަ އަދަދަކަށް ދިވެހިން ބޭސް ފަރުވާއަށް ގޮސް އުޅޭ ތަނެކެވެ. މޯލްޑިވިއަނުން އެއްބަސްވުން ހެދި އަނަންތަޕޫރީ ހޮސްޕިޓަލަކީ މަލްޓި ސްޕެޝަލިޓީ ހޮސްޕިޓަލެކެވެ.
މޯލްޑިވިއަނުން ނެރުނު ބަޔާނެއްގައި ބުނީ މި އެމްއޯޔޫގެ ބޭނުމަކީ ފަސޭހައިން ސިއްހީ އެހީތެރިކަން ލިބޭނެ މަގު ތަނަވަސްކޮށް ދިނުމުގެ އިތުރުން ދިވެހި ފަސިންޖަރުންނަށް ސިއްހީ އެހީ ހޯދުމުގައި އިތުރު ފައިދާތައް ލިބޭނެ ގޮތް ހެދުން ކަމަށެވެ.
ހާއްސަ ސިއްހީ ފަރުވާ ހޯދުމުގައި ދިވެހިންގެ އެންމެ މަގުބޫލު މަންޒިލަކީ އިންޑިއާ ކަމަށާއި އޭގެ ތެރެއިން ޓްރިވަންޑްރަމަކީ ޒަމާނީ ސިއްހީ ވަސީލަތްތައް ހުންނަ އަދި ގިނަ އަދަދަކަށް ދިވެހިން ފަރުވާ ހޯދުމަށް ދާ ސަރަހައްދީ ސިއްހީ ހަބެއް ކަމަށް މޯލްޑިވިއަނުން ބުންޏެެވެ.
އެހެންވެ، މޯލްޑިވިއަންގައި ޓްރިވަންޑްރަމަށް ދަތުރުކުރާ ފަސިންޖަރުންނަށް މި އެމްއޯޔޫގެ ސަބަބުން ފައިދާތަކެއް ލިބޭނެ ކަމަށް އެ އެއާލައިނުން ބުންޏެވެ.
އަނަންތަޕޫރީ ހޮސްޕިޓަލާ އެކު ސޮއިކުރި އެމްއޯޔޫގެ ދަށުން، އެތަނަށް ފަރުވާއަށްދާ އައުޓްޕޭޝަންޓުންނާއި އިންޕޭޝަންޓުންނަށް ވެސް ޑިސްކައުންޓުތަކެއް ލިބޭނެ އެވެ.
މޯލްޑިވިއަނުން ބުނީ ހެލްތު ޗެކްއަޕް ޕެކޭޖުތަކުން 15 ޕަސެންޓްގެ ޑިސްކައުންޓެއް ލިބޭނެ ކަމަށާއި އައުޓްޕޭޝަންޓް ލެބޯޓްރީ އާއި ރޭޑިއޮލޮޖީ ހިދުމަތުން 10 ޕަސެންޓްގެ ޑިސްކައުންޓް ލިބޭނެ ކަމަށެވެ. މީގެ އިތުރުން ޓްރިވަންޑްރަމް އިންޓަނޭޝަނަލް އެއާޕޯޓުން ހޮސްޕިޓަލަށް އެމްބިއުލާންސްގައި ހިލޭ ދަތުރުކޮށްދޭނެ ކަމަށް ވެސް ބުންޏެވެ.
ސިއްހީ ފަރުވާއަށްދާ މީހުންނަށް އިތުރު އެހީތެރިކަން ފޯރުކޮށްދިނުމުގެ ގޮތުން ހޮސްޕިޓަލުގައި ކަސްޓަމާ ކެއާ ޑެސްކެއް ގާއިމުކޮށް އެޕޮއިންޓްމަންޓް ހެއްދުމާއި މެޑިކަލް ކޯޑިނޭޝަނާއި ޕޭޝަންޓް ސަޕޯޓު ވެސް ދޭނެ އެވެ.
ސްޕެޝަލް އެސިސްޓެންސް ސާވިސްގެ ތެރޭގައި، ހާލުބޮޑު ބަލި މީހުންނާއި ދުވަސްވީ މީހުންނަށް ބަސް ތަރުޖަމާކޮށްދިނުމުގެ ހިދުމަތް ވެސް ދޭނެ ކަމަށް ބުންޏެެވެ.
އެ އެމްއޯޔޫގެ ފައިދާ މޯލްޑިވިއަންގައި ޓްރިވަންޑްރަމަށް ދަތުރުކުރާ ހުރިހާ ފަސިންޖަރުންނަށް ވެސް ލިބޭނެ އެވެ. އެ ހިދުމަތާ ގުޅޭ އިތުރު މައުލޫމާތު މޯލްޑިވިއަން ނުވަތަ އަނަންތަޕޫރީ ހޮސްޕިޓަލު މެދުވެރިކޮށް ލިބޭނެ ކަމަށް ވެސް މޯލްޑިވިއަނުން ބުންޏެވެ.