ބީއެމްއެލް އެފޯޑަބަލް ހޯމް ލީސިން ކޮމްޕެނީން ހުޅުމާލޭގައި އިމާރާތް ކުރަން ފަށާފައިވާ އަގުހެޔޮ ފްލެޓުތަކުގެ މަސައްކަތްތައް ނިންމައި 2028 ވަނަ އަހަރުގެ މެދުތެރޭގައި އެ ތަންތަން އާންމުންނަށް ދޫކުރަން ފަށާނެ ކަމަށް އެ ބޭންކުގެ ސީއީއޯ އަދި އެމްޑީ މުހައްމަދު ޝަރީފު މިއަދު ވިދާޅުވެއްޖެ އެވެ.
އޭނާ އެކަން އިއުލާން ކުރެއްވީ ދ. ކުޑަހުވަދޫގައި އިމާރާތްކުރި ބީއެމްއެލްގެ އާ ބްރާންޗު ރަސްމީކޮށް ހުޅުވުމަށް މިއަދު ބޭއްވި ރަސްމިއްޔާތުގަ އެވެ.
އެކަމަކު، 3،000 އަށް ވުރެ ގިނަ ފްލެޓުތައް ދޫކުރުމުގެ އުސޫލުތައް އަދި ބީއެމްއެލް އިން ހާމައެއް ނުކުރެ އެވެ. މިއަދުގެ ރަސްމިއްޔާތުގައި ވެސް އެ ފްލެޓުތަކާ ގުޅޭ އިތުރު ވާހަކަތަކެއް ސީއީއޯ ޝަރީފު ވިދާޅެއް ނުވެ އެވެ.
ފަސް ކޮންޓްރެކްޓަރަކާ ހަވާލުކޮށްގެން އިމާރާތް ކުރަމުން އަންނަ 3،260 ފްލެޓުގެ އަމަލީ މަސައްކަތް ފެށީ މިދިޔަ ހަފުތާގަ އެވެ. އެ ފްލެޓުތައް އިމާރާތް ކުރަނީ ހުޅުމާލެ 1، ހުޅުމާލެ 3 އަދި ވިލިމާލޭގަ އެވެ.
ފްލެޓުތައް އިމާރާތް ކުރުމުގެ މަސައްކަތް ބީއެމްއެލްގެ ސަބްސިޑަރީ ކުންފުނިން ހަވާލުކޮށްފައި ވަނީ ރާއްޖޭގެ ތިން ކުންފުންޏެއް ކަމަށްވާ އާރުސީސީ އާއި އަމިން ކޮންސްޓްރަކްޝަނާއި އެފްޑަބްލިއު އަދި ޗައިނާގެ ދެ ކުންފުންޏެއް ކަމަށްވާ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އާއި ޗައިނާ މެޝިނަރީ އިންޖީނިއަރިން ކޯޕަރޭޝަން (ސީއެމްއީސީ) އާ އެވެ.
ސޯޝަލް ހައުސިންގެ ފްލެޓުތައް އިމާރާތް ކުރަނީ މޯލްޑިވްސް މަނިޓަރީ އޮތޯރިޓީން އެކުލަވާލާފައިވާ އިންކްލޫސިވް ނޭޝަނަލް އެފޯޑަބްލް ހައުސިން (އައިއެންއޭއެޗް) ގެ ދަށުން ކަނޑައަޅާފައިވާ މަގުސަދު ހާސިލް ކުރަން އުފެއްދި ބީއެމްއެލްގެ ސަބްސިޑަރީ ކުންފުނި އެފޯޑަބަލް ހޯމް ލީސިން ކޮމްޕެނީންނެވެ.
ރާއްޖޭގައި ކުޑަ އަގެއްގައި ގެދޮރު ހޯދުމުގެ ފުރުސަތުތައް އިތުރު ކުރުމަށްޓަކައި ނެޝަނަލް ހައުސިން އެފޯޑަބިލިޓީ އެންޑް އެކްސެސިބިލިޓީ ޕްރޮޖެކްޓްގެ ދަށުން ހައުސިން މިނިސްޓްރީގެ އެހީތެރިކަމާ އެކު، ބީއެމްއެލް އިން ނިންމާފައިވަނީ ހައުސިން ޔުނިޓްތައް ހަދައި، ލީސް-ޓު-އޯން (ކުލި ދައްކައި ހަލާސް ކުރުމުން މިލްކުވުން) މޮޑެލްގެ ދަށުން އާންމުންނަށް ހުޅުވައިލުމަށެވެ.
ހައުސިން މިނިސްޓަރު ޑރ. އަބްދުﷲ މުއްތަލިބު ކުރިން ވިދާޅުވެފައިވާ ގޮތުގައި އެމްއެމްއޭގެ "އިންކްލޫސިވް ނޭޝަނަލް އެފޯޑަބަލް ހައުސިން ސްކީމް" ގެ އުސޫލުގެ ދަށުން އަގު ހެޔޮކޮށް ވިއްކަން އިމާރާތްކުރާ ފްލެޓުތަކުގެ ބިން ބީއެމްއެލް އަށް ދޫކޮށްފައި ވަނީ ހިލެ އެވެ.
އޭނާ ވިދާޅުވެފައި ވަނީ ބީއެމްއެލް އިން އަޅާ ފްލެޓްތައް ދޭނީ ސަރުކާރުން އިއުލާންކުރާ ޕްރޮގްރާމަށް ކުރިމަތިލައިގެން ހޮވޭ މީހުންނަށް ކަމަށާއި އެއީ ބޭންކުން ކަނޑައަޅާ އުސޫލުތަކަށް ފެތޭ މީހުންނަށް ވެސް ވާން ޖެހޭނެ ކަމަށެވެ.
"ދިވެހި ރައްޔިތުންނަށް ދިމާވެފައިވާ ބޯހިޔާވަހިކަމުގެ ދަތިކަން ހައްލުކުރުމަށް ސަރުކާރާ އެއްކޮށް، އަތުގުޅާލައި ބޮޑު މަޝްރޫއެއް ފެށުމަށް ބޭންކުން ނިންމީ، މިއީ މީގެ ކުރީގެ މެނޭޖްމަންޓުތަކުން ހަގީގަތުގައި ސަރުކާރަށް ދީފައި ނުވާވަރުގެ އެއްބާރުލުމެއް،" އަގުހެޔޮކޮށް ވިއްކަން ފްލެޓުތައް އިމާރާތްކުރާ ބިންތައް ބީއެމްއެލްއާ ހަވާލުކުރަން މިދިޔަ އަހަރުގެ ނޮވެމްބަރު 13 ވަނަ ދުވަހު ބޭއްވި ރަސްމިއްޔާތުގައި މިނިސްޓަރު ވިދާޅުވެފައި ވެ އެވެ.