ހުޅުމާލެ ހޮސްޕިޓަލްގައި ގާއިމްކޮށްފައިވާ މަސްނޫއީ އަތާއި ފައި ހަދައިދޭ ލެބްގެ މުހިއްމު ހިދުމަތް، އަހަރެއް ފަހުން ދޭން ފަށައިފި އެވެ.
އިންޑިއާ ސަރުކާރުގެ އެހީގައި ގާއިމްކުރި ޕްރޮސްތެޓިކް ލެބް ހުޅުވީ އޮގަސްޓް 9، 2023 ގަ އެވެ. ނަމަވެސް، އެ ހިދުމަތް ދިނުމަށް އެންމެ މުހިއްމު ޓެކްނީޝަން އަނބުރާ ގައުމަށް ދިއުމުން މިދިޔަ އަހަރުގެ މާޗު މަހާ ހިސާބުން ފެށިގެން އެ ހިދުމަތް ވަނީ ހުއްޓިފަ އެވެ.
ޕްރޮސްތެޓިކްސްއަކީ އަތާއި ފައިގެ އުނިކަމެއް ދިމާވެފައިވާ މީހުންނަށް ހަދައިދޭ އަތާއި ފަޔެވެ.
އެ ހިދުމަތްތައް އޭރު މެދުކެނޑުނަސް ތެރަޕީގެ ފަރުވާތައް ކުރިއަށް ގެންދިޔަ އެވެ.
ހުޅުމާލެ ހޮސްޕިޓަލްގެ މީޑިއާ އޮފިޝަލަކު އިއްޔެ ވިދާޅުވީ ޕްރޮސްތެޓިކް ޓެކްނީޝަނަކާ އެކު، މީގެ މަހެއް ކުރިން ހިދުމަތް ފަށާފައިވާ ކަމަށެވެ.
"މިހާރު ލެބްގެ ފަރުވާ ފުރިހަމައަށް ދެވޭނެ،" އޮފިޝަލް ވިދާޅުވި އެވެ.
ލެބް ޓެކްނީޝަނެއް ނެތުމުން މަސްނޫއީ އަތާއި ފައި ހަދަން ފޮނުނީ ރާއްޖެއިން ބޭރަށެވެ.
ހުޅުމާލޭ ހޮސްޕިޓަލުން މީގެ ކުރިން ހިއްސާކުރި މައުލޫމާތުތަކަށް ބަލާއިރު، ޗައިލްޑް ޑިވެލޮޕްމަންޓް ސެންޓަރުން ހިދުމަތް ހޯދާ 18 އަހަރުން ދަށުގެ 480 އަށް ވުރެ ގިނަ ކުދިންގެ ތެރޭގައި ވެސް މަސްނޫއީ އަތާއި ފައި އަދި ނުކުޅެދުންތެރިކަން ހުންނަ ކުދިންނަށް ބޭނުންވާ ހާއްސަ ބޫޓު ބޭނުންވާ ކުދިން އެބަ ތިއްބެވެ.