"އާއިލީ ބޯހިޔާވަހިކަން" ޕްރޮގްރާމުގެ ދަށުން ފްލެޓާއި ގޯއްޗަށް ހުށަހަޅާ މީހުންގެ ފޯމަށް ޝަކުވާ ހުށަހެޅުމުގެ ފުރުސަތު މިއަދު ހުޅުވާލައިފި އެވެ.
ހައުސިން މިިސްޓްރީން ބުނީ އެ ޕްރޮގްރާމުގެ ދަށުން ފޯމު ހުށަހެޅުމުގައި މައުލޫމާތު ފުރިހަމަ ނުކޮށް ނުވަތަ ނުބައި މައުލޫމާތު ހުށަހެޅިފައިވާ މީހުންނަށް ފޯމާ ގުޅޭ ގޮތުން ޝަކުވާ ހުށަހެޅުމުގެ ފުރުސަތު އޭޕްރީލް 30 ގެ ނިޔަލަށް ލިބޭނެ ކަމަށެވެ.
"ބޯހިޔާވަހިކަން ޕޯޓަލް" ގެ މެއިން މެނޫ އިން ޝަކުވާ ހުށަހެޅުމަށް ހާއްސަ ކޮށްފައިވާ ޓެބު ފެންނާނެ އެވެ.
މިނިސްޓްރީން ބުނި ގޮތުގައި ޝަކުވާ ހުށަހެޅުމަށް ދޭނީ އެންމެ ފުރުސަތެކެވެ.
މި ސަރުކާރުގެ ބޯހިޔާވަހިކަމުގެ ފުރަތަމަ މަޝްރޫއުގެ ދަށުން ދޫކުރާ ގޯއްޗާއި ފްލެޓަށް އެދުމަށް ފޯމު ހުށަހަޅަން ދިން މުއްދަތު ވަނީ އަންނަ އޭޕްރީލް މަހުގެ 30 ގެ ނިޔަލަށް އިތުރުކޮށްފަ އެވެ.
ގޯއްޗަށް އެދުމުގެ ފުރުސަތު ކުރިން ދިނީ މި މަހުގެ ހަތަރު ވަނަ ދުވަހާ ހަމައަށެވެ. އަދި ފްލެޓަށް ކުރިމަތިލުމަށް އޭރު ދިން މުއްދަތަކީ އަންނަ މަހުގެ 17 ގެ ނިޔަލަށެެވެ.
"އާއިލީ ބޯހިޔާވަހިކަން" ޕްރޮގްރާމްގެ ދަށުން 7،900 ފްލެޓާއި 1،250 އަކަފޫޓުގެ ޖުމްލަ 15،000 ގޯތި ދޫކުރާނެ އެވެ.
ފްލެޓް ދޭން ސަރުކާރުން ކަނޑައަޅާފައި ވަނީ މާލޭގެ ރަށްވެހިންނަށް 4،000 ފްލެޓާއި މާލޭގައި ރަށްވެހިވެފައިނުވާ މާލޭގައި ދިރިއުޅެމުން އަންނަ މީހުންނަށް 1،500 ފްލެޓުގެ އިތުރުން ހާއްސަ ކެޓަގަރީތަކަށް ކަނޑައަޅާފައިވާ 2،400 ފްލެޓެވެ.
ބޯހިޔާވަހިކަމަށް ހައްލެއް ހޯދަން މިހާރު ހިއްކަމުން އަންނަ ރަސްމާލެއިން 25،000 ގޯތި ދޫކުރަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވެ އެވެ. އެކަމަކު ފުރަތަމަ ބުރުގައި އެތަނުން ދޫކުރަނީ 15،000 ގޯއްޗެވެ.