އަދާލަތު ޕާޓީގެ ރައީސަކު ހޮވުމަށް ބާއްވާ އިންތިހާބު އޮންލައިންކޮށް ފަށައިފި އެވެ.
އަދާލަތު ޕާޓީން ބުނީ އެ އިންތިހާބުގެ ވޯޓުލުން ފެށީ ހެނދުނު 9:00ގައި އެވެ.
ފަހި ވޯޓު އޮންލައިން އެޕްލިކޭޝަން މެދުވެރިކޮށް ކުރިއަށް ގެންދާ އެ އިންތިހާބުގެ ވޯޓުލުން މިއަދު އިރުއޮއްސި 6:00 އާ ހަމައަށް ކުރިއަށް ގެންދިއުމަށް ވަނީ ނިންމައިފަ އެވެ.
އަދާލަތު ޕާޓީގެ ރައީސް ކަމަށް ހުޅުވާލުމުން ކުރިމަތިލާފައި ވަނީ ދެ ބޭފުޅުންނެވެ. އެއީ ޑރ. އިކްރާމް އަބްދުއްސައްތާރުގެ އިތުރުން އެ ޕާޓީގެ މިހާރުގެ ނައިބު ރައީސް ޝައިހު މުހައްމަދު ޝިފާނެވެ. ނަމަވެސް އޮންލައިންކޮށް ވޯޓުލުމަށް ނިންމުމުން އިކްރާމް ވަނީ އިންތިހާބު ބޮއިކޮޓްކުރަން ނިންމައިފަ އެވެ.
އެ އިންތިހާބުގައި ވޯޓު ލާނެ ގޮތަކާ މެދު އެޕާޓީގެ ތެރޭގައި އޮތީ ހިޔާލު ތަފާތުވުން އުފެދިފަ އެވެ. އިކްރާމް ވަނީ އޮންލައިންކޮށް ނުލައި ވޯޓު ފޮށި ބަހައްޓައިގެން ވޯޓުލުމަށް އެ ޕާޓީ އާއި އިލެކްޝަންސް ކޮމިޝަންގައި ވެސް އެދިފަ އެވެ. ނަމަވެސް އެ ޕާޓީން ބުނެފައިވަނީ ވޯޓު ފޮށި ބަހައްޓަން ޕާޓީގެ އިންތިހާބުތަކުގެ ގަވާއިދުން ޖާގަ ނުދޭ ކަމަށެވެ.
އިކްރާމް ވިދާޅުވެފައިވަނީ އިންތިހާބުގެ ކަންކަން ދެފުށް ފެންނަ ގޮތަކަށް ގެންދިއުމަށް އިލެކްޝަންސް ކޮމިޝަނުން ވެސް ޕާޓީއަށް އަންގާފައިވަނިކޮށް އެ އެންގުމާ ހިލާފަށް ހަރުކަށިކަން ދައްކައި، އެއިން ކަމަކަށް އެއްވެސް ސަމާލުކަން ދީފައިނުވާ ކަމަށެވެ.
އިކްރާމް ވިދާޅުވެފައިވަނީ މަޝްވަރާނުކޮށް "އެކުވެރިކަމުގެ ރިވެތި އުސޫލު ދޫކޮށް ހަމަ ބުއްދީގެ މަގުން އެއްކިބާވެތިބެ އިންތިހާބު ކުރިއަށް ގެންދިއުމަށް ގަދަބާރުން ނިންމާފައިވާތީ" އެ އިންތިހާބުގައި ވާދަނުކުރަން ނިންމީ ކަމަށެވެ.
އިކްރާމަކީ މެލޭޝިއާގެ އިންޓަނޭޝަނަލް އިސްލާމިކް ޔުނިވާސިޓީން ޝަރީއަތާއި ގާނޫނުގެ ދާއިރާ އިން ފުރަތަމަ ޑިގްރީ އާއި މާސްޓާސް އަދި ޕީއެޗްޑީ ފުރިހަމަ ކުރެއްވުމަށް ފަހު، ރާއްޖޭގެ އިސްލާމީ ޔުނިވާސިޓީގެ ސީނިއާ ލެކްޗަރާއެއްގެ ގޮތުގައި މަސައްކަތް ކުރައްވަމުން ގެންދަވާ ބޭފުޅެކެވެ.
ރައީސް ކަމަށް ދެން ކުރިމަތިލެއްވި ޝިފާނަކީ މަދީނާ ޔުނިވާސިޓީން ޝަރުއީ ދާއިރާ އިން ޑިގްރީ ހާސިލު ކުރައްވާފައިވާ ބޭފުޅެކެވެ. އަދި ރާއްޖޭގެ ބިޒްނަސް ސްކޫލުން ބިޒްނަސް އެޑްމިނިސްޓްރޭޝަނުން މާސްޓާސް ހާސިލު ކުރައްވާފައިވެ އެވެ.