ހުޅުމާލެ 2 ގައި ހުންނަ ހިޔާގެ ފަސް ވަނަ ޓަވަރުގައި ރޭ ހިނގި އަލިފާނުގެ ހާދިސާއާ ގުޅިގެން ގުޅިގެން ހާލުގައި ޖެހުނު 37 މީހަކަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވަގުތީ ބޯހިޔާވަހިކަން ފޯރުކޮށްދީފި އެވެ.
ރޭގެ ހަތެއް ޖަހާކަންހާއިރު އެ ޓަވަރުގައި ރޯވީ އައުޓްޑޯ ޔުނިޓެއްގައި ކަމަށް އެނގިފައި ވިޔަސް އެ ހާދިސާއާ ގުޅޭ ތަފްސީލުތައް މިހާތަނަށް ސަރުކާރުގެ ކަމާ ގުޅޭ ފަރާތްތަކުން ހާމަކޮށްފައެއް ނުވެ އެވެ.
އަލިފާނުގެ ހާދިސާގައި ހިޔާ ޓަވަރު 5 ގެ މައި ހޮޅިއަށް ލިބުނު ގެއްލުން ދެނެގަނެ ގެއްލުންތައް މަރާމާތުކުރުމުގެ މަސައްކަތް އެޗްޑީސީން އަދިވެސް އަންނަނީ ކުރަމުންނެވެ.
އެންޑީއެމްއޭ އިން ބުނީ ރޭ ހިނގި އަލިފާނުގެ ހާދިސާއާ ގުޅިގެން ފަސް ވަނަ ޓަވަރުގެ ހަތް އެޕާޓްމަންޓެއްގެ 37 މީހަކަށް އެ އޮތޯރިޓީން ވަގުތީ ބޯހިޔާވަހިކަން ފޯރުކޮށްދީފައިވާ ކަމަށެވެ.
އެ ހާދިސާއާ ގުޅިގެން އެހީތެރިކަމެއް ބޭނުންވާ ނަމަ އެންޑީއެމްއޭގެ އިމަޖެންސީ ހޮޓްލައިން 115 އަށް ގުޅުމަށް ވެސް އެ އޮތޯރިޓީން ވަނީ އެދިފަ އެވެ.
ސޯޝަލް މީޑިއާގައި ދައުރުވި ވީޑިއޯތަކުން ފެންނަ ގޮތުގައި ދުން އަރަމުން ދިޔައީ އިމާރާތުގެ އެންމެ މަތިން ވައި ގޮޅިއާ ދިމާލުންނެވެ. އެކަމަކު ރޯވީ އިމާރާތުގެ 15 ވަނަ ބުރީގެ ވައިގޮޅީގައި ހަރުކޮށްފައި ހުރި އޭސީ އައުޓްޑޯ ޔުނިޓެއްގަ އެވެ. އެ ތަނުގައި ރޯވި އަލިފާނާ އެކު އެ ވައިގޮޅީގައި ހުރި ހުރިހާ ހޮޅިތަކެއް ވަނީ އަނދައިފަ އެވެ.
އެ އަލިފާނުގެ ހާދިސާއަށް މާ ގިނައިރުތަނެއް ނުވެ އަލިފާން ވަނީ ނިއްވާލައިފަ އެވެ.
ހިޔާ ޓަވަރުތަކުގައި ދޭތެރެދޭތެރެއިން އަލިފާނުގެ އެކި ވަރުގެ ހާދިސާތައް ހިނގަ އެވެ. އެތައް ހާސް ބަޔަކު އުޅޭ އެ ޓަވަރުތަކުގައި އަލިފާނުގެ ހާދިސާތަކުން ރައްކާތެރިވުމަށް އެކަށީގެންވާ ނިޒާމެއް ގާއިމުވެފައި ނެތްކަމުގެ ކަންބޮޑުވުން އަބަދުވެސް އޮވެ އެވެ.
