"ޑިޖިޓަލް ލިޓްރަސީ" ނުވަތަ ޒަމާނީ ޓެކްނޮލޮޖީގެ ވަސީލަތްތައް ބޭނުންކުރަން ނޭނގޭ ނަމަ، ލިޔަންކިޔަން އެނގޭ މީހަކަށް ނުވާ ވަރަށް ކަންކަން ބަދަލުވެއްޖެ ކަމަށް އުއްތަމަ ފަނޑިޔާރު އަބްދުލްޣަނީ މުހައްމަދު މިއަދު ވިދާޅުވެއްޖެ އެވެ.
މި އަހަރު ޖުޑީޝަލް ކޮންފަރެންސް ފެށުމުގެ ގޮތުން ޕެރެޑައިސް އައިލެންޑް ރިސޯޓުގައި ބޭއްވި ރަސްމިއްޔާތުގައި އުއްތަމަ ފަނޑިޔާރު ވިދާޅުވީ ގާބިލް ފަންނުވެރި މީހަކަށް ވުމަށް އެކި ޒަމާނުގައި ބޭނުންވަނީ އެކި ހުނަރު ކަމަށެވެ. މި ޒަމާނުގައި އެފަދަ މީހަކަށް ވުމަށް ބޭނުންވާ އެންމެ މުހިންމު އެއް ހުނަރަކީ ޓެކްނޮލޮޖީ ނުވަތަ ފަންނިއްޔާތުގެ ވަސީލަތް ކަމަށް އެމަނިކުފާނު ވިދާޅުވި އެވެ.
އެހެންވެ، މި އަހަރުގެ ކޮަންފަރެންސްގެ ފުރަތަމަ ދުވަސް ހާއްސަކޮށްފައި ވަނީ އާޓިފިޝަލް އިންޓެލިޖަންސް (އޭއައި) އާއި ޓެކްނޮލޮޖީން ޝަރުއީ ދާއިރާއަށް ގެނެވިދާނެ ކުރިއެރުމާއި ލިބިގަނެވޭނެ ފައިދާތަކާއި ޓެކްނޮލޮޖީ އެންމެ ފުރިހަމައަށް ބޭނުންކުރުމާ ބެހޭ ގޮތުން މަޝްވަރާ ކުރުން ކަމަށް އުއްތަމަ ފަނޑިޔާރު ވިދާޅުވި އެވެ.
އުއްތަމަ ފަނޑިޔާރު ވިދާޅުވި ގޮތުގައި، އެ ކޮންފަރެންސްގެ މައިގަނޑު މައުޟޫއާ މެދު ވިސްނާލުމުން ހިތަށް އެންމެ ފުރަތަމަ ވެސް ވެރިވީ، 21 ވަނަ ގަރުނުގެ "ލިޓްރަސީ" އާ ބެހޭ ގޮތުން އެމެރިކާގެ ކުރީގެ ރައީސް ބިލް ކްލިންޓަން ވިދާޅުވި ވާހަކަފުޅެކެވެ.
"އޭރު އެމަނިކުފާނު ވިދާޅުވީ އާންމުކޮށް ދުނިޔޭގައ،ި ލިޔަންކިޔަން ދަތުމުގެ މިންގަނޑު ވަޒަންކުރަމުން އައިސްފައި ވަނީ އަސާސީ ތިން ހުނަރެއްގެ މައްޗަށް ބިނާކޮށްގެން ކަމަށް. އެ ތިން ހުނަރަކީ އެމީހެއްގެ މާދަރީ ބަހުން އެ މީހަކަށް ކިޔަން އެނގުން، ލިޔަން އެނގުން، ހިސާބު އިލްމުގެ އަސާސީ މިންވަރު އެނގުން ކަމުގައި،" އުއްތަމަ ފަނޑިޔާރު ވިދާޅުވި އެވެ.
"އެކަމަކު، 21 ވަނަ ގަރުނުން ފެށިގެން ހަތަރުވަނަ ހުނަރެއް، ފުރިހަމަވުމުން ނޫނީ، އެއީ ލިޔަންކިޔަން އެނގޭ މީހެއް ކަމަށް ނުބެލެވޭ ވަރަށް ކަންކަން ބަދަލުވެއްޖެ ކަމަށް. މާނައަކީ، ލިޔަންކިޔަން އެނގޭ މީހެއްކަމަށް ބެލެވޭނީ، ކުރިން ދެންނެވި ތިން ހުނަރުގެ އިތުރަށް، އެ މީހަކީ 'ޑިޖިޓަލް ލިޓްރަސީ'ގެ ހުނަރު ލިބިފައިވާ މީހަކަށް ވުމުން ކަމަށް ބިލް ކްލިންޓަން ސިފަކުރެއްވި."
"ކޮންމެ ގޮތެއް ވިޔަސް، ޓެކްނޮލޮޖީއަށް މަރުހަބާ ނުކިޔާ ތިބެވޭކަށް މިއަދު އަޅުގަނޑުމެނަށް އިހުތިޔާރެއް ނެތް. އެހެން ވެއްޖެ ނަމަ، ޓެކްނޮލޮޖީ އަޅުގަނޑުމެން ފަސްދީ ހިނގައިދާނެ."
މިއަދު އެ ދުވަސް ބައްދަލުކޮށްފި ކަމަށާއި "ޑިޖިޓަލް ލިޓްރަސީ"އާ ނުލައި، ކުރިއަށް ދެވޭނެ އެއްވެސް މަގެއް މިހާރު ފެންނަން ނެތް ކަމަށް އެމަނިކުފާނު ވިދާޅުވި އެވެ.
އުއްތަމަ ފަނޑިޔާރު ވިދާޅުވީ މި ޒަމާނަކީ "އޭއައި ލިޓްރަސީ" ވެސް އުނގެނި، އެއަށް ފަރިތަވެގެން ނޫނީ ކުރިއަށް ދެވެން ނެތް ޒަމާނެއް ކަމަށެވެ. އެހެންވެ، މިހާރު މިވަނީ ހިތްވަރާއި ފަންވަރާއި ބުންވަރު އަނެއްކާ ވެސް އިތުރު ކުރަންޖެހިފައި ކަމަށާއި އެ މަގުސަދުގައި މި އަހަރުގެ ކޮންފަރެންސްގެ ތީމެއްގެ ގޮތުގައި ކަނޑައެޅީ އެ ސަބަބަށްޓަކާ ކަމަށް އެމަނިކުފާނު ވިދާޅުވި އެވެ.
"ކޮންމެ ގޮތެއް ވިޔަސް، ޓެކްނޮލޮޖީއަށް މަރުހަބާ ނުކިޔާ ތިބެވޭކަށް މިއަދު އަޅުގަނޑުމެނަށް އިހުތިޔާރެއް ނެތް. އެހެން ވެއްޖެ ނަމަ، ޓެކްނޮލޮޖީ އަޅުގަނޑުމެން ފަސްދީ ހިނގައިދާނެ،" އުއްތަމަ ފަނޑިޔާރު ވިދާޅުވި އެވެ.
އުއްތަމަ ފަނޑިޔާރު ވިދާޅުވީ މިވަގުތު ދުވެލި ބާރުކޮށް ނުލައިފިނަމަ، ދުވަސްކޮޅަކުން ޓެކްނޮލޮޖީ އަމިއްލައަށް އަޅުގަނޑުމެން "އަންއިންސްޓޯލް" ކޮށްލާނެ ކަމަށާއި އޭރުން އަޅުގަނޑުމެން ވާނީ ޓެކްނޮލޮޖީ އާއި މި ޒަމާނާ ވެސް ބީރައްޓެހި ބަޔަކަށް ކަމަށެވެ.
އާޓިފިޝަލް އިންޓެލިޖެންސް ބޭނުންކުރުމަކީ މިހާރު ދުނިޔޭގެ ވަރަށް ގިނަ ގައުމުތަކުގެ ޝަރުއީ ނިޒާމުގެ ތެރޭގައި ކުރާ ކަމެއް ކަމަށް ވިދާޅުވެ، އުއްތަމަ ފަނޑިޔާރު ވަނީ އިންޑިއާގެ ސުޕްރީމް ކޯޓުގެ މިސާލެއް ދައްކަވައިފަ އެވެ.
އިންޑިއާގެ ސުޕްރީމް ކޯޓުގެ މަސައްކަތްތައް ކުރުމަށް އޭއައި ތައާރަފުކުރުމާ އެކު، ކޮންމެ އަހަރަކު އެ ކޯޓުގެ ކޭސްތައް ނިންމާ ރޭޓް 100 ޕަސެންޓް އިތުރުވެފައިވާ ކަމަށް އުއްތަމަ ފަނޑިޔާރު ވިދާޅުވި އެވެ.
މި ކޮންފަރެންސްގައި އިންޑިއާގެ ޖުޑިޝަލް އެކަޑަމީގެ ވަރަށް ގާބިލު ތަޖުރިބާކާރު، ފަންނީ ބޭފުޅުން ބައިވެރިވެ ވަޑައިގަންނަވާ ކަމަށާއި އެ ބޭފުޅުން މިކަމުގައި އިންޑިއާގެ ތަޖުރިބާގެ އިތުރު ތަފްސީލު ހިއްސާ ކޮށްދެއްވާނެ ކަމަށް ވެސް އުއްތަމަ ފަނޑިޔާރު ވިދާޅުވި އެވެ.
"އިންޑިއާގެ ސުޕްރީމް ކޯޓެކޭ އެއްފަދައިން، އަޅުގަނޑުމެންނަށް ވެސް ހަމަ ކުޑަކުޑަ ހިތްވަރަކާ އެކު، މާތްاللهގެ ވާގިފުޅާ އެކު، މިފަދަ ކާމިޔާބު ނަތީޖާ ނެރެވިގެންދާނެ،" އުއްތަމަ ފަނޑިޔާރު ވިދާޅުވި އެވެ.