ސީރިއާއަކީ ދިވެހިން ދަތުރުކުރުން މަނާވާ ހަނގުރާމަވެރި ސަރަހައްދެއްގެ ގޮތުގައި އޮތްއޮތުން އުވާލައި އަދި ސީރިއާގައި ވެރިކަންކުރާ ހަޔާތު ތަހްރީރް އަލް ޝާމް (އެޗްޓީއެސް) ޖަމާއަތް ރާއްޖޭގެ ޓެރަރިސްޓް ޖަމާއަތްތަކުގެ ލިސްޓުން އެންމެފަހުން އުނިކޮށްފި އެވެ.
ޓެރަރިޒަމް މަނާކުރުމުގެ ގާނޫނުގެ ދަށުން ޓެރަރިސްޓް ޖަމާއަތްތަކުގެ ލިސްޓާއި ދިވެހިން ދަތުރުކުރުން މަނާވާ ހަނގުރާމަވެރި ސަރަހައްދުތަކުގެ ލިސްޓް ކޮންމެ އަހަރަކު އެއްފަހަރު މުރާޖާކޮށް، ގައުމީ ސަލާމަތީ މަޖިލީހުގެ ލަފާގެ މަތިން ރައީސް އިއުލާން ކުރައްވަން ޖެހެ އެވެ.
ސީރިއާގެ ރައީސް ބައްޝާރުލްއަސަދުގެ ވެރިކަން ކުއްލި ގޮތަކަށް ވައްޓާލުމަށްފަހު ޑިސެމްބަރު، 2024 ގައި ވެރިކަމާ ހަވާލުވި އެޗްޓީއެސް ޖަމާއަތަކީ އޮކްޓޫބަރު، 2019 އިން ފެށިގެން ރާއްޖޭގެ ޓެރަރިސްޓް ލިސްޓްގައި އޮތް ޖަމާއަތެކެވެ. އަދި އެ ލިސްޓް ޑިސެމްބަރު، 2024 ގައި އެންމެފަހުން ނެރުނުއިރު ވެސް އެޗްޓީއެސް ޖަމާއަތް ހިމެނޭހެން 20 ޖަމާއަތެއް ރާއްޖޭގެ ޓެރަރިސްޓް ޖަމާއަތްތަކުގެ ލިސްޓްގައި އޮތެވެ. ނަމަވެސް މިދިޔަ ބުރާސްފަތި ދުވަހު ނެރުު ލިސްޓްގައި އެޗްޓީއެސް ޖަމާއަތް ވަނީ އުނިކޮށްފަ އެވެ.
މީގެ އިތުރުން ސީރިއާއަކީ ދިވެހިން ދަތުރުކުރުން މަނާވާ ހަނގުރާމަވެރި ސަރަހައްދެއްގެ ގޮތުގައި އޮތްއޮތުން ވެސް އެ ލިސްޓުން ވަނީ ނިމުމަކަށް ގެނެސްފަ އެވެ.
އެނގިފައިވާ ގޮތުގައި އެގޮތަށް ހަމަޖެއްސީ ވަރަށް ގިނަ ގައުމުތަކުން އެޗްޓީއެސް ޖަމާއަތް ޓެރަރިސްޓުން ލިސްޓުން ނަގައި، ބަލައިގަންނަމުންދާތީ އެވެ.
ރާއްޖޭގެ ޓެރަރިސްޓް ޖަމާއަތްތަކުގެ ލިސްޓުން އެޗްޓީއެސް އުނި ކުރިއިރު، އެމެރިކާ އާއި ގިނަ ގައުމުތަކުން ވެސް ވަނީ ހަނގުރާމަވެރި ޖަމާއަތްތަކުގެ ލިސްޓުން އެޗްޓީއެސް ނަގައިފަ އެވެ. އަދި އެޗްޓީއެސްގެ ވެރިޔާ އަދި ސީރިއާގެ ރައީސް އަހްމަދު އައް ޝަރާއާ ވެސް އެމެރިކާގެ ރައީސް ޑޮނަލްޑް ޓްރަމްޕް ވައިޓް ހައުސްގައި ބައްދަލު ވެސް ކުރެއްވި އެވެ.
ޓެރަރިޒަމްގެ ގާނޫނު ބުނާގޮތުން އެ ލިސްޓްގައި ހިމެނޭ ޓެރަރިސްޓް ޖަމާއަތަކަށް ތާއީދު ކުރުމާއި އަދި ހަނގުރާމަވެރި ސަރަހައްދަކަށް ސަރުކާރުގެ ހުއްދަ ނެތި ދަތުރު ކުރުމަކީ ދިގު މުއްދަތުގެ ޖަލު ހުކުމް އަންނަ ކުށެކެވެ.