ރާއްޖެ އަށް ގިނަ އަދަދެއްގެ މަސްތުވާތަކެތި އެތެރެކުރަން އުޅުނު ކަމުގެ ތުހުމަތުގައި ވެލާނާ އިންޓަނޭޝަނަލް އެއާޕޯޓުން ހިފެހެއްޓި މެލޭޝިއާ މީހާގެ ލަގެޖާ ހަވާލުވާން ދިޔަ ދެ މީހަކު މާލޭން ހައްޔަރުކޮށްފި އެވެ.
ރަންޖިނީ ޖީވަނަންތަން ނަމަކަށް ކިޔާ 38 އަހަރުގެ މީހާ ހައްޔަރުކޮށްފައިވަނީ އޭނާ ރާއްޖެ އައިއިރު ލަގެޖު ބަލައިފާސްކުރުމުގެ ތެރެއިން ގިނަ އަދަދެއްގެ މަސްތުވާތަކެތި ފެނިފައިވާތީ އެވެ. ފުލުހުން މިއަދު ބުނި ގޮތުގައި އޭނާގެ އަތުން ދެ ކިލޯ އަށް ވުރެ ގިނަ މަސްތުވާތަކެތި ފެނިފައިވެ އެވެ.
މެލޭޝިއާގެ އުމުރުން 38 އަހަރުގެ މީހާއާ ގުޅިގެން ރާއްޖެ އަށް މަސްތުވާތަކެތި އެތެރެކުރަން އުޅުނު ކަމުގެ ތުހުމަތުގައި ދެ ދިވެހިން ވެސް ވަނީ ހައްޔަރުކޮށްފަ އެވެ. އެއީ ގދ. ވާދޫ، ފުރުސަތު، ލޫތު އިބްރާހީމް، 29 އާއި ގއ. ދާންދޫ، ސަންލައިޓްވިލާ، އަހުމަދު ރިޝްމާހް، 21 އެވެ.
މި މައްސަލައާ ގުޅިގެން ހައްޔަރުކުރި މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން ރަންޖިނި ޖީވަނަންތަން އާއި ލޫތު އިބްރާހީމް 15 ދުވަަހަށް އަދި ރިޝްމާހް ފަސް ދުވަހަށް ބަންދުކުރުމަށް ވަނީ އަމުރުކޮށްފަ އެވެ.
ލޫތާއި ރިޝްމާހްގެ ބަންދު އަމުރުގައިވާ ގޮތުން ފުލުހުން ވަނީ މަސްތުވާތަކެއްޗާ ހަވާލުވާން އަންނަ މީހަކު ހޯދަން އޮޕަރޭޝަން ހިންގައިފަ އެވެ. އެގޮތުން ރަންޖިނީ އޭނާ ހުންނަން ހަމަޖެހިފައިވާ ގެސްޓް ހައުސް އަށް ދިޔުމުން ލަގެޖާ ހަވާލުވާން ލޫތާއި ރިޝްމާހު އެ ތަނަށް ގޮސްފައިވެ އެވެ.
އެ ތަނުން ފުލުހުން ފެނުމާ އެކު، ދެ މީހުން ވެސް ފިލަން މަސައްކަތް ކޮށްފައިވެ އެވެ. ދެ މީހުން ވެސް ކުޑަކަމުދާތަކެތި ދިނުމަށް އިންކާރުކުރި އެވެ.